VOV4.K’ho- Tơnơ̆ mờ tŭ iăt Bộ Giáo dục mờ Đào tạo yal điềm pơrlòng jơh bơsram kấp pe dơ̆ dùl nam 2021, bàr pe hìu bơsram đại học sơnđờm yal điềm gơkờn sền swì săc rwah cau mŭt bơsram. Nam do, điềm kờp bal pơrlòng jơh bơsram kấp pe gơguh tàm uă môn pơrlòng. Bal mờ hơ̆, ală hìu bơsram, ală hìu bơsram đại học neh lời khà rwah cau bơsram uă đau sơl ai ală broă lơh ndai in, bè: sền swì học bạ, sền swì điềm pơrlòng bơta jak, jơnau pơrlòng tơl jơnau sồr jăt dunia dê....den tàng khà rwah cau bơsram sền swì sac rwah điềm pơrlòng jơh bơsram kấp pe geh gơmù dùl bơnah lơi hơ̆. Den tàng bè hơ̆, điềm sền swì săc rwah cau mŭt bơsram đại học nam do geh yal lài geh gơguh tai pơndrờm mờ ală nam lài. Bol añ neh geh dơ̆ lùp mò Nguyễn Thu Thủy- Phó Giáo sư- Tiến sĩ, Kuang ătbộ Vụ Bơto bơtê Đại học, gơwèt Bộ Giáo dục mờ Đào tạo bè broă do.

Ơi! Niam să mò Nguyễn Thu Thủy! Nam do, uă hìu bơsram đại học pơn jăt tai lơh uă ală broă pơrlòng sac rwah cau bơsram, điểm môn pơrlòng jơh bơsram kấp pe kung geh đơs là jơnhoa rlau mờ nam lài, bơta do gơrềng bè lơi tus điềm tơl khà mŭt bơsram đại học, ơ mò?

Mò Nguyễn Thu Thủy- Phó Giáo sư- Tiến sĩ: Ơi, bè jơnau yal bơh Bộ Giáo dục mờ Đào tạo dê neh yal lài hơ̆, điềm môn pơrlòng jơh bơsram kấp pe nam 2021 gơguh tàm uă môn pơrlòng. Tàm hơ̆, khà jơnau pơrlòng lơh geh điềm jơnhoa kung gơguh tai uă sơl tàm ală môn, bè dà Mỹ, Ngữ văn, Giáo dục Công dân, Sinh học...

Điềm tơl khà sền swì sac rwah cau mŭt bơsram mờ cồng nha pơrlòng jơh bơsram kấp pe tàm do là điềm rwah cau bơsram gơkờn bơh ală hìu bơsram dê gơ jăt tàm uă jơnau bè cồng nha pơrlòng jơh bơsram kấp pe (điềm bơh ală môn pơrlòng jơh bơsram kấp pe là ală điềm bơh mpồl môn sền swì sac rwah cau mŭt bơsram dê), khà rwah cau bơsram, khà cau pơrlòng cih mat dan sền swì sac rwah cau mŭt bơsram tàm gah bơsram, dùl broă lơh bơto bơtê.

Điềm kờp bal jơnhoa, khà jơnau pơrlòng geh điềm 8 rlau hơđang kung uă sơl, sèng điềm uă rlau den tàng broă sền swì sac rwah cau mŭt bơsram geh ƀươn rlau, ală hìu bơsram geh bơta ƀươn ƀoài tàm broă đal gĭt khà lơh geh tơl bơta jak rwah cau mŭt bơsram. Bơdìh mờ broă điềm bàr pe môn pơrlòng jơnhoa rlau pơndrờm mờ nam 2020, den broă ală hìu bơsram đại học neh lời khà rwah cau bơsram uă đau sơl ai ală broă lơh ndai in, bè sền swì học bạ, sền swì điềm pơrlòng bơta jak, jơnau pơrlòng lơh jăt tơl jơnau sồr dunia dê....den tàng khà rwah cau bơsram lời ai nàng sền swì điềm pơrlòng jơh bơsram kấp pe in geh gơmù dùl bơnah lơi hơ̆ sơl. Do kung là dùl jơnau kuơmàng lơh điềm sền swì sac rwah cau mŭt bơsram đại học nam do digơlan geh gơguh rlau mờ ală nam lài.

