VOV4.M’nông: Mât uĕh nău khlay ƀư tơm n'hanh nău dơn kan bah ngân hàng tăch rgâl tơm tâm trong kơl prăk kaih, ntuh kơl hun hao tuch tăm mât rong, ƀon lan, ntơm bah năm 2020 tât aƀaơ, Agribank hŏ ntêm an rlău 1.000 rmen prăk nsĭt geh wăng sa gay n'hŭch deh prăk kon an manh ntop kơl năch rlău dơi nuh srê Covid-19, nkre an ƀư âk bôk nău kan an manh dơh, deh prăk kon thuk lơn ntơm bah 2%- 2,5% rđĭl đah deh prăk kon an manh ngăn đah rnoh âk rlău 300.000 rmen prăk ntêm an doanh nghiệp jê̆ n'hanh dah găp, năch wăng sa têh, năch êng tâm rnăk wâl n'hanh doanh nghiệp FDI.

          Ta năp nău tât krit nji bah nuh srê Covid-19 lơh khuch jru tât ăp ntil tâm nău rêh, wăng sa, kon nuĭh; gay năn ngăch ntop kơl năch manh tơm prăk ơm đăp mpăn nău kan ƀư njêng tăch rgâl, rlău dơi jêr jŏt, Agribank lor nchrăp n'hŭch tay deh prăk kon an manh đah lĕ rngôch ăp nuĭh n'hanh ăp mpôl kan manh ma prăk VND ta Agribank.

          Na nê̆, đah rnoh manh ta rnôk nar 15/07/2021, Agribank n'hŭch tay 10% rđĭl đah deh prăk kon an manh dôl dŏng đah tơm prăk n'gluh an manh glêh năm geh rnoh deh prăk kon ntơm bah 5%/năm let lơ n'hanh rnon an manh dah găp, jŏ jong geh rnoh deh prăk kon ntơm bah 7%/năm let lơ. Nchroh, đah nău n'hŭch tay deh prăk kon rơh dja, Agribank ntêm an nklăp 5.500 rmen prăk gay ntop kơl an năch manh.

          Bah meng nê, Agribank hŏ nsrôih droh rklaih jêr jŏt an năch manh tâm nău tĭng ƀư răp jăp, geh nău tam ăp trong ntop kơl đŏng kơt: Dăp rgum tay rnon tơm n'hanh deh prăk kon; an njuăl dơm prăk tâm dak n'hanh kơl 130 rmen prăk an pah kan njrăng n'gang nuh srê Covid-19;...Ndrĭ, đah nău n'hŭch tay deh prăk kon an manh, tâl 5 mbro hŏ mpơl nău khlay leo lor bôk năp, lĕ n'hâm suan ma nău kan bah Agribank tâm nău nsum ti ndrel Đảng, Ngih dak, Chính phủ tĭng ƀư "rnoh tât ndrop": ntrôl rŭch nuh srê n'hanh hun hao wăng sa. Bôk nău kan n'hŭch deh prăk kon an manh ntoch jong tât lĕ nar 31/12/2021 n'hanh dơi an dŏng lam hvi ta 2.300 ntŭk rhŏ an manh bah Agribank ta lam dak.

Nuĭh rblang: Điểu Thân