Kông viên Địa cất gùt plai ù UNESCO Dăk Nông geh bă ù ơnàng 4 rbô 760 kơi sồ vuông, gơdă ơnàng tàm 6 kơnhoàl, ƀòn dờng càr Dăk Nông dê. Tiah do geh ală rơgồng bơnơm ồs dờng ngan rlau jơh tiah đah jum măt tơngai lik câu Á, geh tềl lời wơl jòi sền phan kwơ yau cau rài yau dê ờ huan ngan bàn tàm ală rơgồng bơnơm ồs tàm dunia. Do là kơnhoàl ù tiah uă rùp să niam chài bơh rlau 40 jơi bơtiàn dê, dồ bơnah tàm “Ù tiah niam chài cing mồng Tây Nguyên”. Phan mòn phan lời wơl niam chài crih crài ngan ờ di phan bơna bơh kòn bơnus gùt plai ù dê”. Ală tiah sền gàr brê bơnơm geh is Nâm Nung, Brê dà lơgar Tào Dùng, brê sền gàr ù tiah ƀòn lơgar Dray Sáp ơn prăp ală bơta kwơ mùl gŏ is bè li la phan kis bal mờ uă tiah lòt nhơl pơnrơ niam ngan…

Pah poh lam bơh 2 tus 3 mpồl năc lòt tus Krông Nô- tiah dơlam Kông viên Điạ cất gùt plai ù UNESCO Dăk Nông, mò Lý Mai Ly, cau tờm anih lòt nhơl homestay Tơng Ju, càr Dăk Lăk dê chờ hờp yal: bă ù do geh bơta lơh gơkờñ is ồn gơ wèt mờ năc lòt nhơl geh bal bơh tàm lơgar mờ ală lơgar. Mò Lý Mai Ly, đơs: Añ neh lam ờ gŏ gĭt là nđờ mpồl rê tus Krông Nô lòt nhơl. Bơh chờm là broă lơh tơrlòng lài um brê, hơ̆ ờ gŏ di là mù um tàm croh halà mù um tàm liang tàm ñrùh ờ mờ là lời ală cau jòi rê hờ brê bơnơm geh is, lòt jơng tềng hơđơm mƀur brê geh is, iăt kơno săp ntas croh dà liang dà hòr. Dơ̆ bàr là lòt sền nàng gĭt rơgồng bơnơm ồs, cau kra ngan rlau jơh là 76 sơnam, dềt sơnam ngan rlau jơh là 2 sơnam, mờ khi ndrờm mŭt geh tus rơgồng geh tiah tềl lời wơl cau rài yau dê là rơgồng C3 mờ rơgồng C6.

Ală jơnau sền gŏ krơi is tàm Kông viên Địa cất gùt plai ù UNESCO Dăk Nông neh lời wơl jơnau kah ngan gĭt lơh gơ wèt mờ cau kơlôi sơnơng là mò Phạm Thị Trầm, lơh broă tàm Anih kơlôi sơnơng ù tiah niam chài kòn bơnus gơ wèt Anih kơlôi sơnơng jak chài mpồl bơtiàn Việt Nam dê, đơs bè do: Bơta pràn bè lòt nhơl là niam bơnĕ krơi is ngan, geh phan bơna lòt nhơl khin cha sơbơng roh, mŭt tàm rơgồng, lòt còp ƀlàng sre kòi, is ồn là lòt nhơl niam chài. Bal mờ hơ̆ den geh uă phan bơna broă lơh sa sươn sre gơtùi bơtàu tơngguh tăc mờ năc lòt nhơl in. Is să tờm añ neh uă dơ̆ ngan mŭt tàm Krông Nô den ndrờm blơi phe bơh tàm tiah hơ̆ cèng rê Hà Nội. Mùl gơ là kah kờñ ngan.

Bơta pơlai soh ngan bơh năc lòt nhơl dê tŭ tus mờ Kông viên địa cất gùt plai UNESCO Dăk Nông là tiah do ờ hềt geh uă drơng broă nàng khi in gơtùi ơm wơl jŏ ngai. Ồng Lê Văn Hà lơh broă tàm Anih kơlôi sơnơng ù tiah niam chài kòn bơnus gơ wèt Anih kơlôi sơnơng jak chài mpồl bơtiàn Việt Nam sơđio loh, ờ tơl anih ơm bĭc, ờ hềt geh ală hìu ràng tăc phan pơnrơ bơkah is tiah do dê, phan bơna tàm tơrbŏ bal ờ hềt niam, lòt nhơl Krông Nô, càr Dăk Nông kung gam lơh dềt rah rài, lơh is lơm. Càr pal geh ală broă dong kờl nàng lơh bal rơndăp tăp sèng ală hìu bơnhă, mpồl lơh broă bal mờ mpồl lơh sa kă bro, ngui niam bal bơta pràn geh is bơh tiah phan lời wơl kông viên địa cất gùt plai ù dê, lơh ală phan bơna lòt nhơl krơi is. Ồng Lê Văn Hà, đơs: Tàm Krông Nô den añ gŏ rơ̆p pa là ală hìu lơh dềt rah rài lơh is lơh tơrlòng is gời lơm. Dơ̆ bàr là ală mpồl lơh broă bal den ờ hềt lơh gơtùi, dơ̆ pe kwơmàng ngan là mpồl lơh sa kă bro kung ờ hềt geh sơl. Tŭ do, mờ kờñ lơh geh lòt nhơl den pal lơh bal mờ ală cau tờm do.