Kơnòm pơrlòng đơs là, bơta kal ke- bơta ƀươn lin ir đah ală môn tàm mpồl môn geh lơh gơlik bơta kal ke ai kơnòm pơrlòng in tàm broă tam gơl jơnau kơ̆p kờñ, mò đơs bè lơi bè bơta do hah mò?

Mò Nguyễn Thu Thủy- Phó Giáo sư- Tiến sĩ: Kơrnoat rwah cau bơsram gam geh ngui tŭ do ai gơnoar kơnòm pơrlòng in geh gơnoar cih mat sền swì sac rwah mŭt bơsram ờ kơryan khà jơnau kơ̆p kờñ, tơl mpồl ală môn pơrlòng mŭt tàm dùl gah là dùl jơnau kơ̆p kờñ rao. Ală hìu bơsram jăt tàm điềm bơh jơnhoa tus lơyah nàng sền swì sac rwah mŭt bơsram, mờ ờ gŏ jăt tàm rơndăp tăp sèng jơnau kơ̆p kờñ nàng sền swì săc rwah mŭt bơsram, ờ kờp jơnau geh uă kơnòm pơrlòng dùl khà điềm bal tàm lồi sră cih mat, den tàng bè hơ̆, kơnòm pơrlòng gơtùi cih măt sền swì sac rwah mŭt bơsram bơh uă mpồl ală môn pơrlòng tàm dùl gah. Den tàng bè hơ̆, ală oh pal săc rwah ală mpồl ală môn pơrlòng geh môn pơrlòng mờ he pơrlòng geh điềm jơnhoa nàng cih mat dan sền swì sac rwah mŭt pơrlòng mờ lơh geh bơta ƀươn. Mờ broă ngui măy mok yal tơngĭt jơnau tàm broă sền swì sac rwah mŭt bơsram đại học, cao đẳng, kơnòm pơrlòng geh uă tơngai niam, uă dơ̆ nàng tam gơl jơnau kơ̆p kờñ dùl bă dipal, di ngan rlau jơh jăt tàm cồng nha pơrlòng jơh bơsram kấp pe bơh he dê.

Mò Nguyễn Thu Thủy- Phó Giáo sư- Tiến sĩ, Kuang ătbồ Vụ Bơto bơtê Đại học, gơwèt Bộ Giáo dục mờ Đào tạo

Ơ mò, nam do, ală hìu bơsram đại học lơh uă ală broă sền swì sac rwah cau mŭt bơsram mờ khà rwah uă rlau pơndrờm mờ ală nam lài. Bơta do, geh bơta lơi lơh gơrềng sơl tus mờ broă sền swì sac rwah cau mŭt bơsram mờ điềm pơrlòng jơh bơsram kấp pe hah mò?

Mò Nguyễn Thu Thủy- Phó Giáo sư- Tiến sĩ: Tàm tŭ tơngai rơcăng lài is rwah cau mŭt bơsram tŭ do bal mờ broă ngai sơlơ geh uă anih bơto bơtê yal broă bơyai lơh rwah cau mŭt bơsram is halà bơyai lơh pơrlòng jăt mpồl den khà rwah lời ai cau sền swì sac rwah mŭt bơsram mờ điềm pơrlòng jơh bơsram kấp pe gơmù pơndrờm mờ ală nam lài là ngan ngồn mờ gơ ơm tàm gùng dà he neh gĭt lài.

