VOV4.M'nông: Ơi kônh wa n'hanh băl mpôl! Tâm bah ri aơ nơh, ta n'gor Gia Lai, ăp mpôl kan tahen ta ntŭk hŏ tâm boh kan nsum đah Ƀan rđău đă njrăng n'gang nuh srê COVID-19 ăp gưl an ƀư ăp trong  njrăng n'gang nuh srê. Aơ lah ngoăy tâm ăp mpôl kan n'gâng tơm, hăn chŏl lor ta bôk trong rlong sial njrăng n'gang nuh srê COVID-19 ta n'gor. Ăp đơn vị nkre n'hao âk mpôl kan kơp uănh ta nkual n'har bri, nkre pă an ndơ dŏng kan dak si, ndơ dŏng kỹ thuật, mpôl râng njrăng n'gang nuh srê.          

Tă bah nkual nuh srê quận Gò Vấp, nkual ƀon têh Hồ Chí Minh sĭt jay ta nkuâl Đức Cơ, n'gor Gia Lai, bah kêng dŭt khay 7 tât aƀaơ, nô Hồ Hữu Trung (deh năm 1998) dơi dơn lăp tâm nkual an gŭ rgum êng bah Bộ chỉ huy Quân sự n'gor Gia Lai. Nô Trung an gĭt, ăp quy định njrăng n'gang nuh srê ta aơ dơi ăp nuĭh tĭng ƀư jăp jêng nô saơ dŭt đăp mpăn:

“Ăp tahen, ăp bác sĩ ta sư đoàn mât chăm nău rêh oh nô dŭt ăp dăp uĕh. Mpeh nău mât kloh uĕh tâm trôm n'hanh bah dih đăp mpăn tŏng uĕh, rnoh ndơ ngêt sa đăp mpăn kloh uĕh ndơ ngêt sa. Gâp hŏ uănh năl mham 3 tơ̆, mô mpơl ji da dê. Gâp ntơh măt lĕ rngôch ăp nuĭh ƀon lan tĭng ƀư an gŭ srang ngai êng, lah uĕh ăp cán bộ, tahen, bác sĩ ta aơ hŏ lĕ nuih n'hâm, ăp dăp, mât chăm mpôl hên".

Ntơm bah  bôk năm tât aƀaơ, Bộ chỉ huy Quân sự n'gor Gia Lai hŏ ƀư an gŭ rgum êng an rlău 13.500 tơ̆ nuĭh. Aƀaơ, ta 33 ntŭk mpeh đơn vị, dôl geh rlău 6.700 nuĭh dôl an gŭ rgum êng. Gay pah kan an gŭ rgum êng ân đăp mpăn, njrăng n'gang bah ntưp rêng tâm chong cheng.

Bộ chỉ huy Quân sự n'gor hŏ jao nău kan an Phòng Hậu cần, na nê̆ lah Ban Quân y nchrăp ăp tŏng ndơ dŏng kan dak si, ndơ dŏng kỹ thuật, mpôl râng njrăng n'gang nuh srê. Măt êng, đơn vị lor nchrăp kan nsum đah tahen n'har bri n'gor nkoch trêng n'hanh tĭng ƀư ăp trong njrăng n'gang nuh srê, bah ir ntưp rêng lam tât ƀon lan; rgum n'hao 78 cán bộ, tahen dân quân kan nsum đah ăp pôih n'har bri ƀư rsong hăn mât njrăng n'har bri, nking nchăng nău luh, lăp mô geh nău way, nkoch trêng mpeh njrăng n'gang nuh srê .

Trung tá Lê Hồng Tuấn, Kruanh Pôih n'har bri Ia Chía, Tahen n'har bri n'gor Gia Lai an gĭt: Đơn vị mât uănh rlău 7km trong n'har bri, tâm pă bar rmôt gŭ nking kâp, ăp rmôt 5-7 nuĭh, tâm nê geh 4 cán bộ tahen dơi n'hao bah Bộ chỉ huy Quân sự n'gor Gia Lai. Cán bộ, tahen way hăn gŭ kâp, rsong hăn n'har bri, nsrôih nking nchăng ăp nuĭh luh lăp mô geh nău way; lor nchrăp rƀah gĭt nău lư ta ntŭk, kan nsum đah n'gâng kan ta ntŭk ôp uănh tay ăp tŏng lĕ rngôch, ban saơ rlău 1.000 nuĭh tât bah ăp ntŭk êng plơ̆ sĭt, an ƀư mbơh ngăch dăng n'hâm suan, sơch but săm.

