Ală ngai lồi sơnam, làng bol kòn cau Bahnar tàm ƀòn Mơ Hra, xã Kông Lơng Khơng, kơnhoàl Kbang, càr Gia Lai chờ hờp chờ hờñ ñŏ nhơl wă rò mpồl cau năc bơh Hà Nội lòt còp. Năc lòt nhơl gơlơh chờ hờp chờ hờn kờñ ngan sa piang prùh tàm ding lơbơn ƀô bơkah ngan, iar buh sa bơkah krơi is ngan mờ drăp tơrnờm kañ nha ƀô thồm ngan; chờ chờr bal mờ săp ntas nggồr nggàc bơh cing mồng dê. Bi Lê Thị Phương, năc lòt nhơl tus bơh Hà Nội, pà gĭt: Do là dơ̆ sơnrờp añ tus Gia Lai, kung là dơ̆ sơnrờp añ geh sền gŏ tơn mờ măt tờm cing mồng Tây Nguyên. Mờ ngan là geh ală bơyô dềt tus bal lơh, gơlơh niam ngan mờ gơkờñ ngan, dồ jơnau gŏ gơlơh lơngăp lơngai mờ niam ngan tàm bồ tơngoh.

Bal mờ ƀòn Mơ Hra, xã Kông Lơng Khơng, kơnhoàl Kbang, càr Gia Lai neh lơh ală ƀòn lòt nhơl mpồl bơtiàn bơh kòn cau Bahnar dê, geh: Kdang (xã Kông Lơng Khơng), Stơr (xã Tơ Tung), Kon Bông (xã Đak Rong) mờ Chiêng (ƀòn drà dềt Kbang). Kra ƀòn Đinh Mưnh, ơm tàm ƀòn Mơ Hra, xã Kông Lơng Khơng, pà gĭt: Bol hi rơcăng homestay là hìu rơng nàng ai năc in bĭc, hìu bơnhă rơ̆p trŭ gơm biăp piang jăt bơhiàn ờs mờng bơh he dê là mờ phe kòi mìr, ka kŭp tàm croh dà, drăp tơrnờm ai năc in ñô, đơs crih tamya là khi chờ hờp. Khi kờñ ngan. Năc tus den bĭc tàm hìu lơi kung di lơm. Añ là kra ƀòn, añ geh kơnòl bal mờ làng bol mờ pal lơh ngan.

Bi Trần Thị Bích Ngọc, kông cưk Anih duh broă Làng bol xã Kông Lơng Khơng, kơnhoàl Kbang pà gĭt, broă lơh prăp gàr niam chài bơh yau bơh ù tiah tus bơhiàn mờng kwèng bơh yau geh sền gròi nàng dong làng bol lơh broă lòt nhơl kơ̆ kơl jăp. Bi Trần Thị Bích Ngọc, đơs: Bơh broă lơh broă lòt nhơl mpồl bơtiàn den ală bơta phan lời wơl den kung geh làng bol lơh wơl sơl bè cing mồng, tàñ phan, tàñ ồi. Làng bol lơh ngan nàng prăp gàr ngui niam bơta kwơ niam chài mơkung là nàng bơtàu tơngguh lòt nhơl nàng gơhòi gơ jà geh năc lòt nhơl. Bơh hơ̆ den rơ̆p pơgồp bơnah geh tai priă jền ai làng bol tàm ƀòn in.

Ờ mìng is ală ƀòn lơh broă lơh lòt nhơl lơm mờ tàm ală xã geh gal làng bol jơi bơtiàn dồ êt nă cau, broă lơh prăp gàr niam chài wèt tus lơh broă lơh lòt nhơl kơ̆ kơl jăp kung gam geh lam lơh sơl. Ồng Trần Xuân Nam, Củ tịc Anih duh broă Làng bol xã Lơ Ku, kơnhoàl Kbang, càr Gia Lai, pà git: Ală ƀòn geh bơta rơcăng lài, prăp gàr sền gàr niam chài bơh kòn cau Bahnar dê. Bal mờ hơ̆ bol hi rề ơnàng lơh uă bàr pe bơta niam chài bơh làng bol jơi bơtiàn dồ êt nă cau bơh tiah đah Tô dà lơgar dê bè Mông, Tày nàng niam bơnĕ krơi is rlau niam chài tàm ù tiah do. Is ồn tàm dơ̆ sa tềp, xã bơyai lơh pơrjum chờ sơnam pa, gơhòi gơ jà ală ƀòn Bahnar tus bal lơh ală jơnau dròng cing mồng. Den tàng bè hơ̆, bàr pe ƀòn tàm tiah do neh geh bơta gĭt wă sền gàr, prăp gàr bơta niam chài.

Bơh nam 2022, kơnhoàl Kbang bơcri priă mờr 4 tơmàn đong lam lơh Ală jơnau neh lơh nền prăp gàr mờ ngui niam bơta kwơ niam chài ờs mờng bơh yau ală jơi bơtiàn dồ êt nă cau gơ jăt bal mờ bơtàu tơngguh lòt nhơl tơngai bơh nam 2021- 2025. Ồng Đinh Đình Chi, Kwang ătbồ Cơldŭ Niam chài Yal tơnggĭt jơnau kơnhoàl Kbang, càr Gia Lai pà gĭt, kơnhoàl kung pơgồp bal uă bơta pràn nàng dong làng bol prăp gàr bơta niam chài, lơh geh broă lơh broă sa kơ̆ kơl jăp rài kis. Ồng Đinh Đình Chí, đơs: Lài ngan là bơcri priă lơh phan bơna, dơ̆ bàr tai là prăp gàr ngui niam geh bơta kwơ bơh ală phan lời wơl niam chài cau tiah do dê tàm tơrbŏ bal mờ ală tiah bal mờ gơ̆p lơh geh dồ gơl gùng lòt nhơl nàng lam năc lòt tus. Mờ tŭ năc neh tus rao den tàp ai làng bol in bơh sơnrờp geh bơta gĭt wă geh broă rơndăp lơh, lơh geh broă lơh broă sa; bơh chờm ai phan lời wơl nàng lơh bơnàng jă nàng bơtàu tơngguh lòt nhơl mờ kung ai lòt nhơl nàng ròng wơl phan lời wơl mờ lơh geh broă lơh broă sa ai làng bol in.