Jăt tơrgùm kờp pà gŏ, nam 2021 ală hìu bơsram lời khà rwah ai ală broă rwah cau mŭt bơsram ndai uă rlau pơndrờm mờ ală nam. Mơya, sền swì sac rwah cau mŭt bơsram jăt ală broă lơh ndai gơ jăt tàm uă jơnau bè khà rwah, khà kơnòm pơrlòng cih mat dan sền swì sac rwah mŭt bơsram, cồng nha mpồl cau rwah mŭt bơsram, khà kơnòm pơrlòng gơkờn rwah mŭt bơsram pà gĭt mŭt bơsram...den tàng mpồl cau sền swì rwah mŭt bơsram là dùl khà dùl êt ngan. Kơnòm pơrlòng tŭ neh sền swì sac rwah mŭt bơsram mờ broă lơh ndai mờ neh gơkờn rwah mŭt bơsram mờ pà gĭt mŭt bơsram den geh ờ gŏ tus bal sền swì sac rwah tàm ală hìu bơsram ndai mờ tàm ală broă ndai tai. Ală hìu bơsram geh pal cih mat ală kơnòm pơrlòng neh pà gĭt mŭt bơsram tàm sră cih mat mờ ală kơnòm pơrlòng do geh ờ tus bal nàng sền swì sac rwah dơ̆ dùl mờ cồng nha pơrlòng jơh bơsram kấp pe mờ ngan ngồn geh ờ lơh gơrềng tus khà rwah cau bơsram bơh broă lơh sền swì sac rwah cau mŭt bơsram do dê jăt broă lơh điềm pơrlòng jơh bơsram kấp pe.

Mò geh sơl bơta bơto sồr lơi lời ai ală kơnòm pơrlòng in nàng lơh geh cồng nha bè bơta kơ̆p kờñ tàm tơngai sền swì sac rwah cau mŭt bơsram đại học nam do, ơ mò?

Mò Nguyễn Thu Thủy- Phó Giáo sư- Tiến sĩ: Điềm pơrlòng jơh bơsram kấp pe nam do jơnhoa rlau dùl êt pơndrờm mờ nam lài, digơlan geh bàr pe nă oh lơh geh 25, 26 điềm kung gam digơlan ờ gơkờn mŭt bơsram đại học sơl dilah ờ gŏ kơlôi sơnơng nền, ơ̆ gŏ sền swì nền tŭ sac rwah jơnau kơ̆p kờñ. Hơ̆ là, kơnòm pơrlòng ờ gŏ di kơ̆p kơnờm ir mờ điềm he pơrlòng geh mờ ur ar đòm jăt cau mŭt ñồm tàm bàr pe ală gah bơsram tàm pơrlòng uă ngan bơh dùl êt hìu bơsram dê. Tŭ tam gơl jơnau kơ̆p kờñ, kơnòm pơrlòng pal sền swì ờ gŏ di tài bơh gŏ điềm he dê ndrờm mờ điềm tơl khà bơh gah bơsram do dê nam lài mờ cih mat mờ ờ gŏ geh bơta sac rwah kơ̆ ndai, tài bơh điềm jơnhoa là điềm jơnhoa tàm bơta kờp bal, mờ ờ gŏ di là mìng dùl êt nă kơnòm pơrlòng lơm ờ. Gơwèt mờ ală oh pin dờn mờ khà điềm jơnhao den bơtơl tai jơnau kơ̆p kờñ, gơtùi rwah bàr pe gah bơsram kờñ gơboh mơya tàm uă hìu bơsram krơi is nàng tơnguh tai tŭ tơngai bơtuah gơkờn rwah mŭt bơsram.

Ơi, dan ưn ngài mò Nguyễn Thu Thủy- Phó Giáo sư- Tiến sĩ, Kuang ătbồ Vụ Bơto bơtê Đại học, gơwèt Bộ Giáo dục mờ Đào tạo bè dơ̆ tơm bơh bơr do.

Cau mblàng Lơ Mu K’Yến