Neh gơs bơta mờng, pah drim tŭ guh bĭc, broă lơh sơnrờp ngan bơh ồng Kơ Să Ha Nhiếu kis tàm xã Phú Hội, kơnhoàl Đức Trọng, càr Lâm Đồng dê là pờ Rơjô nàng iăt jơnau đơs mờ dà kòn cau K’ Ho bơh jơnau đơs Việt Nam dê, geh Anih drơng broă sùm tàm Tây Nguyên lơh gơs. Ồng đơs: Rơlao 20 nam do, Jơnau đơs mờ dà kòn cau K’ Ho bơh Anih jơnau đơs Việt Nam neh gơs cau bơyô đềt mềr. Bơh tơl săp đơs bơh ală cau sền sơwì neh gơs đềt mềr. Den tàng, ồng kah loh tơl tơngu me jơnau đơs mờ tŭ jơ pờ tơlik jơnau đơs pah ngai mờ tàm poh. Tàm hơ̆, ồng di nùs mờ jơnau đơs pơn đik, jơnau bơto sồr lơh broă sa, bơto sồr ơruh pơnu tơrian lơh broă sa. “Añ gŏ ală jơnau đơs tàm Rơjô niam ngan. Sùm bơtê bơto làng bol tàm broă lơh sa, đơs jơnau pơn đik, đơs tòng bơr bè cau chài Ka Ding. Geh uă jơnau đơs pơn đik bơto sồr làng bol tơriang tàm broă lơh sa, pal git tàñ sơ̆. Añ kờñ ală jơnau đơs do geh đơs uă rơlao tai tàm rơjô nàng làng bol geh iăt mờ bơh tŭ hơ̆ dong kờl tơnguh uă bơta ngăc ngar làng bol in”.

Gơwèt mờ mò Cil Bri, Phó Củ tịc Mpồl cau ùr càr Lâm Đồng den đơs, Jơnau đơs K’Ho tàm Anih jơnau đơs Việt Nam là anih yal tơngit tờm bơh Dà lơgar dê. Ờ mìng yal ală jơnau tơngit tàm lơgar mờ dunia pah ngai, mờ gam yal di tŭ ală bơta gơlik tàm Tây Nguyên đơs bal mờ càr Lâm Đồng đơs is. Jăt mò Cil Bri đơs, ală tơngu me geh tơlik mờ săp đơs mờ akhar cih bơh kòn cau K’ Ho tàm Rơjô kung bè tàm pang web VOV4.K’Ho- bơh VOV Tây Nguyên dê neh dong kờl làng bol git tus bơta ngăc ngar geh rơcang lài mờ di tŭ. “Añ gơboh ngan iăt ală jơnau đơs mờ dà kòn cau K’ Ho bơh Anih jơnau đơs Việt Nam drơng broă sùm tàm Tây Nguyên dê. Tài tàm do geh uă ngan jơnau đơs bè bơta niam chài, cíñ trị, lơh sa mpồl bơtiàn, prăp gàr mờ sền gàr bơta niam chài, bơto sồr oh mi cau ùr deh dùh di kơrhia tàm hìu nhă, kung bè broă ròng siam oh kòn, tơriang tàm broă lơh sa, tơriang bơsram sră, bơto sồr cit sơnơm vaccine tơl, añ gŏ ală bơta do geh kwơ ngan gơwèt mờ broă lơh tờm añ dê...”.

Gơwèt mờ Cau chài ưu tú K’ Brèm, tŭ do gam lơh broă tàm Anih Niam chài, Yal tơngit mờ Tàp pràn să jan kơnhoàl Bảo Lâm, càr Lâm Đồng đơs, Jơnau đơs dà kòn cau K’ Ho bơh Anih jơnau đơs Việt Nam geh bơtơl bơta niam chài ờs mờng kòn cau ồng dê. Tài bơh ală jơnau “Jơnau đơs pơn đik Tây Nguyên”, “Jơnau đơs pơn đik 3 tiah”, “Jơnau sồr đơs jơnau pơn đik” bơh Anih jơnau đơs Việt Nam dê, Cau chài ưu tú K’ Brèm geh tai jơnau nàng drơng ai broă lơh tờm niam chài tàm ƀòn lơgar tờm ồng dê. Di tơnkah 22 nam ngai pờ tơlik jơnau đơs dà kòn cau K’ Ho bơh Anih jơnau đơs Việt Nam dê, Cau chài ưu tú K’ Brèm geh pơyoa jơnau chờ gờm jơh nùs ngan bè do: “Di tơnkah 22 nam, añ dan chờ gờm Anih jơnau đơs he dê tŭ lơi kung pràn kơl dang, tơnguh bè phan bơna nàng jòi geh ală bơta niam chài ờs mờng niam bơnĕ bơh mò pàng he dê lời wơl. Ờ mìng ală jơnau đơs pơn đik bè đơs ting đơs loong, đơs tam pơ̆t, kồng yai kòn cau K’ Ho – Mạ he dê, añ kờñ ngan jơh ală oh mi tàm ƀòn tus bal pơn jăt tai mờ prăp gàr bota niam chài ờs mờng kwơ màng bơh mò pàng he dê”.

