Tus bal broă lơh yal tơnggit niam chài phan sa ală jơi bơtiàn tiah Tây Nguyên geh ală mpồl cau chài bơh 4 tàm 5 càr geh: Kon Tum, Gia Lai, Dăk Lăk mờ Lâm Đồng.

Mờ broă trŭ gơm is dùl sơlàu phan sa ờs mờng, ală mpồl cau chài bơh 4 mpồl dê neh yal tơnggit ală bơta phan sa, dà hùc krơi is ngan kòn cau he dê. Mờ rlau 10 bơta phan sa tàm tơl sơlàu piang, làng bol mờ nac lòt nhơl neh geh sa, sền git ală phan sa ờs mờng bơh cau K’Ho dê tàm càr Lâm Đồng tus cau Jeh Triêng dê tàm càr Kon Tum. Bơta krơi is là phan nàng trŭ gơm ală phan sa tờm ngan tàm sơlàu piang geh ală cau chài rơcang lài wil tơl ngan mờ uă ngan là phan geh is lơm. Bơdìh mờ ală phan sa, dà hùc ờs mờng bè piang prùh tàm ding đơr, iar buh, tơrnờm… 2, 3 mpồl cau chài gam pin dờn, pơn iờ să ngan yal ală phan sa pa geh trŭ gơm bơh ală phan OCOP bơh làng bol ală thôn ƀòn dê lơh gơs.