VOV4.M’nông: Tĭng Uỷ ban Mặt trận Tổ quốc Việt Nam nkual ƀon têh Hồ Chí Minh, tât rnôk dja, hŏ geh âk n'gor tâm lam dak kơl pah kan njrăng n'gang nuh srê Covid-19 bah nkual ƀon têh. Tât aƀaơ, nkual ƀon têh hŏ dơn geh 709 rmen prăk măt, tâm nê n'gor Bến Tre kơl 500 rkeh prăk, n'gor Quảng Nam kơl 2 rmen prăk. Ndrel đah prăk măt, nkual ƀon têh Hồ Chí Minh hôm dơn drăp ndơ n'hanh ntrŭp dŏng rnoh khlay rlău 105 rmen prăk đŏng kơt: 10 tấn bum prŭm bah n'gor Vĩnh Long, 20 tấn phe bah n'gor Đồng Tháp. Aƀaơ nkual ƀon têh Hồ Chí Minh hŏ tâm pă prăk, ndơ rnoh khlay rlău 709 rmen prăk an ăp ntŭk, ăp rêng ƀư njrăng n'gang nuh srê. Rlău ma nê, hŏ geh 105 đơn vị, êng nuĭh hŏ ton kơl rnoh prăk rlău 2.293 rmen prăk n'hanh Mặt trận hŏ dơn rlău 244 rmen prăk, tâm nê geh 1 rmen prăk bah n'gor Tây Ninh gay rvăt vaccine Covid-19.

Nuĭh rblang: Điểu Thân