Ơ ồng, là cau gĭt wă mờ kờñ ngan mờ bơta niam chài jơi bơtiàn kòn cau Jrai dê, ồng neh geh iăt kơno mờ gĭt uă bè jơnau yal yau kòn cau Jrai dê sơl ờ?

Ông Rmah Ban: Ngan ngồn mờ đơs là, dilah iăt cau ndai yal khan ngan ngồn den añ ờ hềt iăt wil tơl sơl ờ, añ kung mìng iăt kơno cau do yal dùl gơl, cau ne yal dùl gơl. Pơnyơu bè yal khan Yă Pôm, khan Drit, Khan Rơmung Kuăng, Khan Ơi Tŏn, Khan But kông yă, Khan Ƀlor, Khan But tơkông yă, Khan Jong Be, Khan Set Rok... kung iăt cau ndai yal wơl lơm gơ dê, iăt geh 1, 2 gơl lơm, kung ờ hềt iăt tơl làm sơl ờ...

Bơh ală jơnau yal yau kòn cau Jrai dê mờ ồng neh iăt cau yal, tơngume jơnau yal yau bơh kòn cau Jrai dê sùm bơto tơngkah rơnàng tơnơ̆ do in bơta lơi, ơ ồng?

Ông Rmah Ban: Kòn cau Jrai kung bè jơi bơtiàn ndai sơl gơ dê, bơh ală jơnau yal yau ồng mò kờñ bơto bol he in ală jơnau bơsram bè broă lơh là dùl nă cau niam, broă ơm kis tơm bơh bơr bal, ală cau ờ niam iơh bơsak rơ̆p gơtìp lơh glài, đah kòn bơnus mờ kòn bơnus pal gĭt kờñ gơboh, jơm glòm, dong kờl bal mờ gơ̆p. Tŭ do tàm ƀòn añ den ờ gam geh cau gĭt yal yau tai, ai cau gam kis den să jan kung ờ pràn ngan rau, khi ờ tơl pràn nàng yal jài mờ đơs jài. Ai cau gĭt yal đau den kung gam dùl, bàr nă lơm. Tŭ do, cau sền tivi, iăt jơnau đơs pờ tơlik, sră ƀăo, tơl ală bơta yal tơngĭt gơ kờñ ngan den kung ết ngan cau kờñ iăt, yal jơnau yal yau, mờ cau gĭt yal jơnau yal yau den kung gam ờ uă sơl.

Jat ồng, gah lơh broă geh gơnoar pal lơh nàng prap gàr wơl bơta niam chài bơh yau  jơi bơtiàn kòn cau Jrai đơs bal, mờ jơnau yal yau đơs is, bè lơi?

Ông Rmah Ban: Anih jơnau đơs Việt Nam sùm sền gròi, jòi tơrgùm ală jơnau yal đơs khan, yal jơnau yal yau, nàng rơnàng tơnơ̆ do in iăt mờ prap gàr. Geh cau tus dan nàng geh iăt cau kra yal jơnau yal yau mơya khi ờ gŏ yal, khi đơs là khi ờ gŏ gĭt, digơlan là tài bơh he ờ hềt gĭt đơs mbè lơi. Ờ gŏ di là ai khi in priă jền den khi rơ̆p yal he in iăt ờ, bơta kwơ màng ngan rlau jơh kung gam là nùs nhơm bơh cau jòi tơrgùm dê, dilah gĭt đơs bè lơi den rơ̆p jòi tơrgùm geh lơm. Broă jòi tơrgùm jơnau yal yau là jal mhar ngan, pal lòt tus tàm ală ƀòn lơgar nàng jòi gĭt, jòi tơrgùm, prap gàr, dilah bol he lời lơyài, hŭi tĕ gơ, den bè jŏ jòng bol he rơ̆p ờ gam iăt geh tai jơnau yal yau ờ.

 Ồng geh jơnau đơs lơi sơl mờ anih lơh broă geh gơnoar nàng prap gàr wơl bơta niam chài yal yau kòn cau Jrai dê tàm tơngai tus?

Ông Rmah Ban: Kơ̆p kờñ bơh añ dê den uă ngan, mơya ờ gĭt là gơtùi lơh jơh là ờ. Añ kơlôi bol he lòt jòi tơrgùm jơnau yal khan, yal jơnau yal yau den bol he cih wơl, kŭp săp wơl, in gơ gơs ală pang sră, bol he kung gơtùi cih wơl jơnau yal jăt gùng đơs crih dê, nàng gĭt jơnau yal mơkung gĭt gùng đơs tai sơl, tơl nă cau gơtùi bơsram jăt bal, đơs jơnau yal yau jat gùng đơs dê.

Dăn ưn ngài ồng uă ngan bè dơ̆ tơm bơh bơr do!