Tàm 3 ngai bơh ngai 08 tus ngai 10 nhai 09 nam 2023, rơlao 800 nă cau chài, cau pơrlòng tàp pràn să jan, cau đơs crih tamya bơh 11 mpồl ală càr, ƀòn dờng tiah jăt gah dà lềng tàm Gùl lơgar neh pơrlòng ală môn tàp pràn să jan mờ bơnah lơh chờ geh lơh niam bơnĕ mờ geh kwơ ngan.

Ală broă lơh bè: Pơrlòng soh phan ờs mờng; Pơrlòng đơs crih tamya; Yal ràng tơlik phan, yal phan geh lơh krơi is bơh ală jơi bơtiàn kòn cau dê... neh lời wơl bơta niam bơnĕ tàm nùs nhơm gơwèt mờ gal cau tus sền, cau chài, cau lơh pơgăp, cau pơrlòng tàp pràn să jan mờ cau pơlam jơnau là kòn cau bơh ală càr mờ làng bol kòn cau kis tàm càr Bình Định dê. Bè broă tàp pràn să jan, ală cau pơrlòng neh tàm pơrlòng tàm 4 môn tàp pràn să jan kòn cau mờ jơnau nhơl ơwañ să ờs mờng. Do là ală broă lơh geh gal làng bol ală kòn cau kis tàm Tiah jăt gah dà lềng tàm Gùl lơgar gơboh kờñ ngan, sùm tus bal bơsram tàp, lơh mờ pơrlòng tàm ală ngai chờ niam chài mờ lơh chờ ờs mờng càr, ƀòn dờng dê.