Cau lơh yàng duh khoai ồng Y Phi Mjâo, tàm ƀòn A1, sàh Ea Sup, càr Dăk Lăk pà git, jăt bơhiàn bơh yau, tơnơ̆ mờ tŭ kàl lơh sa geh tơnhào jơh, ală cau tàm ƀòn bơyai lơh ñô sa duh khoai. Broă ñô sa do ai tơngŏ nùs nhơm git ưn ngài bè cồng nha tàm dùl nam neh lơh broă, răc dan kờñ dùl nam pa lơngăp lơngai, phan tam geh hờn gơs niam, kàl lơh sa geh tơnhào uă, làng bol pràn kơl dang, tam klăc bal. Tàm nùs nhơm kòn cau Jrai dê, ală yàng sùm geh mờ dong kờl ƀòn lơgar, tàm hơ̆ uă ngan là yàng dà, yàng brê. Bŭ lah uă bơhiàn lài do neh geh rơwah jăt mờ tơngai, broă lơh yàng duh khoai kung bè hơ̆ sơl, kung gam prăp gàr, bè dùl broă lơh tơrbŏ bal đah kòn bơnus mờ ù, mờ brê, ai tơngŏ nùs nhơm git ưn ngài mờ pin dờn là yàng pà bơta bơtoah ai ƀòn lơgar in lơngăp lơngai, phan tam hòn gơs niam.

Cau lơh yàng duh khoai ồng Y Phi Mjâo đơs: “Duh khoai yàng ƀòn nàng răc dan ƀòn lơgar in geh lơngăp lơngai, làng bol pràn kơl dang. Tơnơ̆ mờ duh khoai yàng ƀòn den bol añ lơh yàng duh khoai yàng dà, duh khoai Khẩu hó nàng phan ròng bè sur, rơpu, kơnrồ deh uă kòn, bañ gơtìp kòp, lơh yàng do bol añ lơh jăt cau Lào dê. Bol añ lơh yàng duh khoai yàng ƀòn nàng jơh ală cau ndrờm chờ hờp”.

Lài mờ tŭ bơyai lơh yàng, kra ƀòn rơ̆p bơyai lơh pơrjum ƀòn nàng tam pà broă lơh. Ală klao pơnu pràn kơl dang rơ̆p mŭt tàm brê nàng sreh kơrlô, gle, đơr nàng lơh gơnơng. Tờm gơnơng geh sền bè anih tơrbŏ bal nùs nhơm pin dờn, dong kờl làng bol đềt mềr rơlao mờ ală yàng. Tàm tŭ hơ̆, cau ùr tàm hìu piah kòi, ƀĕ tơrnờm mờ rơcang tơl ală phan sa ờs mờng. Bi Y Nô Ksơr, tàm ƀòn A1, sàh Ea Sup, càr Dăk Lăk pà git: “Bồ nam bol añ mờng bơyai lơh lơh yàng duh khoai yàng dà dờng, yàng bơnơm, duh khoai Khẩu hó. Tàm ngai 29 satềp, hơ̆ là tŭ tam jào sơnam, bol añ rơ̆p lơh. Ngai do jơh ală ƀòn tơrgùm bal tàm do, tàm do den geh ƀòn A1, A2 lơh bal, pah nam ndrờm lơh sùm”.

Tơnơ̆ mờ tŭ duh khoai yàng ƀòn, làng bol tàm ƀòn pơn jăt tai jà dùl nă cau chài duh khoai lơh yàng duh khoai yàng dà. Lơh yàng duh khoai geh boyai lơh tềng dà mbòr, do là anih pơgồp bal mờ rài kis bơh mpồl bơtiàn dê. Tàm broă lơh yàng duh khoai do geh bơyai lơh kơ̆t che brài tềng ngko tê ai kra ƀòn in, do là dùl broă lơh nàng kờñ răc dan lơngăp lơngai, pràn kơl dang, sền gàr mờ tam klăc bal mpồl bơtiàn.

Jăt ồng Y Duk Sơr, cau kis tàm ƀòn B1, sàh Ea Sup, càr Dăk Lăk yal, do là broă lơh yàng pal geh lơh sùm tàm rài kis pin dờn kòn cau Jrai dê, ai tơngŏ broă pơgồp bal niam mờ ù tiah geh is, mờ nting bơto oh kòn, kòn sao in git gàr dà, ù tiah bal mờ brê bơnơm. “Lơh yàng duh khoai yàng ƀòn, răc dan kờñ geh mìu nhàc niam, kàl lơh sa geh tơnhào uă, kòi bềng bong, tơl sa, tơl soh, cau tàm hìu nhă pràn kơl dang, bơtoah sùm gùt nam, phan pơdơng yàng mờng geh là rơpu. Gam lơh yàng duh khoai yàng dà mờng geh lơh mờ sur, nàng ală cau tàm hìu ndrờm geh rài kis hờm ram, oh kòn gal tơl, hìu nhă gal cau, ờ geh cau lơi gơtìp jơgloh rơƀah. Nàng rơcang ai broă lơh yàng duh khoai in den geh phan lơi he cèng phan hơ̆, cau geh phe cèng phe, cau geh iar cèng iar, cau geh tơrnờm cèng tơrnờm, jơh ală làng bol tàm ƀòn tus bal jơh nàng lơh yàng chờ gờm nam pa, gờm kàl lơh sa pa”.

Lơh yàng duh khoai bồ nam pa làng bol kòn cau Jrai dê ờ mìng là broă lơh jăt nùs nhơm pin dờn mờ gam là dơ̆ nàng ală cau tàm ƀòn tìp bal, pơgồp bal nùs nhơm niam ƀòn lơgar dê. Ală bơhiàn ờs mờng rài yau geh prăp gàr mờ tam gơl di pal, dong kờl rơnàng kơnòm să in git wă bè bơta kwơ niam chài ờs mờng, mờ pơgồp bal mpồl bơtiàn tàm rài kis pa.