VOV4.K’ho- Pơn jat tai ală broă lơh bơdìh dơ̆ lòt còp lơh bơyô bal ngan ngồn lơgar Lào bơh ồng Nguyễn Xuân Phúc- Chủ tịch lơgar Việt Nam dê, mho ngai 09/8/2021,  Đại tướng ồng Phan Văn Giang, Bộ trưởng Bộ Quốc phòng  geh dơ̆ tìp mat cribơyai mờ  Đại tướng ồng Chansamone Chanyalath, Phó thủ tướng mơkung là  Bộ trưởng Bộ Quốc phòng lơgar Lào dê.

Tàm dơ̆ tìp mat cribơyai broă, 2 gah đơs ngan do là tŭ tơngai niam nàng pơn jat tai cribơyai, sơlơ lơh broă bal sền gàr dà lơgar đah 2 gah dê tàm tơngai kòp dờng Covid-19 gam gơlik geh kal ke uă ngan; đơs ngan bulah ơm tàm khat dùl bơta lơi, Ling klàng 2 lơgar dê geh sùm bal mờ gơ̆p sơr lèt gan tơl bơta lòng, bơta kal ke, sền gàr kơ̆ kơljap cồng nha kăc màng neh lơh geh bơh ală rài bèp bi dê neh lơh ngan bơtàu tơnguh. Tàm tơngai tus, Bộ Quốc phòng 2 lơgar pal tơrgùm kờp sền, kơlôi sơnơng ală broă lơh lam lơh lơh broă bal di pal, mờ nùs nhơm lơh ngan ờ lời lơh broă bal sền gàr dà lơgar 2 lơgar dê gơtìp gơrềng tài bơh kòp, tàm hơ̆ sơlơ tơnguh lơh broă bal atbồ, sền gàr tiah nhàr dà lơgar, kơryan broă mŭt lik tìs mờ kơrnoat boh lam.

Cau mblàng K’Hạnh