VOV4.K’ho – Mho òr (05/4), tàm Hà Nội, geh lơh pơrjum cribơyai bè kơlôi sơnơng mờ lơh gơlik sơnơm vaccine rơcang sơndră kòp jê ndul gơ jroh sur châu Phi. Bal mờ broă ngui broă lơh ròng phan ờ do ờ dă sinh học kơryan kòp jê ndul gơ jroh sur châu Phi, ală kuang bàng đơs là, broă gờ` kơlôi sơnơng, lơh sơnơm vaccine rơcang sơndră kòp do geh kuơ dờng màng ngan, mơkung sồr mhar bơt bơtàu broă lơh dà lơgar nàng ală bộ, gah lơh broă pơgồp bal mờ hòi jà bơta pràn dong kờl bơh ală mpồl lơh sa kă bro dê tus bal.

Virus kòp jê ndul gơ jroh sur châu Phi neh geh tàm 5 kơnhoàl ù tiah, mờ 60 lơgar tàm dunia. Tàm pơgap 100 nam do, kờp bơh tu\ geh kòp tàm lơgar Kenya, tus tu\ do ờ hềt geh sơnơm rơcang sơndră virus do.

Jat Bộ trưởng Nông nghiệp mờ Phát triển nông thôn, ồng Nguyễn Xuân Cường, bu\lah broă kơlôi sơnơng mờ lơh gơlik sơ nơm vaccine rơcang sơndră kòp jê ndul gơ jroh sur châu Phi digơlan gam gơtìp uă kal ke, mơya kung gam pal lam lơh kơlôi sơnơng tài gah ròng phan geh pơrya kuơ màng ngan tàm bơtàu tơnguh lơh sa suơn sre đơs bal.