Tờm 22 nam pờ tơlik jơnau đơs, ală cau lơh broă tàm jơnau đơs dà kòn cau K’ Ho bơh Anih jơnau đơs Việt Nam geh uă nùs nhơm ngoh rơngăc ngan. Jơh ală cau lơh broă sền sơwì jơnau, mblàng jơnau ndrờm tus bơh ƀòn lơgar tờm càr Lâm Đồng dê, tus mờ Anih Drơng broă sùm jơnau đơs Việt Nam tàm Tây Nguyên (anih lơh broă tàm ƀòn dờng Buôn Ma Thuột, càr Dăk Lăk) nàng lơh kơnòl kwơ màng do rơlao 20 nam lơh broă, ală cau sền sơwì jơnau đơs ờ mìng lơh niam broă mblàng jơnau, sền jơnau mờ đơs mờ dà kòn cau tờm he dê tàm anih pờ tơlik jơnau đơs, mờ gam geh ală dơ̆ lòt lơh broă tus tàm ală ƀòn tiah ngài, tìp mờ cau iăt rơjô, jòi jơnau đơs pơn đik nàng kŭp săp mờ cih ală jơnau, cri bơyai jơnau geh tàm rài kis. Ồng K’ Brọp, Phó Kwang atbồ Cơl dŭ jơnau đơs dà kòn cau, Anih Drơng broă sùm tàm Tây Nguyên (mờ kung là Cau atbồ Mpồl jơnau đơs kòn cau K’ Ho lài do) đơs: “Rơlao 22 nam lơh broă mờ Jơnau đơs kòn cau K’ Ho dê, 7 nam lơh Phó Kwang atbồ Cơl dŭ jơnau đơs kòn cau dê, bŭ lah tàm gơnoar broă lơi, añ kung lơh ngan lơh gơs kơnòl geh jào. Di tơnkah 22 nam Ngai pờ tơlik jơnau đơs sơnrờp ngan bơh jơnau đơs kòn cau K’ Ho, añ chờ gờm jơh ală oh mi sền sơwì jơnau đơs lơh broă tàm mpồl jơnau đơs kòn cau K’ Ho sùm pràn kơl dang, kơ̆ dơn bè cíñ trị, jăk chài bè broă lơh, pơn jăt tai là cau tơrbŏ bal yal mblàng broă lơh bơh Đảng mờ Dà lơgar tus mờ làng bol kòn cau K’ Ho he dê mờ dà đơs mè deh bơh să tờm he dê tơn, pơgồp bal tàm broă prăp gàr bơta niam chài ờs mờng kòn cau K’ Ho bơh anih pờ jơnau đơs mờ pang web tàm internet, nàng jơnau đơs dà kòn cau K’ Ho sùm là cau bơyô đềt mềr pah ngai ờ gơtùi ờ geh bơh làng bol kòn cau K’ Ho dê”.

22 nam do, Jơnau đơs dà kòn cau K’ Ho bal mờ 5 Jơnau đơs mờ dà kòn cau ndai tàm Tây Nguyên, tàm hơ̆ geh: Rơđê, Jarai, Bơnhàr, Sơdàng mờ Mnông sùm gàr nùs nhơm tam klăc bal, lơh jăt niam bal kơnòl yal mblàng gùng dà, broă lơh bơh Đảng mờ Dà lơgar tus mờ làng bol ală kòn cau in. Tàm hơ̆, jơnau đơs K’ Ho sùm là cau bơyô đềt mềr bơh làng bol kis tàm ală ƀòn Tây Nguyên dê.