30 nam do, ală cau lơh ƀău VOV tàm Tây Nguyên ngan ngồn gơ gơs là ală cau ling lam lài tàm gah nùs nhơm niam chài; lơh niam gơnăp gơnoar, kơnòl broă sră ƀău kac màng; là cau mblàng yal gùng dà, broă lơh bơh Đảng, bơta dong kờl mờ adat boh lam bơh dà lơgar dê. Yal tơnggit jơnau sơrbac mhar- di ngan, di tŭ. Mờ kung đơs lah, dră wơl geh bơta gơ hòi gơ jà ngan ală gùng dà tìs, đơs lah tơl kai lơh aniai tus lơngăp lơngai, pơgồp bơnah kuơmàng tàm bơta bơtàu tơnguh bơh Tây Nguyên dê. Ồng Điểu Dũng ơm tàm xã Dăk Ndrung, kơnhoàl Dăk Song, càr Dăk Nông đơs: “Jơnau đơs dà M’nông niam ngan, làng bol kờñ ngan iat. Jơnau đơs ngai sơlơ niam, jơnau đơs lòt bal mờ cau lơh broă sa pơlam làng bol in bơta chài sơngka sền gàr chi tam. Mblàng yal bè broă lơh bơh Đảng, Dà lơgar dê tus mờ làng bol. Añ kơp kờñ jơnau đơs dà M’nông gàr sùm pờ tơlik ală jơnau đơs bè bơto tơngkah kòn sau bơsram sră, bơta chài tam tiêu, kơphe,… làng bol kờñ ngan iat”.

Mò Ka Lót, cau Mạ ơm tàm xã Lộc Bắc, kơnhoàl Bảo Lâm, càr Lâm Đồng là dùl nă cau kờñ ngan iat Anih jơnau đơs Việt Nam mờ dà K’Ho. Iat ală jơnau đơs pơnđik mờ dà kòn cau he dê, mò Ka Lót gơ lơh ngoh rơngac ngan. Là kwang bàng lơh broă tàm ƀòn lơgar, mò git loh bơta kuơ bơh dà đơs kòn cau he dê ờ mìng tàm broă tơm boh bơr ờs mờng mờ gam tàm broă mờng chài pah ngai tai. Kơnờm sùm iat ală jơnau đơs mờ dà K’Ho bơh anih jơnau đơs Việt Nam dê mờ mò Ka Lót sơlơ geh tai bơta git wă bè niam chài bơh yau kòn cau he dê: “Să tờm añ kờñ ngan iat ală jơnau đơs loong, ală jơnau pơnđik kòn cau he dê, mơya să tờm añ dê đơs ờ loh dà kòn cau mờ ờ git đơs pơnđik… añ là dùl nă cau kờñ ngan iat Rơdiô. Đảng, Dà lơgar neh sền gròi ai dà K’Ho pờ tơlik tàm Anih jơnau đơs Việt Nam, añ chờ hờp ngan”.

Ồng Ha Hiếu, kòn cau K’Ho lơh broă tàm Anih tờm niam chài yal jơnau tơnggit mờ tàp pràn să jan kơnhoàl Dam Rong, càr Lâm Đồng pà git, ồng lơh cau cih ƀău ndang, sền sơ wì jơnau đơs, mblàng mờ đơs ală jơnau đơs dà K’Ho ndang. Bơdìh mờ broă lơh gơlik jơnau đơs tơn, Anih pờ tơlik jơnau đơs sơñio rùp kơnhoàl gam pờ tơlik jơnau đơs bơh Anih pờ tơlik jơnau đơs sơñio rùp càr Lâm Đồng mờ Jơnau đơs dà K’Ho bơh Anih jơnau đơs Việt Nam lơh broă sùm tàm tiah Tây Nguyên dê lơh gơlik tai. Kơnờm bơh hơ̆, cau K’Ho tàm kơnhoàl tiah ngài Dam Rong geh git jơnau yal li la mờ ngan ngồn: “Lài do, añ lơh broă tàm cơldŭ nội vụ, tơnơ̆ hơ̆ añ ntrờn lơh broă tàm cơldŭ jơi bơtiàn. Tus lồi nam 2018, añ lơh broă tàm Anih pờ tơlik jơnau đơs sơñio rùp kơnhoàl Đam Rong. Broă pah ngai añ dê là mblàng bơh dà Yoan gơs dà K’Ho. Tơnơ̆ hơ̆ den đơs mờ dà K’Ho. Ală jơnau đơs geh lơh tàm do den geh tơngume gơ rềng tus lơh sa, bơtàu tơnguh lơh sa hìu bơnhă, bơta sền gàr tiah ơm kis tàm thôn ƀòn, broă bơsram sră bơh oh kòn tàm ƀòn lơgar dê”.

30 nam do, Anih lơh broă sùm tàm tiah Tây Nguyên neh sơrlèt gan git nđờ kal ke nàng lơh gơs jak ngan kơnòl broă. Bơh broă yal tơnggit, mblàng yal wil tơl, di tŭ rjô ơnàng, di mờ gùng dà ai tơlik lài ală broă cíñ trị, lơh sa mpồl bơitàn, bơta lơngăp lơngai, sền gàr dà lơgar gơlik geh tàm jơh gùt tiah do tus mờ bơyô iat rơdiô, cau sền mờ cau iat tàm lơgar mờ lơgar ndai. Anih lơh broă sùm tàm tiah Tây Nguyên neh pơgồp bơnah uă ngan tàm broă sơlơ tơnguh cồng nha ai broă bơt bơtàu mpồl tam klac dờng jơh gùt làng bol, ai broă lơh bơtàu tơnguh, brồ guh bơh tiah Tây Nguyên dê.