VOV4.K’ho- Ngai do 10/6, Văn phòng Quốc hội bơyai lơh pơrjum băo, yal Nghị quyết bơh Mpồl duh broă tĕ khà dà lơgar bè mat ală cau gơ kờn Kuang bàng Quốc hội khoá 15. 

Tổng thư ký Quốc hội, Chánh Văn phòng Mpồl duh broă tĕ khà dà lơgar ồng Bùi Văn Cường pà gĭt, ngai tĕ khà 23/5 pa do, geh rlau 69 rơbô nă cau tĕ khà gùt lơgar lòt tĕ khà pồ Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026. Do là  dơ̆ tĕ khà dờng ngan rlau jơh bơh lài tus tŭ do, bulah geh bơyai lơh tàm tơngai kòp Covid-19 bơtờp kòp uă. Khà cau tĕ khà lòt tĕ khà uă ngan 99,60%, đơs ngan bơta gĭt wă chính trị, nùs nhơm kờñ gơboh dà lơgar mờ bơta pin dờn bơh làng bol dê gơwèt mờ Đảng, Dà lơgar. Cồng nha, cau tĕ khà neh pồ tơl khà Kuang bàng Quốc hội jat kơrnoat sồr; pồ geh 99,87% khà Kuang bàng Hội đồng Nhân dân kấp càr; 99,81% Kuang bàng Hội đồng Nhân dân kấp kơnhoà mờ 98,91% khà Kuang bàng Hội đồng Nhân dân kấp xã pơndrờm mờ khà kờñ pồ jat kơrnoat boh lam dê sồr.

Cau mblàng K’Hạnh