Đại tá Huỳnh Việt Dũng, Groi Chỉ huy trưởng Bộ chỉ huy Quân sự n'gor Gia Lai an gĭt, Bộ chỉ huy Quân sự n'gor hŏ đă hang rhiăng cán bộ, tahen n'hanh mpôl dân quân tự vệ tĭng ƀư wơt dơn, mât kloh uĕh, puh nkhĭt kaman n'hanh gŭ kơl bah kơi tâm nkual an gŭ rgum êng đăp mpăn nău way njrăng, n'gang nuh srê:

“Aƀaơ, mpôl hên kan nsum đah ăp n'gâng kan nchrăp ăp tŏng trong nkra mât uĕh, lhăt ntơm bah tâm pă ndeh công an leo trong hăn tât ntŭk uănh năl mham tĭng di rêng bah Bộ Y tế đăp mpăn bah mô geh tâm ntưp rêng chong cheng, roh đăp mpăn tâm nkual an gŭ srang ngai êng".

Ndrel đah Bộ chỉ huy Quân sự n'gor Gia Lai, tâm lĕ 2 rơh nuh srê ta n'gor ntơm bah bôk năm tât aƀaơ, Tiểu đoàn Hoá học (Bộ Tham mưu) n'hanh rmôt y học dự phòng (Cục Hậu cần) mpeh Quân đoàn 3 (Bộ Quốc phòng) ƀư puh nkhĭt kaman ta ăp tơm nuh srê ta Thị xã Ayun Pa, nkuâl Ia Pa, nkual ƀon têh Pleiku. Đại úy Phạm Văn Hùng, Tiểu đoàn trưởng Tiểu đoàn D30, Cục Kỹ thuật, Quân đoàn 3 an gĭt: Ntơm bah khay 7 tât aƀaơ, gay kơl n'gor mbluh soih mpet jâk an gŭ rgum êng rnôk nuĭh ƀon lan bah ăp n'gor mpeh bah dâng plơ̆ sĭt gay der nuh srê, ăp cán bộ, tahen hŏ rong an doanh trại, ƀư ntŭk gŭ rgum êng an 500 nuĭh ƀon lan:

“Mpôl hên nchrăp uĕh ntŭk ntô ndơ dŏng, wơt dơn nuĭh ƀon lan tĭng nău tâm ban ŭch bah n'gor. Tiểu đoàn lôch ntrơn tât ntŭk gŭ mhe, mpôl hên ngăch đăp mpăn rmôt, leo ƀư ntŭk gŭ ntŭk sa mhe, đăp mpăn dăp rgum ăp grep, lôch jêh uĕh nău kan ndrop nê lah nkre njrăng n'gang nuh srê, nkre lôch jêh ăp rnoh tât kan ndơ̆ luh, nău kan way rnâng kan kỹ thuật”.

          Tĭng ƀư nău rđău đă bah Quân khu 5, mhe aơ, Bộ chỉ huy Quân sự n'gor Gia Lai hŏ hăn na nê̆, kan nsum hăn uănh 4 ntŭk ta n'gor gay njêng nhih dak si manh ntăm ƀư gay săm nuĭh ji Covid-19. Tĭng nê, đơn vị hŏ sơch Nhih nti Cao đẳng Gia Lai ƀư nhih dak si manh ntăm ƀư săk nuĭh ji Covid-19 rnoh đê̆, mpeh Bộ chỉ huy Quân sự n'gor Gia Lai. Ndrel đăp mpăn ăp tŏng ntŭk ntô ndơ dŏng, dak si dak gle, nhih dak si geh rmôt cán bộ, nuĭh kan lah cán bộ n'gâng kan dak si bah ăp đơn vị tahen gŭ kan ta n'gor Gia Lai.

         Đah nuih n'hâm dâk kan lor, lĕ rngôch an ma nău đăp mpăn, ngăch dăng n'hâm suan bah nuĭh ƀon lan, ăp mpôl kan tahen bah Quân khu V n'hanh Quân đoàn 3 (Bộ Quốc phòng) ta n'gor Gia Lai dôl geh ăp nău kan tam, jêng ngoăy tâm ăp mpôl kan n'gâng tơm ta bôk trong rlong sial rdâng lơh nuh srê COVID-19 ta n'gor./.

Nuĭh rblang: Điểu Thân