VOV4.K’ho- Drim ngai 24/11, jat jơ tiah do tàm Tokyo, tàm dơ̆ lòt còp ngan ngồn lơgar Nhờk, Thủ tướng Phạm Minh Chính tus bal dơ̆ tìp mat, lơh broă mờ ală kuang đơng lam bồ tập đoàn dờng bơh lơgar Nhờk dê tàm gah tam gơl số. Tàm dơ̆ tìp mat, Thủ tướng Phạm Minh Chính pà git, pa do, kòp Covid-19 neh tơnguh pràn ngan broă tam gơl số tàm lơgar Việt Nam.

Tàm 20 nam, khà làng bol ngui broă drơng ala pờ tơn tàm internet pa rơp geh 12%, mơya mìng tàm 1 quý tŭ kòp Covid-19 gơlik geh, khà do neh gơguh uă rlau 2 dơ̆, tus 24%. Việt Nam geh 80% kơnòm bơsram, cau bơsram dờng bơsram pờ tơn tàm internet, jơnhua rlau mờ khà kờp bal bơh dunia dê rlau 60%. Chính phủ Việt Nam neh geh uă thể chế, broă lơh chồl pràn bơtàu tơnguh dữ liệu, lơh geh jơnau kờñ mut tàm khà 50 lơgar dữ liệu pờ tàm nam 2025, mut tàm khà 30 tàm nam 2030.

Đơs tàm dơ̆ lơh broă, Thủ tướng đơs nền, tam gơl số ờ mìng geh bơta tề lam bơh Chính phủ dê mờ gam geh bơta tus bal bơh làng bol mờ mpồl lơh sa kă bro dê tai, ai kòn bơnus lơh tờm, lơh cau tờm, tơl broă lơh pal wèt tus làng bol mờ mpồl lơh sa kă bro, làng bol mờ mpồl lơh sa kă bro tus bal tàm broă tam gơl số. Bè 2, 3 broă ngan ngồn mờ ală kuang bàng gròi sền, Thủ tướng tam pà gùng dà broă lơh bơh lơgar Việt Nam dê là tam gơl pa mhar gah priă jền, ngân hàng nàng ală gah do lam lài tàm broă tam gơl số.

Cau mblàng K’Duẩn