Broă geh mat bơh Anih jơnau đơs Việt Nam tàm anih ràng tơlik tàm dơ̆ Chờ drà ƀăo gùt lơgar nam 2023 mờ tơngume gơ lời wơl, tơrgùm bal “Uă gah- Uă jơnau đơs- lơh broă ờs mờng- pa” neh ngan ngồn gơ hòi gơ jà uă làng bol tus bal.

Uă năc lòt sền tus mờ anih ràng tơlik bơh Anih jơnau đơs Việt Nam dê nàng cùp rùp lời kir sơn rai mờ logo VOV mờ iăt kơno ală jơnau yal, sền ală rùp hin bè bơta dờng pràn mờ bơtàu tơnguh bơh Anih jơnau đơs Việt Nam dê. Anih jơnau đơs Việt Nam là anih lơh ƀăo uă gah tàm hơ̆ geh bal gah pờ tơlik jơnau đơs mờ sơñio rùp bal mờ ƀăo pơ àr mờ ƀăo điện tử, mờ mpồl cau lơh ƀăo, mpồl lơh broă măy mok mờr 2 rơbô 700 nă. Mờ uă jơnau đơs tàm hơ̆ geh 13 jơnau đơs bơh lơgar ndai mờ 13 jơnau đơs kòn cau, Anih jơnau đơs Việt Nam sùm jờng rơ bơta pa, ờs mờng, bơta niam chài mờ bơta bơceh pa nàng drơng tơl nă cau tàm mpồl bơtiàn in.