Mìng mờ dùl bơta phan là pơnhàt đềt, sồt, dùl gơl tờm kơphe jòng di pơgăp 1 làs tê nàng trah, phàt, tơnơ̆ mờ dùl tŭ pơn niam sền gơl tờm kơphe, cau chài gam kơnòm să Y Ser Bkrông, kis tàm ƀòn Tơng Jú, xã Ea Kao, ƀòn dờng Buôn Ma Thuột neh gŏ lài rùp kờñ lơh trah gơs. Ờ duh pal trah lơh lài nền nòn, bi geh ai bơh tàm bơta mờng chài neh jŏ nam bơh să tờm dê mhar phàt tơl bă nàng lơh gơs rùp tềng dơm tờm kơphe.

Rùp neh rơhời geh gŏ tơnơ̆ mờ ală dơ̆ phàt bơh cau chài dê. Phàt ndang, bi Y Ser Bkrông yal ndang: “Do là rùp cau ùr lòt tus tềng dà mbòr nàng bơ̆ dà. Do là rùp trah bơh kòn cau Tây Nguyên dê, añ kờñ lơh gŏ wơl rài kis mùl màl bơh ƀòn lơgar lài do dê. Añ neh sền nền dơm chi do bè lơi hơ̆ sồng kơlôi tus mờ broă kờñ trah gơs rùp lơi, bơh tềng dơm chi he gơtùi kơlôi tus trah gơs dùl nơm rùp cau klao tui yoas ha là cau ùr gam um ha là cau mò gam àñ sơ̆ lòt mìr, jăt mờ bơta he gŏ tềng dơm chi”.

Tàm dơ̆ pơrlòng trah rùp bơh tờm kơphe geh bơyai lơh bơh broă lơh Chờ kơphe tàm ƀòn dờng Buôn Ma Thuột dơ̆ 8 lài do, geh 53 nă cau chài tus bơh ală kơnhoàl, thị xã, ƀòn dờng tàm càr Dăk Lăk mờ ală càr tàm Tây Nguyên tus bal. Mờ tơngu me “Bơta chài rơgơi, bơta niam, phan geh is, kòn bơnus Tây Nguyên dê” geh uă cau chài neh ngui bơta niam chài trah rùp dơm chi ờs mờng nàng trah gơs rùp. Ală rùp ờs mờng bè: rài kis lơh chờ, ñô tơrnờm, dròng cing, piah kòi, mă kòn, còp mìr geh ală cau chài trah gơs.

Cau chài Y Dhok Adrơng, kis tàm xã Cư̆ Suê, kơnhoàl Cư̆ Mgar, càr Dăk Lăk yal: bơta krơi is bơh rùp dơm chi Tây Nguyên đơs bal mờ kòn cau Rơđê đơs is mờng ngui ală bơta chi kră, geh bơta kơl jăp bè tờm Muồng, tờm crĭ,... nàng trah gơs rùp. Gơwèt mờ tờm kơphe den pal rơwah ală tờm dờng neh jŏ nam, ìs ro ngan hơ̆ sồng gơtùi trah lơh rùp. “Tờm do tŭ do añ trah gơs rùp cau mè trao kòn. Tài lài do tŭ gam dềt, pah dơ̆ lòt mìr den mè mờng mă mờ trao añ. Gơwèt mờ rùp trah den dơm chi dờng geh lơh ƀuơn rơlao. Gam gơwèt mờ dơm chi kơphe den kal ke rơlao, he pal lơh bè lơi nàng gàr bơta niam do, phàt kung kal ke, pal ngui pơgồp bal ală bơta măi den hơ̆ sồng lơh gơtùi”.

Mìng tàm 3 ngai, ală cau chài neh lơh gơs 48 nơm rùp niam mờ uă bơta nền nòn, lơh geh uă bơta niam tàm rài kis phan bơna mờ nùs nhơm bơh làng bol Tây Nguyên dê. Ală rùp geh lơh gơs neh geh mpồl bơyai lơh cèng nàng ngui tàm broă ràng tơlik rùp tàm ƀlàng nhơl chờ niam brê bơnơm Ko Tam, nàng yal tus mờ làng bol bal mờ cau năc nhơl sền.

Geh tus sền tơn, sền tàm tŭ cah chài trah, phàt rùp bơh tờm kơphe tàm ală ngai geh bơyai lơh chờ, bi Nghiêm Bá Nam, cau năc tus bơh ƀòn dờng Hà Nội yal: do là dơ̆ sơnrờp bi geh sền gŏ tơn cau chài trah rùp bơh tờm kơphe. Bi gơlơh ngoh rơngăc ngan tài bơh ală gơl tờm kơphe jàng lah neh gơtìp sơbì gời, bơh tàm mpàng tê chài cau chài dê, bal mờ ală phan trah, phàt bè ờs ngan, mơya kung gơtùi lơh gơs ală rùp geh kwơ sơl. “Bơh ală rùp geh lơh bơh tờm kơphe neh gơtìp sơbì gời den ală cau chài gam lơh geh ală rùp niam mờ bơta chài bơh să tờm cau chài dê nàng lơh gơs rùp bơh cau chài dê, niam bơnĕ ngan. Ală cau chài geh lơh gơs ală rùp niam ngan mờ geh kwơ bè bơta niam chài, nùs nhơm añ gơlơh bè geh ngui jơh phan geh lơh bơh tờm kơphe dê”.

Gơwèt mờ ală jơi bơtiàn kòn cau kis bơh yau tàm Tây Nguyên dê, trah rùp là dùl bơta niam chài neh geh bơh jŏ ngan. Bơh ală gơl đơm chi ờ geh kwơ, bơh tàm mpàng tê chài cau chài dê, neh geh trah gơs ală bơta rùp niam, pa, geh uă bơta niam ngan. Ờ mìng trah gơs tàm ală dơm chi dờng jŏ nam, tŭ do, ală rùp hơ̆ geh trah bơh tàm ală tờm kơphe neh kra, cèng geh ală bơta kwơ pa, niam mờ krơi is ngan ai tờm kơphe in.