Nàng kờñ lơh gơrề uă broă lơh mblàng yal sơlơ tơnguh tai ring bal ùr klau tus mờ cau bơsram dờng, ơruh pơnu jơi bơtiàn dồ ết nă cau, mang ngai 2/10, tàm Hìu bơsram Đại họk Tây Nguyên, Mpồl Tam klăc cau ùr Dà lơgar Việt Nam pơgồp bal mờ Ƀộ bơto mờ bơsram bơyai lơh dơ̆ tìp mat lơh kwèng, ràng tơlik bơceh lơh mblàng yal tơnguh uă bơta gĭt wă bè ring bal ùr klau ai ơruh pơnu jơi bơtiàn dồ ết nă cau in.

Tàm broă lơh, cau bơsram dờng jơi bơtiàn dồ ết nă cau bơh 6 hìu bơsram đại họk tàm tiah tàm gùl lơgar mờ Tây Nguyên neh tus bal tìp mat lơh kwèng, ràng tơlik ală jơnau bơceh lơh mờ broă lơh mblàng yal. Mờ ală broă lơh lơh ngan bè jơnau lơh lèo, jơnau nrĭ, hò vè, lơma lơyah, video clip, rùp bơh cau bơsram dờng dê lơh mờ bơyai lơh. Ală dơ̆ bơyai lơh tơrgùm tơngŏ tơngume bè ring bal ùr klau tàm gah bơto bơtê mờ bơsram mờ tàm hìu bơnhă; sền gròi tơnguh uă bơta gĭt wă bè ring bal ùr klau, mblàng yal tơn jơh ală bơhiàn yau bơrngơl gơla tàm mpồl bơtiàn, bơsong ală broă jal mhar gơwèt mờ cau ùr, ơruh pơnu mờ kơnòm dềt.