Ngai lồi poh, tàm Hìu bơsram Mầm non Hoa Hồng, sàh Ia Dreh, càr Gia Lai, anih gơ klŏ gơ crà ồi àu kòn cau sơlơ niam rlau mờ sap dròng cing jañ mồng. Do là broă lơh sền git broă lơh tàñ ồi kòn cau, tàñ phan mờ gle đơr bơh yau mờ dròng cing jañ mồng bơh cau Jarai dê. Tàm do, ờ mìng ală cau chài, mờ ală pơgru, ală oh dềt ndrờm gơ klŏ gơ crà tàm phan soh kòn cau bal mờ uă bơta krơi is, geh bơceh mai jat uă bơta ồi àu, sơnam. Pơgru Nai H’Tố Trinh, pơgru Hìu bơsram Mầm non Hoa Hồng pơlam ală oh dềt sền mờ geh ală cau chài bơto tơn ală broă tàñ ồi kòn cau dồ bă nền nòn ngan: “Hìu bơsram mầm non bol hi lam lơh ală dơ̆ sền niam chài kòn cau ai ală sau in mờ uă broă lơh bè dròng cing jañ mồng, tàñ phan gle đơr, tàñ ồi kòn cau… Bol hi jà ală cau chài tàñ ồi kòn cau tus yal tơnggit bè ồi kòn cau mờ bơto tơn ală sau in. Là pơgru, bơta kơp kờñ dờng ngan rlau jơh bol hi dê là ală sau geh git bơh gờñ, git bơta kuơ bơh broă tàñ ồi kòn cau dê, là phan niam chài mờ mò pàng neh lời wơl, bơh hơ̆ git ki ngàm, sền dờng màng mờ tàm pơ dờn wơl ală rơnàng tơnơ̆ in”.

Ală cau chài tàñ ồi kòn cau, tàñ phan gle đơr mờ cau chài cing mồng tus bơh ală ƀòn Nông Siu, Bha Nga, ƀòn Blak, sàh Ia Dreh, càr Gia Lai neh dong ală sau dềt geh dùl dơ̆ sền git niam ngan mờ geh kuơ ngan ngồn bè niam chài kòn cau. Mò Nay H’Kông – Kong kơnòl Mpồl tàñ ồi kòn cau ƀòn Nông Siu pơn yờ să ngan tài ồi kòn cau mpồl dê pơn yờ să ngan geh tus bal uă broă niam chài tàm càr, priă tac ồi kòn cau geh rlau 50 tơlak đong, să tờm mò geh Anih duh broă Mặt trận càr Gia Lai pà sră jờng rơ. Mơya bơta kuơmàng rlau là bơh hơ̆ gơtùi yal tơnggit bơta niam chài kòn cau Jarai dê, is ồn là bơto broă bơh yau ai rơnàng kơnòm să in: “Bol hi neh tus bal yal tơnggit broă tàñ ồi kòn cau tàm 3 hìu bơsram mẫu giáo tàm sàh. Tàm do, bol hi ờ mìng ràng tơlik, yal tơnggit ồi kòn cau mờ gam bơto tơn ală sau in ală bơta chài kuơmàng bơh broă tàñ ồi kòn cau dê. Tŭ geh sền gŏ tơn, geh ƀư tê tàm ală blah ồi kòn cau, ală sau kờñ ngan, bơh hơ̆ lơh gơlik bơta kờñ gơboh mờ ồi kòn cau. Bol hi kơp kờñ tŭ dờng, ală sau rơp gơtùi tàñ is ală blah ồi kòn cau bè ală mơi, ală wa lòt lài neh bơto. Bơta kờñ gơboh ală sau dê kung cèng wơl bol hi in uă bơta chờ hờp, tài ală sau rơp là ală cau tàm pơ dờn wơl mờ sền gàr broă bơh yau do”.

Broă lơh sền git niam chài kòn cau tàm sàh Ia Dreh, càr Gia Lai sùm geh gơnoar atbồ mờ ală mpồl bal kờñ ngan. Mò Nguyễn Thị Ly Na – Phó Củ tịc Mpồl tam klac cau ùr sàh Ia Dreh pà git, bơh nam lài, tŭ ờ hềt tơmut bal, Anih duh broă làng bol kơnhoàl Krông Pa (yau) neh lơh nền tơng gơs Mpồl tàñ ồi kòn cau ƀòn Nông Siu mờ 17 nă cau tàm mpồl nàng kờñ prap gàr mờ ngui niam bơta niam chài kòn cau Jarai tàm sàh. Broă lơh bơh mpồl dê ờ mìng cèng wơl priă jền lơh geh ai oh mi cau ùr in mờ gam gơtùi sền gàr bơta niam chài jơi bơtiàn ai rơnàng kơnòm să in tai: “Đah Hìu bơsram mầm non Hoa Hồng jà mpồl cau chài, mpồl tàñ ồi kòn cau rê tàm hìu bơsram nàng yal tơnggit, bơto ală cau kơnòm să in git tus ală phan kòn cau bơh làng bol kòn cau Jarai dê.  Mpồl kung lòt bal mờ oh mi cau ùr tàm ƀòn lơgar, hơ̆ là lơh bè li nàng gơtùi sền gàr bơta niam chài bơh yau kòn cau he dê, kơp kờñ phan he dê geh ală cau git tus boh ală broă lơh tìp mat lơh kwèng niam chài – đơs crih tamya”.

Ală dơ̆ bơsram sền git is ồn tàm Hìu bơsram mầm non Hoa Hồng, sàh Ia Dreh, càr Gia Lai neh lơh hìu bơsram mầm non gơ gơs ù tiah niam chài niam ngan, tiah mờ bơta niam chài kòn cau ờ gơ ơm tàm anih prap ơn tai mờ gơ mpờl gŏ ngan ngồn, gơ rề bơh tơl dang che brài tàñ ồi kòn cau, tơl sap cing mpong ntas.