Dơ̆ pơrlòng neh mùl màl sơn đờm tàm mang òr (14/07), 8 mpồl cau klao mờ 6 mpồl cau ùr geh pơrlòng mpồl jăk ngan bal mờ 2 khà (dùl cau klao, dùl cau ùr) guh khà pơrlòng tàm Dơ̆ pơrlòng nhơl bơlai dà lơgar tàm kàl pơrlòng tus.

Jăt mờ hơ̆, 8 mpồl cau klao là Vĩnh Long, Anih tàp pràn să jan Ling klàng, Quân khu 3, Bến Tre, Trà Vinh, Kwang àng ƀòn dờng Hồ Chí Minh, Quảng Nam mờ Mpồl đơng lam Kảñ sát Kơ động geh bơyai lơh 2 mpồl, pơrlòng bal 1 dơ̆ kờp điểm, ală mpồl pơrlòng geh khà dùl, bàr tơl mpồl geh mŭt dar 4 mpồl pơrlòng, tơnơ̆ mờ hơ̆ rơwah geh 2 mpồl jai pha tàm dar 4 mpồl pơrlòng mŭt dar pơrlòng dŭt ndơl mờ geh guh khà pơrlòng. Tàm tơngu me cau ùr, 6 mpồl là Thái Nguyên, Hà Nội, Hải Dương, Vĩnh Long, Hậu Giang mờ Dăk Lăk geh pơrlòng 1 dar kờp điểm, ală mpồl pơrlòng geh khà dùl, bàr geh pơrlòng dar dŭt ndơl mờ geh guh khà pơrlòng.