Làng bol mờ gơp bơyô gam iat sap đơs Eirei bơh Nghệ ñân ồng Y Nguk Niê dê. Jơnau pơnđik geh tơngume jờng rơ ƀòn lơgar niam bơnĕ, lơh cau iat sơlơ pin dờn, kờñ gơboh rài kis, nting tơngkah làng bol git ki ngàm, sền gàr chi brê, dà mbòr ƀòn dê.

Bơdìh mờ ală jơnau pơnđik bè ƀòn lơgar, dà lơgar, nghệ ñân ồng Y Nguk Niê gam git đơs uă jơnau pơnđik tàm sơrbŏ bơr kờñ gơboh ùr klau, jơnau nting tơngkah kòn sau tryăng tryồng bơsram sră nàng tơnơ̆ do pơgồp bơnah bơt bơtàu ƀòn lơgar pas sơm, niam bơnĕ rlau.

Nghệ ñân ồng Y Nguk Niê deh mờ dờng tàm dùl hìu bơnhă geh ồng mò, mè bèp ndrờm là ală cau git đơs pơnđik. Bơh tŭ gam dềt, sap đơs pơnđik tŭ gơguh, tŭ gơmù, tŭ rơlĕ, tŭ ndang bơh jơnau pơnđik kòn cau Rơđê dê neh mut tàm bồ tơngoh ồng dê. Pah tŭ lòt jat mè bèp tàm suơn tàm mìr, là ală tŭ geh iat biap uh kơmbuat đing buôt halà đinh năm bal mờ jơnau pơnđik geh đơs niam ngan bè lơh gơ prài bơta glar bòl tàm trồ klò ngai duh rơ ồl.

Ồng Y Nguk Niê yal, ală jơnau pơnđik là bơta pơn jờng dờng ngan ai ồng mờ kòn sau tàm hìu bơnhă in, tài bơh jơnau pơnđik ờ mìng cèng tus bơta chờ hờp să tờm in, cau pròc mhàm tờm in mờ bơh hơ̆ kung là ală jơnau bơto bơtê, nting tơngkah kòn sau pal sùm lơh jat gùng dà bơh Đảng, dà lơgar dê: “Añ git đơs Eirei, git dròng cing. Pah tŭ đơs pơnđik kòn cau Rơđê añ gŏ chờ hờp ngan. Jơnau pơnđik kòn cau Rơđê dê geh đơs Kưt, đơs Eirei. Hơ̆ là ală jơnau pơnđik jờng rơ Đảng, dà lơgar, bañ đòm, bañ iat jơnau pơn jồ bol ờ niam lơh aniai ƀòn lơgar, bơto tơngkah tryăng tryồng lơh broă, bơto tơngkah kòn sau bơsram sră”.

Ờ mìng git đơs uă jơnau pơnđik, ồng Y Nguk gam git uh kơmbuat Đinh năm, mờ là cau tàm mpồl cing mồng xã Cư Mgar, kơnhoàl Cư Mgar dê. Mờ bơta kờñ gơboh, kơp kờñ geh mblàng wơl bơta niam krơi is đơs pơnđik dê ai rơnàng tơnơ̆ do in, ồng Y Nguk bal mờ ală nghệ ñân tàm ƀòn sùm kơ̆ dơn tus bal ală ơdŭ bơto đơs pơnđik, dròng cing tàm ƀòn lơgar. Ồng pà git tai: “Bol hi là ală nghệ ñân dờng sơnam den geh uă ngan bơta kơlôi rơcang. Uă nghệ ñân dờng sơnam neh sang rài, rê mờ mò pàng. Bol hi là ală cau lòt lài ndrờm kơp kờñ geh bơto wơl kòn sau in. Đơs Eirei halà đơs Kưt, dròng cing halà ală bơta đờng goòng ndau, Khat dùl dơ̆ tìp mat đơs crih tamya lơi ƀòn dê, xã dê halà ies ƀồc… bol hi ndrờm tus lơm”.

Kơlôi rơcang bè niam chài kòn cau he dê pơhìn gơtìp roh huĭ, mờ gơnoar broă là cau atbồ ƀòn Huk B neh rlau 25 nam do, ồng Y Nguk sùm pơgồp bal bơto làng bol git sền dờng màng bơta niam chài kòn cau he dê bơh ală dơ̆ pơrjum ƀòn. Mơya nàng gơtùi lơh bơta do den să tờm làng bol pal pơgồp bal bơta pràn, dùl nùs bal nàng sap cing, sap đơs Kưt, đơs Eirei gam mpong ntas sùm ai rơnàng tơnơ̆ don. Ồng Y Nguk pà git tai: “Tŭ do, dà lơgar sền gròi ngan broă làng bol he sền gàr cing mồng, đơs pơnđik, gàr dà đơs kòn cau he dê… Bơta do ai gŏ dà lơgar sền gròi ngan tus làng bol he. Bañ huĭ bơhiàn bơh yau cau Rơđê he dê. Bol he pal bơto wơl kòn sau in, ngan là ală sau bơh 7 tus 8 sơnam bơh ală nghệ ñân bè bol hi”.

Ngềt ngơt mờ kờñ gơboh, nùs nhơm geh kơnòl, nghệ ñân ồng Y Nguk niê ơm tàm ƀòn Huk B, xã Cư Mgar, kơnhoàl Cư Mgar, càr Dăk Lăk gam ngai pah ngai dong làng bol git sền dờng màng gùng đơs pơnđik niam ngan, sap uh kơmbuat đinh buôt rơlĕ rơlùn, sap dròng cing duh hồl… Kơnờm geh ală cau jơh nùs mờ niam chài kòn cau bè nghệ ñân ồng Y Nguk Niê neh pơgồp bơnah sền gàr, lơh gơ rề uă bơta kuơ niam chài kòn cau dê tàm ƀòn lơgar.