Tờm prìt là phan tam mờng kwèng ngan gơwèt mờ bol he mờ jat bơta bơceh lơh bơh tơl tiah dê tờm prìt geh trŭ gơm gơ gơs ală phan sa bơkah pơn rơ. Phan sa poăc iar bơrlŭ bal mờ gòl prìt brê geh bơh lài do tàm mpồl bơtiàn kòn cau Rơđê dê. Do kung là dùl phan sa geh bơh rài kis rềp mềl mờ brê bơnơm. Jat bơta mờng chài ồng mò dê lời wơl,  bơh să tờm prìt, bùm, plai halà đo ju, kòn cau Rơđê trŭ gơm gơ gơs uă phan sa bơkah, krơi is ngan. Kòn cau Rơđê geh ală phan sa trŭ gơm bơh đo ju trŭ gơm gơ gơs gòih halà gơm bal mờ blơn bơtang. Phan sa do sùm trŭ gơm ờ kal ke mờ ƀuơn ngan gơm. Ngan là geh phan sa poăc iar bơrlŭ bal mờ gòl prìt brê sùm geh lơh kal ke rlau, sồr cau trŭ gơm pal chài ngan tàm broă tĕ phan tĕ, mờ kwơ màng là lơh bè lơi nàng gòl prìt in kung gam gàr geh dà niam mờ bơta bơkah ngan. Nàng geh dùl phan sa gòih bơkah, kòn cau Rơđê sùm koh tờm prìt brê rềp dà, să tờm prìt tơnơ̆ tŭ koh rơ̆p geh plồ tă jơh kơmhò đah bơdìh.

Bi H’Lyna Niê, ơm tàm ƀòn Sah B, xã Ea Tul, kơnhoàl Cư̆ Mgar, càr Dăk Lăk pà gĭt, bơh lài do kòn cau Rơđê đơs là tờm prìt geh uă dà mờ bơta niam ai să jan in, neh geh uă ngan phan sa geh trŭ gơm bơh tờm prìt bè gơm biăp pài, gơm bal mờ blơn bơtang, halà sa ris... Ai phan sa poăc iar bơrlŭ bal mờ gòl prìt brê geh sền bè là dùl phan sa bơkah pơn rơ bơh ƀòn lơgar dê. Bi H’Lyna Niê, đơs: “Phan sa bơrlŭ bal pal geh tơl ală phan tĕ hơ̆ sồng bơkah. Poăc iar buh sin, gam nđar iar koh ai poăc mờ tơrcoh lề. Tơnơ̆ hơ̆ păt jơh dà tàm gòl prìt. Broă pơn jat tai là ƀŏ mrĕ, tĕ tai ală phan tĕ bè boh, ƀòk ngòk, hàñ kòn cau, nha bô lò. Phan sa do bơkah ngan”.

Phan sa do sùm sa bal mờ piang duh, halà sa gời. Bơta lơngồt bơh gòl prìt dê tàm bơrlŭ bal mờ dùl ết hòi bơh mrĕ brê. Phan sa poăc iar bơrlŭ bal mờ gòl prìt bơh kòn cau Rơđê dê krơi mờ phan sa poăc iar bơrlŭ bal mờ gòl prìt bơh bàr pe tiah dê tài bơh geh tai bơta bô bơkah bơh nha bô lò, hàñ kòn cau mờ bơta bơkah bơh khoah phòng dê cèng wơl lơh gơ kah ngan ai năc lòt nhơl in. Bulah rài kis geh uă tam gơl, bơta geh bơh uă phan trŭ gơm pa lơh lila rlau tai tàm phan sa bơh kòn cau Rơđê dê. Mơya, phan sa poăc iar bơrlŭ bal mờ gòl prìt brê kung là phan sa rềp mềl, gơ gơs phan sa kờñ ngan tàm broă trŭ gơm phan sa bơh uă hìu bơnhă kòn cau Rơđê dê.

Bi H’Lyna Niê, ơm tàm ƀòn Sah B, xã Ea Tul, kơnhoàl Cư̆ Mgar, càr Dăk Lăk pà gĭt tai, tŭ do uă hìu bơnhă gam tam tờm prìt brê tàm suơn hìu he dê nàng ƀuơn trŭ gơm ală phan sa ai hìu bơnhă in. Do là phan sa sùm geh tàm ală ngai chờ hờp hìu bơnhă mờ ƀòn lơgar tài bơh phan trŭ gơm neh geh lài, ƀuơn trŭ gơm mờ lơh pràn să jan. Bi H’Lyna Niê, đơs:“Phan sa do ờ gơtùi ờ geh tàm ƀòn lơgar ờ. Pah dơ̆ hìu lơi geh jơnau chờ hờp, muăt jrùm halà tŭ năc, oh mi tus còp bal, kòn cau Rơđê sùm lơh iar nàng tơngŏ nùs nhơm kờñ gơboh năc, bơta kờñ gơboh gơwèt mờ oh mi. Tŭ hơ̆, bơnah jơng iar halà nđar iar lơh ală phan sa krơi is, ờ lời tĕ ờ. Tŭ trŭ gơm tă jơh ntìng den cau kra kơnòm dềt ndrờm gơtùi sa lơm”.

Phan sa poăc iar tàm bơrlŭ bal mờ gòl prìt brê bơh kòn cau Rơđê dê ƀuơn trŭ gơm, phan sa brê bơnơm mờ ngan ngồn bè ală kòn bơnus bơh ƀòn lơgar dê lơh cau lơi neh dùl dơ̆ sa rơ̆p kah sùm.