Ồng Nguyễn Xuân Danh, Phó Củ tịc Anih duh broă Làng bol kơnhoàl Krông Nô đơs, lòt nhơl tiah dơlam Kông viên Địa cất gùt plai ù UNESCO Dăk Nông kung gam ơm tàm bơta geh tơl pràn ơm kơ̆p lơh lơm. Tŭ do ală gơkòl gơrềng tus rơndăp ù tiah, tus ù brê neh geh tă bơsong, kơnhoàl gam rơhời lơh ală broă lơh tơrlòng lài lòt nhơl, kờñ ngan bơta bơcri priă niam bơh mpồl lơh sa kă bro dê. Ồng Nguyễn Xuân Danh, đơs: Bol hi geh kòi phe Ƀòn Choá, ƀơ bơnơm ồs, ală bơta chi sa plai Krông Nô, hơ̆ sồng kơnuh sơnơm plai pơnàng…là ală broă lơh tơrlòng lài mờ bol hi gam lơh. Broă tai là lơh ing bàr pe rơgồng lơh lòt nhơl den kơnhoàl kung gam dan bơto pơlam bơh Sở Niam chài tàp pràn să jan mờ lòt nhơl dê.

Ờ tơl priă jền mờ kơlôi rơcăng ngòt lơh tìs ală jơnau sồr ătbồ phan lời wơl ù tiah là ală bơta gơ kơryan lơh ală tiah tàm càr Dăk Nông ờ hềt gơtùi ngui niam bơta pràn bơh măt sơnđan Kông viên Địa cất gùt plai ù UNESCO. Bè broă do, Phó Cau pơgru dờng, Tiến sĩ Trần Tân Văn là cau tàm mpồl bơto pơlam ală kông viên địa cất gùt plai ù UNESCO bơto pơlam: Rwah ală tiah tềl phan lời wơl nàng bol he ai tơmŭt sền gàr mờ bơtàu tơngguh lòt nhơl ai ală bă ndai den gơtùi lơm bơtàu tơngguh lơh sa dồ bă bè ờs đềt mềr mờ mpồl bơtiàn, đềt mềr mờ tiah ơm kis. Mờ ală broă lơh bơtàu tơngguh lơh sa- mpồl bơtiàn bơh ală kơnhoàl dê den gơ pal gơ jăt bal mờ kông viên địa cất.

Mò Tôn Thị Ngọc Hạnh, Phó Củ tịc Anih duh broă Làng bol càr Dăk Nông pà gĭt, càr neh geh ală broă dong kờl hìu bơnhă, mpồl bơtiàn cau jơi bơtiàn dồ êt nă cau sền gàr niam chài ờs mờng bơh yau, lơh broă lơh tơrlòng lài homestay. Ală broă dong kờl, gơhòi gơ jà bơcri priă kung neh ƀươn ƀoài sơl. Càr neh lơh pang lòt nhơl sồ, bơh điện thoại rơ̆p lam gùng năc lòt nhơl in tus mờ jơh ală anih tàm Kông viên Địa cất gùt plai ù UNESCO Dăk Nông, geh yal tơnggĭt loh làng. Mò Tôn Thị Ngọc Hạnh, pà gĭt tai: Jơnau do niam ngan mờ bol hi pơgồp bal mờ kông viên địa cất bơh he dê hơ̆ là jăt 3 gơl gùng lòt nhơl: Yau ồs mờ dà, Săp ntas bơh nhơm càl pa dê, Jơnau mpong ntas bơh plai ù dê; mờ tơl gùng lòt nhơl jăt tơnggume do gơjăt tai wơl bal mờ tơl anih loh làng. Bol hi gam geh dồ jơtài dờng ngan sền gŏ tơn mờ măy mờ niam bơnĕ ngan mơya gơ geh bơta kwơ bè kơlôi sơnơng jak chài tai nàng gơtùi drơng tơl ală bơta lòt nhơl. Den bol hi gam hòi jà bơcri priă, ală cau bơcri priă geh tơl nùs nhơm niam geh tơl bơta pràn jak nàng gơtùi bơtàu tơngguh lòt nhơl tàm do.

Kông viên địa cất gùt plai ù UNESCO Dăk Nông là tiah bơtòm tơrgùm ală bơta pơnrơ ngan bè ù tiah rùp să ù tiah dê, jòi sền phan kwơ yau, niam chài mờ li la phan kis mùl gŏ is bơh kơnhoàl ù tiah do dê. Gơn kơnờm là ală phan lời wơl do rơ̆p mhar geh ngui niam nàng Dăk Nông in brồ guh pràn kơldang, pơnđơl gơgơs càr bơtàu tơngguh đau tàm nam 2030 bơh tiah Tây Nguyên dê bè jơnau kờñ tàm Jơnau lơh nền tàm pơrjum bơh Pơrjum dờng cau ala măt Đảng ƀộ càr Dăk Nông khoă XII dê neh cih.