VOV4.M’nông: Nău mhe nŭng nar 31/5 bah Bộ Y tế an gĭt geh tay 68 nuĭh ji nuh srê COVID-19 tâm dak, êng Bắc Giang geh 48 nuĭh, Bắc Ninh 4 nuĭh, Hà Nội 12 hê, Long An 2 hê, Đắk Lắk 1 hê n'hanh Đà Nẵng 1 hê. Tâm ôi 31/5, Nhih dak si Trung ương Huế hŏ ƀư nar luh kan Mpôl nai dak si ŭch hăn kơl êng n'gor Bắc Giang njrăng n'gang nuh srê Covid-19. Du mpôl lĕ rngôch 18 cán bộ, nuĭh kan dak si lah ăp nuĭh rnâng kan mpeh ăp trong kan kơl săm sĭt ngăch dăng tay n'hâm suan play nuih, lơh bah khêh. Bah meng râng săm, sơch nuĭh ji, ƀoi tĭng têl... ăp nuĭh rnâng kan Nhih dak si Trung ương Huế mbra mbơh rblang du đêt nău mbơh khoa học gay tâm pă ăp nău gĭt blău n'hanh nău tă ơm gĭt kan ngăn ngăn mât chăm n'hanh  săm nuĭh ji Covid-19. Bah năp nê, UBND nkual ƀon têh Đà Nẵng hŏ njŭn 10 bác sĩ, điều dưỡng hăn kơl an Bắc Giang tâm pah kan săm ji, njrăng n'gang nuh srê Covid-19.  Thứ trưởng bộ Y tế Nguyễn Trường Sơn an gĭt, Bộ mbra rgum 500 sinh viên nhih nti Cao đẳng y tế Bạch Mai n'hanh rlău 400 nuĭh kan dak si êng ƀa ƀă gay ntop  kơl Bắc Giang.

Nuĭh rblang: Điểu Thân