Wă mờ tơm boh bơr mờ bol hi tàm hìu is tàm thôn Duệ, xã Đinh Lạc, kơnhoàl Di Linh, càr Lâm Đồng, ồng K’Tiếu (71 sơnam) jùt ndang bòr cing kuơ mờ rơndap wơl anih nàng thàn tŭ jơ bơto dròng cing jañ mồng ai dùl mpồl cau kơnòm să là oh kòn cau K’Ho tàm ƀòn in. Ồng pà git, ồng pal lời tŭ tơngai êt rơ hền tàm kàl rlô bơkàng do nàng ală sau in geh jòi git, lơh kwèng mờ sap ntas cing mồng dê.

Ồng K’Tiếu yal, ồng sơn đờm jòi git mờ bơsram bơta chài dròng ală jơnau cing mồng bơh tŭ 14 sơnam. Tŭ hơ̆, tŭ klo tàm ƀòn lơi geh broă lơh chờ, bulah ngài kàr lơi ồng kung lòt tus nàng iat mờ bơsram. Kơnờm geh bơta kờñ gơboh dờng ngan hơ̆ neh dong ồng mhar git loh mờ ngui chài ngan ală sap ntas cing mồng dê. Pơgap mờ do rlau 20 nam, sền gŏ niam chài cing mồng ƀòn he dê gơtìp roh huĭ, ồng neh hòi jà tơl nă cau pơlam tàp, să tờm ồng pơlam tơn, pơgồp bal mờ cau dờng sơnam pờ ơdŭ bơto dròng cing jañ mồng ai kòn sau tàm xã in: “Ală ngai sơn rờp kung kal ke ngan tài ờ geh cau lơi sền gròi. Cau mìng git nhơl tàm internet, nhơl game tơl bơta den tàng ờ huan geh cau gròi sền tus cing mồng. Tàm ƀòn kung ờ geh cau lơi git dròng cing jañ mồng bè lơi gơ in di. Bè hơ̆ den tàng he pal mblàng lơh loh, pal lòt hòi jà, đơs wơl kah yau bơh cing mồng dê. Añ gam gơn kơnờm ngan tàm ală sau ơdŭ 7, ơdŭ 8 tài añ bơto bol khi in den bol khi git mhar ngan, ai cau dờng sơnam den git lơyài rlau. Kung gam tơrgùm bơto kòn sau in tàm kàl rlô bơkang do, tŭ ru den hòi jà tai ală cau tàm ơdŭ yau tus tàp wơl pah nhai 2, 3 dơ̆ nàng ờ huĭ, dilah ờ tàp den rơp huĭ jơh”.

Mờ bơta kơ̆ dơn, jơh nùs bơto wơl bơh ồng K’Tiếu dê, tus tŭ do, xã Đinh Lạc, kơnhoàl Di Linh neh geh rlau 200 nă cau git chài ngan dròng cing jañ mồng, tàm hơ̆ geh rlau 30 nă cau là cau tàm mpồl cing mồng tàm xã. Jat ồng M Hiu Nguyên, Ƀí thư Ci ƀộ thôn Duệ, xã Đinh Lạc pà git, bơh bơta jơh nùs ồng K’Tiếu dê neh mblàng wơl bơta kờñ gơboh, lơh cau K’Ho tàm do bal mờ gơp pơn đơl pràn bơsram, ngui niam phan kuơ lời wơl niam chài cing mồng jơi bơtiàn kòn cau dê, tàm hơ̆ geh să tờm ồng. Ồng M Hiu Nguyên pà git, jơh 3 nă cau tàm hìu bơnhă geh ồng, pơ ùr mờ kòn ùr ndrờm dơ̆ dùl dơ̆ geh tus bal ală ơdŭ bơsram dròng cing jañ mồng bơh ồng K’Tiếu bơto: “Ồng neh bơto jơh nùs ngan. Bol hi sền gŏ bơta hơ̆ mờ pơn đơl pràn bơsram gơ in niam nàng gơtùi git jơh ală jơnau cing. Ală kơnòm bơsram kâp 2, kâp 3, tàm hơ̆ geh kòn ùr añ, bal mờ pơ ùr añ dê kung lòt bơsram sơl. Tơnơ̆ do, tă pơgồp dùl bơnah nàng sền gàr, prap gàr wơl bơta niam chài krơi is bơh cau K’Ho he dê, nàng sap cing mồng ờ gơtìp roh huĭ jat tŭ tơngai”.

