VOV4.K’ho- Kung tàm broă lơh tàm lơgar Mỹ, Chủ tịch lơgar ồng Nguyễn Xuân Phúc neh geh jơnau đơs pơyua Pơrjum kuang bàng dờng màng bơh Liên hợp quốc dê bè ală mpồl lơh gơlik kòi phe bơh Tổng Thư ký Liên hợp quốc ồng Antonio Guterres đơng lam. Chủ tịch lơgar ồng Nguyễn Xuân Phúc neh ai tơlik 2, 3 broă lơh kờñ gàr tơl kòi phe tàm tŭ tơngai tam gơl trồ tiah mờ kòp Covid-19 mờ pà git, Việt Nam kờñ gơ gơs là anih tờm bơceh pa bè kòi phe, phan sa tàm ală lơgar rềp bal.

Tàm jơnau đơs, Chủ tịch lơgar ồng Nguyễn Xuân Phúc đơs loh, bơta pơgồp bal đah ală lơgar, ală mpồl lơh broă bal, ală bơta tàm mpồl lơh gơlik kòi phe, phan sa pal tài bơh bơta kuơ làng bol dê. Tàm Việt Nam, gàr tơl kòi phe là bơnàng jă tơn jơh jơgloh tơrmù rƀah, bơtaù tơnguh rài kis làng bol mờ là bơta niam nàng bơtàu tơnguh lơh sa suơn sre Việt Nam loh làng, geh kơnòl, kơ̆ kơljap.

Nàng bơtàu tơnguh kơ̆ kơljap ală mpồl lơh gơlik kòi phe, Chủ tịch lơgar ồng Nguyễn Xuân Phúc đơs là, pal rề ơnàng lơh broă bal dunia tàm broă kơlôi sơnơng, đơs lài, bơt bơtàu mpồl yal tơnggit đơs lài bơta aniai bè trồ tiah lơh aniai, kòp bơtờp; atbồ kơ̆ ală phan kuơ geh is dà lơgar, li la sinh học mờ brê; sền gàr dà gan tiah nhàr ală lơgar, phan kuơ tàm dà lềng.

Cau mblàng K’Duẩn