Do là nam dơ̆ 05 dơ̆ tàm pơrlòng kơphê bơkah pơn rơ lơgar Việt Nam dê geh bơyai lơh. Tus bal tàm pơrlòng kơphê bơkah pơn rơ lơgar Việt Nam nam do geh 47 mpồl lơh broă bơh 7 càr mờ 84 kơphê tus bal pơrlòng, kờp jơh khà kơphê 157 tấn. Tàm dar pơrlòng lồi dŭt, Mpồl ai điềm pơrlòng neh sac rơwah geh 46 kơphê geh đơs ơm tàm khà 1, 2, 3 kung bè sac rơwah mut tàm mpồl 10 kơphê bơkah pơnr nam 2023 dê.

Ồng Trịnh Đức Minh, Củ tịc Hiệp Hội Kơphê Buôn Ma Thuột, Kwang atbồ mpồl bơyai lơh dơ̆ tàm pơrlòng pà gĭt: dar lồi dŭt geh bơyai lơh bơh ngai 25 tus ngai 28 nhai 04 nam 2023. Bơdìh mờ ală tơngume pơrlòng gam geh bàr pe broă lơh ràng tơlik, drơng kơphê bơkah pơn rơ; ràng tơlik phan bơna, măy mok, măy, sră, phan bơna gah kơphê; ràng tơlik klài kơphê, nhơl ñiŏ geh khà jờng. Ngan là, tơnơ̆ dơ̆ pơrlòng mpồl bơyai lơh rơ̆p lơh jat broă tàm pơrlòng giă bơnah kơphê bơkah pơn rơ bơkah ngan rlau jơh nàng di pal mờ jơnau kờñ tăc bro mờ tơnguh priă lơh geh ai kơphê bơkah pơn rơ bơh lơgar Việt Nam dê.