Jat ồng Trương Quốc Phương, Phó Củ tịc Ủy ƀan Ñân zân xã Đinh Lạc yal, kơnờm bơta tă pơgồp ờ git glar bòl bơh ồng K’Tiếu dê, pah nam, ală ơdŭ bơto dròng cing jañ mồng tàm xã sùm geh gàr niam. Bơh hơ̆, ală broă lơh chờ, lơh yàng bơh yau bè lơh yàng hòi mìu, lơh yàng ñô lir boong, ală jơnau dròng cing jañ mồng, tamya xoang, yal yau… gơ jat bal mờ broă lơh tàp pràn să jan, trŭ gơm phan sa bơh yau bơh kòn cau ơm kis bơh jŏ tàm ƀòn lơgar dê neh rơhời geh lơh wơl. Tàm 2 nam pơn jat sùm, 2018 mờ 2019, xã Đinh Lạc neh bơyai lơh is geh cồng nha 2 dơ̆ tìp mat lơh kwèng niam chài cing mồng mờ jơh ală xã, thị trấn tàm kơnhoàl. Ală cồng nha do geh bơta tă pơgồp kuơmàng ngan bơh ồng K’Tiếu dê. Ồng Trương Quốc Phương đơs: “Ồng K’Tiếu là dùl nă cau geh bơngă pin dờn tàm ƀòn lơgar, geh tă pơgồp uă ngan ai broă prap gàr ù tiah niam chài cing mồng Tây Nguyên in. Uă ngan ơdŭ bơto dròng cing jañ mồng tàm xã geh pờ, den tàng gơnoar broă ồng dê là kuơmàng ngan. Ồng là cau ờ mìng bơto bơtê, là cau mblàng wơl bơta kờñ gơboh mờ gam là cau lòt mblàng yal, hòi jà ală rơnàng cau tus bal, là cau jơh nùs ai cing mồng bơto tàm hìu bơsram. Đinh Lạc kung neh geh gùng dà là pơn jat tai sền gàr 2, 3 bơta niam chài bơh yau bè phan soh kòn cau, ƀòn ƀĕ tơrnờm, ƀòn tàñ phan mờ gle đơr. Do là broă ƀuơn ngan tài geh bơta pơgồp bal đah ù tiah niam chài cing mồng mờ ală ƀòn lơh broă, geh tŭ niam nàng làng bol in tơnguh priă jền lơh geh”.

Mờ bơta tă pơgồp jơh nùs he dê tàm broă prap gàr ù tiah niam chài cing mồng, ală nam do, ồng K’Tiếu neh dờp geh uă ngan ƀằng khen bơh kơnhoàl Di Linh mờ càr Lâm Đồng dê. Kuơmàng, tàm nam 2022, ồng K’Tiếu pơn iờ să ngan geh Củ tịc lơgar jàu pà khà jờng Nghệ ñân ưu tú tài geh tă pơgồp jak ngan tàm broă sền gàr mờ ngui niam bơta kuơ niam chài ờ di phan bơna bơh jơi bơtiàn kòn cau dê. Bơdìh hơ̆ tai, Nghệ ñân ưu tú ồng K’Tiếu là dùl tàm 31 nă cau dùl nă să pa geh Thủ tướng Cíñ phủ geh kơrnuat pà Ƀằng khen tài geh cồng nha jak ngan tàm srơh tàm pơrlòng kờñ gơboh dà lơgar; là cau pơn rơ gơuh jak bơh càr Lâm Đồng dê geh yal tơnggit tus bal pơrjum jờng rơ cau pơn rơ gơguh jak gùt lơgar di tơngkah 75 nam Ngai Củ tịc Hồ Chí Minh tơlik jơnau hòi jà tàm pơrlòng kờñ gơboh dà lơgar (11/6/1948- 11/6/2023)