Mang ngai 21/04 tàm Ƀlàng dờng Hùng Vương, ƀòn dờng Việt Trì, càr Phú Thọ pơgồp bal mờ Ƀộ Văn hoá, Thể thao mờ Zu lịc bơyai lơh Dơ̆ sơnđờm mŭt lơh Dơ̆ lơh chờ Hìu duh khuai Bơtau Hùng, Tơngleh Niam chài- Lòt nhơl ƀòn yau dà lơgar dê nam 2023; Pơrlòng gùt lơgar phan lời wơl niam chài ờ di mờ phan bơna geh UNESCO cih mat mờ Tơngkah kir sơnrai 20 nam lơh jăt Kông ươk nam 2003 bơh UNESCO dê.

Đơs tàm dơ̆ sơnđờm mŭt lơh, Phó Thủ tướng ồng Trần Hồng Hà đơs loh, sền gàr, bơ̆t bơtàu mờ bơtàu tơnguh ală bơta kwơ niam chài jơi bơtiàn dê là broă kis gơs, bè Tổng Ƀí thư ồng Nguyễn Phú Trọng neh đơs sùm jơnau đơs bơh cau lài do dê tàm Pơrjum Niam chài gùt lơgar nam 2021: “Niam chài gam den jơi bơtiàn gam”. Mờ 15 phan lời wơl ờ di mờ phan bơna neh geh UNESCO cih mat, Việt Nam là dùl tàm khà ală dà lơgar pas sơm ngan phan kwơ niam chài mpồl bơtiàn niam bơnĕ krơi is ngan tàm dunia. Tơnơ̆ bơnah sơnđờm mŭt lơh neh lơh broă lơh đơs crih tam ya bal mờ tơngume “Ndu tàm nggu rơyas- Ƀòn yau dà lơgar Bơtau Hùng Vương dê”. Broă lơh geh 3 bơnah: Ndu tàm nggu rơyas- Ƀòn yau Dà lơgar Bơtau Hùng dê, Niam ngan phan lời wơl mờ Kơ̆p kờñ ngan Lạc Hồng.