Ală ngai lồi poh, bơh àng drim gờñ, tiah tềl kah yau Gơlăng Nhạn neh geh gal ngan làng bol mờ nac lòt nhơl. Geh cau den lòt jơng tàp pràn să jan, geh cau den chu ñàng, triăng sền halà ñă hơđang bơnơm nàng triăng sền dà dờng Đà Rằng mờ tiah drà Tuy Hòa bơh hơđang. Tàm ù tiah dờng ơnàng, lơngờm, ngềt ngơt, gơlăng yau gơ mpờl mờ gak pơrhê pơn rơ bơh niam chài bơceh lơh hìu đam Chămpa dê. Dùl nă làng bol lòt jơng đơs:

“Tàm do den cau lơi kung kờñ lơm. Ơm rềp ndo den cau lòt tàm do nàng tàp pràn să jan. He ơm ngài den kung sùm lòt ndo sơl, ngai lồi poh, ngai rlô den ală oh mi cau ùr bol hi tàm jà gơp lòt tàp pràn să jan ndo nàng bồ tơngoh gơ prài”.

Jat làng bol tàm do, ù tiah tiơng pơn rơ “Bơnơm Nhạn” mờ Gơlăng Nhạn lài do là tiah ơm kis bơh uă ngan sềm Nhạn dê. Rùp hin mpồl sềm par tŭ trồ mho neh geh ai nàng sơn đan mat gơ in. Gơlăng Nhạn geh lơh tàm pơgap rài 11, bồ rài 12. Do kung là dùl tàm khà dồ êt gơlăng gam gàr sùm broă lơh pin dờn duh khoai Thiên Y A Na.

Gơlăng Nhạn jơnhua mờr 24 thơk, geh sap sèng là tiah tềl kah yau dà lơgar kuơmàng. Ờ mìng cèng bơta kuơ kah yau mờ niam chài lơh hìu đam, tiah do gam gơ jat bal mờ rài kis niam chài, pin dờn bơh làng bol tàm ƀòn lơgar dê bơh uă rơnàng. Ală nam rềp ndo, suơn bal Gơlăng geh lơh niam wơl, rề ơnàng ù tiah gùt dar, lơh gơlik bơta ƀuơn ai làng bol mờ nac lòt nhơl in lòt sền, jòi git. Jat mò Nguyễn Thị Thục Oanh ơm tàm sơnah ƀòn Tuy Hòa, khà nac tus mờ Gơlăng Nhạn ngai sơlơ uă, ngan là tàm kàl rlô bơkang mờ ală dơ̆ lơh chờ:

“Tàm do neh krơi mờ lài uă ngan, geh lơh niam wơl uă, sền gơ lơh niam rlau, wă nac lòt nhơl tus triăng sền. Tàm kàl rlô bơkang den nac gal ngan, kơnòm bơsram rlô bơkang là tàm do sơlơ gal nac rlau, halà tàm ală dơ̆ sa tềp, dơ̆ ơm rlô chờ, rềp mờ ngai duh khoai huềng Mò, ngai duh khoai huềng Mò den gal ngan cau, nac lòt nhơl gah huềng kung uă ngan sơl”.

Anih ndu gơn rơh bal mờ bă tiah ơm tàm nggùl tiah drà kềng gah dà lềng lơh gơlik Gơlăng Nhạn in tềl krơi is gơ wèt mờ nac lòt nhơl tŭ tus mờ tiah đah mat tơngai lik càr Dăk Lăk. Bơh đang bơnơm Nhạn, nac lòt nhơl gơtùi sền jơh gùt tiah drà Tuy Hòa, dà dờng Đà Rằng mờ tiah mpồng dà lềng bơh ngài. Bi Tống Thị Hải Yến, nac lòt nhơl tus bơh càr Phú Thọ đơs:

“Tus ndo den he gŏ bồ tơngoh gơ prài ngan, să jan niam ngan. Anih ndu gơn rơh bè do, tàm nggùl ƀòn dờng kung gal ngan sơl làng bol ơm kis, mơya geh dùl bơta lơi hơ̆ sền gơ lơh king crŭ ngan lơh kòn bơnus gŏ prài bồ tơngoh. Dơ̆ sơn rờp añ sền gŏ dùl broă lơh mờ gơ geh bơh rài 11 tus tŭ do, gơ gam niam ngan, gơlơh bè ndrờm bè bơh chờm tơn, den he gŏ là bơta prap gàr, lơh niam wơl dà lơgar dê là niam ngan”.

Tàm gùng dà bơtàu tơnguh lòt nhơl càr Dăk Lăk dê tơnơ̆ tŭ tơmut bal, tiah đah mat tơngai lik mờ bơta ƀuơn bè dà lềng, phan lời wơl niam chài mờ ù tiah geh is gam geh git nền là ù tiah bơtàu tơnguh lòt nhơl kuơmàng. Tàm hơ̆, Gơlăng Nhạn geh sền là bơta tờm tơrbŏ bal đah lòt nhơl niam chài, lòt nhơl gah huềng mờ triăng sền ù tiah tiah drà kềng gah dà lềng. Mò Trần Thị Bử - Phó Kwang lam bồ drơng kơnòl Mpồl atbồ tiah tềl kah yau, Sờh Niam chài, Tàp pràn să jan mờ Lòt nhơl càr Dăk Lăk pà git:

“Tơnơ̆ tŭ dờp tiah tềl kah yau Gơlăng Nhạn den Mpồl atbồ tiah tềl kah yau rơp lơh niam wơl pơng gàr tềng bồ đap gơlăng nàng gàr niam ờdo ờdă ai nac lòt nhơl in tŭ lòt sền mờ rê wơl hờ ƀòn tờm tàm tiah kah yau. Mpồl atbồ tiah tềl kah yau kung geh broă rơndap lơh là bơyai lơh duh khoai huềng Mò pah nam nàng drơng ală mpồl nac mờ ală cau nă să is kờñ tus chu ñàng dơ̆ duh khoai huềng Mò tàm gơlăng Nhạn in nàng kờñ gơ hòi gơ jà nac lòt nhơl tus ndo”.

Tàm bơta rài kis pa gam ngai sơlơ tam gơl pah ngai tàm tiah drà kềng gah dà lềng, Gơlăng Nhạn kung gam ngềt ngơt gơ mpờl bè dùl tŭ tơngai niam chài, kah yau mờ huềng sộp bơh ù tiah đah mat tơngai lik càr Dăk Lăk dê. Tŭ trồ mho tus tàm bơnơm Nhạn, sền hiòng dà dờng Đà Rằng lip rơlìl àng mat tơngai sòl mờ tiah drà sơnah ƀòn Tuy Hoà àng đèng sòl, Gơlăng Nhạn bè pơn jat tai yal jơnau bè bơta bơrlŭ bal niam chài, bè bơta kis kơ̆ dơn bơh phan lời wơl dê tàm rài kis tŭ do.