Jăt rơndăp broă lơh geh ai, càr Dăk Lăk ai geh gùng dà bơtàu tơnguh lòt nhơl jăt gùng dà broă lơh tơlir, kơl jăp, pơgồp bal mờ prăp gàr ală bơta kwơ niam chài bơh yau, phan geh is niam mờ bơ̆t bơtàu phan lòt nhơl krơi is tiah Tây Nguyên dê. Ală jơi phan tờm geh ai là lòt nhơl niam brê bơnơm, ơm rơlô să, tus bal sền bơta niam chài mpồl bơtiàn, lòt nhơl lơh broă sa suơn sre, lòt nhơl kơphe, lòt nhơl rơwas đềt mềr mờ lòt nhơl pơgồp bal mờ bơta niam chài cing mồng Tây Nguyên.

Tàm pơrjum bơyai, uă cau ala măt đơs là càr Dăk Lăk geh uă bơta pràn krơi is Tây Nguyên dê. Mơya, càr pal sền wơl nền nòn ală bơta lơi gam gơtùi nàng bơtàu tơnguh ndrờm bal; ai lài ală phan geh nùs nhơm niam krơi is. Ồng Phan Bửu Toàn, Phó Chủ tịch Mpồl Lòt nhơl ƀòn dờng Hồ Chí Minh geh jơnau đơs: “Añ kơlôi lài ngan là càr Dăk Lăk pal sền wơl jơh ală phan lơi neh geh mờ gam tàm khà lơi, lơh ngan bơ̆t bơtàu mờ lơh gơs, tơnguh phan hơ̆ nàng he gàr bè ờs tiah hơ̆. Bè, đơs tus kơphe den he đơs tus càr Dăk Lăk, phan kơphe den ờ di ƀuơn bè hơ̆ mờ là dùl bơta niam kis bè kơphe dê, hơ̆ là dùl mpồl lơh bè bơta niam kis bơh kơphe dê, tŭ hơ̆ gơs phan kwơ màng rơlao. Di lah he ờ geh bơta krơi is bơh phan tờm den he pal lơh krơi is bè phan cồng”.

Geh ờ uă jơnau đơs là, lòt nhơl càr Dăk Lăk kung gam uă tiah gơkòl bè phan bơna ờ hềt ndrờm bal, ờ tơl phan geh bơta niam uă, broă lơh drơng ala trồ mang gam ờ pràn mờ ờ geh uă mpồl lơh sa kă bro dờng lơh geh uă bơta. Jăt ồng Đặng Xuân Vũ, Kwang Lam bồ Công ty Lòt nhơl Đăk Việt đơs, broă lơh ờ ndrờm bal bơh ală tiah lòt nhơl tàm càr gam lơh kal ke tus mờ broă lơh gơs ală dơ̆ lòt nhơl gơjăt bal in, gàr jơng cau năc lòt nhơl. “Bơh đah măt tơngai Lik mờ đah măt tơngai Mŭt den broă pơgồp bal ờ hềt ndrờm, den tŭ do gam rah rài, hơ̆ là phan do ờ hềt ndrờm bal, mờ bơta ngài đah bàr tiah do dê gam uă. Den tàng, nàng pơgồp bal do tơrbŏ bal lơh gơs dùl dơ̆ lòt nhơl bal den gam kal ke, di lah tơngai lòt bơh cau năc đah bàr tiah do dê rềp bal rơlao mờ di gơlan là tơnơ̆ do den phan lòt nhơl do geh pơgồp bal rơlao”.

Ồng Lê Phúc Long, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, càr ai geh gùng dà bơtàu tơnguh lòt nhơl jăt gùng dà broă lơh gơguh broă lơh, sền, tơnjŏ tơngai ơm mờ tơnguh khà priă tă bơh cau năc lòt nhơl nàng ala mờ broă mìng tơrgùm tơnguh khà cau năc tus. Bal mờ hơ̆, càr sền kwơ broă pơgồp bal mờ ală tiah jăt gah dà lềng đah Jum tàm Gùl lơgar nàng lơh gơs ală gơl lòt nhơl tơrbŏ bal dà lềng mờ bơnơm. “Tài ală tiah gơkòl den tàng lòt nhơl càr Dăk Lăk gam gơtìp kal ke ờ pràn di lah pơn drờm mờ ală càr gùt dar ndai bè Gia Lai, Khánh Hoà ha là Lâm Đồng dê. Sờh kung neh pơgồp bal mờ ală gah lơh broă nàng yal Anih duh broă Làng bol càr in, geh ală tơngu me gơrềng bal tus Chính phủ, ală bộ, gah lơh broă dà lơgar nàng geh jơnau đơs. Nàng bơtàu tơnguh lòt nhơl den Sờh rơ̆p dan lơh geh jơnau lơh nền tàm pơrjum nàng dong kờl bơtàu tơnguh lòt nhơl mpồl bơtiàn tàm càr dê kung bè ală broă lơh lòt nhơl, bơh tŭ hơ̆ là geh broă dong kờl nàng ală sàh sơnah ƀòn kung bè gah lòt nhơl lơh tàm tơngai tus”.