Mờ tơngu me “Tơrbŏ bal niam chài”, ràng tơlik rùp yal tus cau sền 100 pang rùp geh ală cau chài kŭp rùp bàr lơgar Việt Nam mờ Hàn Quốc. tàm hơ̆ geh 60 pang rùp bơh ală cau chài lơgar Hàn Quốc yal bè bơta niam ù tiah geh is, bơta niam chài mờ kòn bơnus tiah Kim Chi dê; 40 pang rùp bơh ală cau chài kŭp rùp lơgar Việt Nam tơrgùm uă ngan tàm bơta ù tiah niam bơnĕ, rài kis niam chài bal mờ broă tam gơl bơh ù tiah càr Dăk Lăk đơs is mờ Tây Nguyên đơs bal.

Jăt ồng Hồ Sỹ Minh, Phó Củ tịc Duh broă sùm Mpồl Cau chài Kŭp rùp Việt Nam pà git, ràng tơlik rùp là broă lơh geh kwơ màng ngan tàm mpồl tìp măt git gơ̆p niam chài đah cau chài kŭp rùp bàr lơgar dê, pơgồp bal tàm broă lơh nền nòn rơlao bơta git gơ̆p Tam klăc bal jŏ jòng tơl ală bơta đah lơgar Việt Nam mờ lơgar Hàn Quốc dê. Ràng tơlik rùp nam do ai tơngŏ gơl gùng 5 nam tìp bal đah Mpồl Cau chài kŭp rùp lơgar Việt Nam mờ Mpồl Cau chài Kŭp rùp lơgar Hàn Quốc mờ là ràng tơlik dơ̆ 2 geh bơyai lơh tàm lơgar Việt Nam dê. “Ală rùp bè lơgar Hàn Quốc ai tơngŏ bơta niam chài lơgar Hàn Quốc dê, kung geh ală lơh chờ, kung geh ală jơi bơtiàn mờ ală rùp bè lơgar he kung bè hơ̆ sơl. Den tàng añ kơlôi là dơ̆ ràng tơlik rùp do là dùl dơ̆ tìp măt bal nền nòn rơlao bè niam chài, bè lòt nhơl mờ tàm hơ̆ uă ngan là wă git geh kòn bơnus mờ ù tiah do. Ràng tơlik pơgồp bal lơh bàr lơgar, bàr jơi bơtiàn rềp bal, đềt mềr bal rơlao mờ git wă bal uă rơlao”.

Tiah ràng tơlik rùp geh bơyai lơh tàm ƀlàng Hìu prăp gàr phan kwơ yau càr Dăk Lăk dê, bơdìh mờ Hìu rơng jòng hờ đang kòn cau Rơđê dê, ai geh bơta tơngŏ niam chài krơi is ai broă lơh tìp măt bal in.

Tơnơ̆ mờ dơ̆ sơn đờm lơh, ală cau chài kŭp rùp lơgar Việt Nam mờ lơgar Hàn Quốc rơ̆p tus bal mpồl ală broă bơceh lơh mùl màl, jòi sền rài kis, broă lơh bal mờ bơta niam chài mpồl bơtiàn ală jơi bơtiàn tàm càr Dăk Lăk dê.

Lài mờ hơ̆, bơh ngai 07 nhai 5, mpồl cau chài 2 lơgar neh geh tơngai lòt bơceh rùp tàm mùl màl, pơgồp bal mờ broă lòt nhơl sền tàm ală ù tiah niam bơnĕ pơnrơ ngan tàm ờ uă càr tiah jăt gah dà lềng đah Jum tàm gùl lơgar dê. Ồng Soun Byeong Hyo, Lam bồ mpồl Cau chài Kŭp rùp lơgar Hàn Quốc tơlik nùs nhơm niam bơnĕ uă ngan mờ rùp rài ù tiah bal mờ kòn bơnus tàm lơgar Việt Nam đơs bal mờ càr Dăk Lăk đơs is: “Lòt bal mờ ală cau chài kŭp rùp lơgar Việt Nam tàm ală ngai lòt bơceh rùp den mpồl neh bơceh gơs uă ngan pang rùp niam mờ tŭ cèng rê tus lơgar Hàn Quốc den rơ̆p geh yal tus mờ làng bol lơgar Hàn Quốc bè ală pang rùp do, bè ù tiah niam lơgar Việt Nam, tàm hơ̆ uă ngan là càr Dăk Lăk mờ Buôn Ma Thuột dê. Añ neh tus lơgar Việt Nam uă dơ̆ bloh, tàm hơ̆ geh tus tàm Mù Cang Chải là tiah geh uă ngan pang rùp niam bơnĕ ngan mờ pơn jăt tai là tiah do, tàm Buôn ma Thuột kung geh ală pang rùp niam. Añ rơ̆p pơyoa ală pang rùp hơ̆ rê wơl tàm do tơnơ̆ mờ tŭ rơwah wơl bơh ală rùp tàm dơ̆ lòt do”.