VOV4.M'nông: Tâm trôm ăp nău kan nchrăp lor an tâm nchră gưl têh ASEAN tâl 38 n'hanh 39 n'hanh ăp gưl têh geh tât, kêng măng 4/10, Tâm nchră Bộ trưởng Ngoại giao ASEAN hŏ ƀư tĭng trong pơk sŏng dăng ta nâm nău ƀư tơm bah Kruanh Brunei. Tâm nchră hŏ tâm ôp mpeh trong hăn rdâk njêng jâng wăng sa nsum ASEAN, tâm boh đah ăp dak băl n'hanh tâm nchră mpeh du đêt nkô̆ nău tâm nkual n'hanh lam ntŭr neh. Mât uĕh tâm rnglăp n'hanh dơn ngoăy ASEAN dơi ndơ̆ luh bôk năp, uănh lah n'gâng tơm đăp mpăn nău dơi bah trong hăn tât rdâk njêng du mpôl nsum n'hanh mât uĕh nău khlay ƀư rgum tơm bah ASEAN ta nkual. Tâm nchră mpeh tâm boh dak bah dih, ăp dak tâm ban ŭch ntrŭt nsôr tay ăp băl tâm boh rgop rdâk njêng an nău ŭch geh nsum  lah đăp mpăn, rnă njrăng n'gang đăp mpăn ta nkual, ŭch tĭng nău ƀư tơm bah ASEAN, râng tâm boh nkual ma ăp trong way kan tă bah ASEAN leo hăn, rgop rdâk njêng tâm păch nkual pơk hvi, nkrum lam, kloh rvah n'hanh nsing tâm luật pháp dak bah dih. Tâm nchră hŏ tâm rkhăch tay n'hanh tâm ban ŭch trong tâm boh đah ASEAN n'hanh dak Anh, dak tâm boh tâm dâl nău dŭt mhe bah ASEAN./.

Nuĭh rblang: Điểu Thân