Làng bol mờ ală bơyô gam iat dùl gơl jơnau pơnđik kòn cau Jarai bơh cau chài ồng Y Quân Mjâo dê đơs. Ală gùng đơs pơnđik hơ̆ ờ mìng là jơnau pơnđik mờ gam là jơnau yal bè rài kis lơh broă lơh sa, bè bơta kờñ gơboh ƀòn lơgar bơh ală cau tàm tiah nhàr lơgar Ea Sup, càr Dăk Lăk dê.

Cau chài ồng Y Quân Mjâo ơm tàm ƀòn A2, sàh Ea Sup, càr Dăk Lăk. Deh mờ dờng tàm ù tiah Ea Sup, bơh dềt ồng neh geh kis tàm ù tiah niam chài krơi is jơi bơtiàn dê. Ală mang bơtòm tơrgùm mat ƀòn lơgar, kềng bơnhă ồs hơng, sap đơs pơnđik kòn cau Jarai bè yal rài kis, brê bơnơm, bơta tàm kờñ mờ kòn bơnus tiah do. Bơh ală gùng đơs pơnđik hơ̆ neh lơh gơs bơta kờñ gùng đơs pơnđik bơh yau kòn cau tàm ồng. Ồng Y Quân Mjâo yal:

“Añ neh lơh kwèng mờ jơnau pơnđik bơh tŭ gam dềt. Nam añ 15, 16 sơnam neh git đơs pơnđik rau. Añ đơs khat tàm tŭ lơi, khat tàm tiah lơi, tŭ bal mờ pơ ùr lòt tàm mìr, tŭ lòt pik biap tàm brê. Jơnau pơnđik Jarai sùm đơs bè bơta kờñ gơboh rài kis, bè bơta kờñ gơboh lơh broă, lơh sa”.

Kung bè ală cau chài đơs pơnđik ndai, cau chài ồng Y Quân Mjâo bơsram đơs pơnđik mờ broă iat, kah wơl. Bơh ală jơnau pơnđik mờng kwèng bơh sơn rờp, hời rơhời ồng neh git đơs mờ gơtùi đơs uă gùng đơs pơnđik yau. Sap đơs pơnđik ồng dê niam ngan, bềng lìu bơta kah kơlôi, cèng nhơm tă bơh ù tiah brê bơnơm dê. Ồng gam git mờ đơs uă ngan jơnau pơnđik yau cih bè bơta tàm kờñ ùr klau – dùl tơngume rềp mềr, bềng lìu nùs nhơm tàm rài kis nùs nhơm bơh cau Jarai dê. Ală jơnau pơnđik geh tŭ den rơlĕ rơlùn, bềng lìu bơta jơh nùs, geh tŭ den ngoh rơngac bơta kah kơlôi, ai tơnggŏ bơta joh nùs bơh kla pơnu ùr ơruh tàm ƀòn lơgar dê. Ồng yal, ală jơnau pơnđik bè bơta tàm kờñ, ờ mìng là jơnau pơnđik, mờ gam là broă nàng cau rài yau pơyua nùs nhơm, bơta kơp kờñ mờ ală jơnau kơlôi sơnơng bè bơta tàm kờñ, bè bơta đềt mềr kơ̆ kơljap tàm rài kis:

“Tŭ dùl nă cau klau kờñ dùl nă cau ùr, klau hơ̆ sùm pơyua nùs tồr he dê bơh jơnau pơnđik: “Bi sùm jat sền oh. Tŭ sền rềp, oh hàng niam bè bơkàu brê. Tŭ sền bơh ngài, oh hàng niam bè ùr gơnrơh. Kah oh, bi sa ờ gơmŭt, bic ờ lơhă. Lơh broă den kah nđăp huĭ tơnơ̆. Tàm nùs nhơm mìng geh rùp să oh lơbơn niam”. Ai añ den añ kờñ jơnau pơnđik bè dùl bơnhă nhơm tă. Cau lơi kờñ bơsram đơs pơnđik, añ ndrờm bơto lơm. Bulah là ƀòn ngai, gùng lòt kal ke, añ kung gam chờ hờp lòt, mìng kơp kờñ sap đơs pơnđik gam sùm”.

Ală gùng đơs pơnđik Jarai bơh cau chài ồng Y Quân Mjâo đơs ờ mìng geh ală cau dờng sơnam kờñ ngan, mờ gam dờp geh bơta sền gròi bơh uă bơyô kơnòm să tàm ƀòn dê tai. Pah tŭ ồng đơs pơnđik, ù tiah bè gơ ơm wơl, gơ hòi gơ jà gal ngan ơruh pơnu, kơnòm pa tàu tus iat. Ờ mìng kờñ đơs pơnđik, ală bơyô kơnòm să gam lời cau chài in bơta ki ngàm mờ sền ngềr, kờñ gơboh. Bi H’Thuyên Kpă ơm tàm ƀòn A2 đơs:

“Añ iat wa đơs pơnđik kòn cau Jarai bơkah tồr ngan, niam ngan. Tàm ƀòn den wa kung sùm bơto làng bol in bơsram đơs pơnđik, cau lơi kung chờ hờp bơsram jat wa”.

Ai bi Y Nô Ksơr, ơm tàm ƀòn A1, sàh Ea Sup, càr Dăk Lăk den đơs:

“Wa Y Quân Mjâo sùm đơs ală jơnau pơnđik Jarai yau, añ kờñ ngan iat. Wa sùm đơs bè rài kis, bè bơta tàm kờñ ùr klau, añ iat bơkah tồr ngan mơya kung ờ hềt wă jơh jơnau gơtha bơh jơnau pơnđik dê. Añ git dùl êt lơm gời den tàng añ kơp kờñ tơngai tus ơruh pơnu bè bol hi rơp geh bơsram đơs pơnđik, ală oh dềt kung rơp geh bơsram jơnau pơnđik sơl nàng pơgồp bơnah sền gàr bơta niam chài ƀòn lơgar dê”.

Sap đơs pơnđik bơh cau chài ồng Y Quân Mjâo dê ờ mìng geh đơs tàm ƀòn mờ gam jat ồng lòt tus uă tiah, tus ală dơ̆ bơyai lơh, ală broă lơh niam chài đơs crih tamya tàm ƀòn mờ bơdìh ƀòn. Tàm tơl anih bơyai lơh, ồng ndrờm cèng ală gùng đơs pơnđik Jarai mờng kwèng, pơgồp bơnah yal tơnggit mờ lơh gơ rề bơta niam chài kòn cau he dê tus mờ gal ngan cau iat, cau sền. Mờ bơta kờñ gơboh mờ bơta jơh nùs hơ̆, ală gùng đơs pơnđik Jarai rơp gam geh sền gàr sùm, nàng sap ntas ờs mờng mờ niam ngan hơ̆ gam geh đơs sùm tàm ù tiah brê bơnơm Tây Nguyên.