VOV4.K’ho- Mho òr (30/07), tàm ƀòn dờng Buôn Ma Thuột, ala măt anih pờ tơlĭk jơnau đơs Việt Nam tàm Tây Nguyên (VOV-Tây Nguyên) bơyai lơh jào pà 2 rơbô 22 nơm ào, mpha gàr să, 500 nơm krơh kơl dìng ntờc dà par mờ uă phan ngui ndai ai Anh tờm gròi sền kòp tê jê să càr Dak Lak (CDC Dak Lak) in, nàng dong kờl mpồl lơh sơnơm càr Dak Lak geh tai phan nàng rơcang sơndră mờ kòp Covid-19.

     Neh geh 10 mpồl lơh sa kă bro mờ cau dùl nă să lơh is dong kờl phan lơh sơnơm tơnơ̆ mờ 3 ngai hòi jà

Ồng Ngô Quang Khương, Phó kuang atbồ Anih pờ tơlĭk jơnau đơs Việt Nam tàm Tây Nguyên pà gĭt mờ jơnau kơ̆p kờñ lơh broă bal mờ mpồl lơh sơnơm càr Dak Lak, tus bal rơcang sơndră mờ kòp Covid-19, anih lơh broă do neh lam sồr ală mpồl lơh broă, cau dùl nă să tus bal dong kờl phan lơh sơnơm bè: phan gàr să, krơh kơl dìng ntờc dà par mờ phan ngui ndai. Tơnơ̆ mờ 3 ngai hòi jà, neh geh 10 mpồl lơh broă, cau dùl nă să tus bal dong kờl 2 rơbô 200 nơm ào gàr să, 500 nơm krơh kơl dìng ntờc dà par mờ uă phan ngui ndai, kờp jơh mờ priă mờr 170 tơlăk đong.

Cau mblàng Ndong Brawl