VOV4.M’nông: Tĭng nău lư bah Sở Giáo dục n'hanh Đào tạo n'gor Kon Tum, rơh thi tốt nghiệp trung học phổ thông rơh 1 năm aơ rnoh âk kon se râng thi dơi tốt nghiệp geh 98,26% n'hanh du đêt kon se lah thủ khoa lam dak khối D. Rơh 1 mhe aơ, n'gor Kon Tum geh 4.483 nuĭh râng thi n'hanh rnoh nuĭh dơi tốt nghiệp lah 4.405 oh.  N'gor Kon Tum geh thủ khoa lam dak khối D lah oh Bùi Thị Ngọc Quỳnh, jrô 12 chuyên Văn, Nhih nti THPT Chuyên Nguyễn Tất Thành đah rnoh điểm 29,15. Dak Nông geh rnoh dơi tốt nghiệp THPT năm 2021 tât 97,1%, đah 6.702 nuĭh đăng ký râng thi. Tâm nê, 10 nhih nti geh rnoh âk nuĭh dơi tốt nghiệp tât 100%. Tĭng nchih rgum, geh 80 bài thi tât rnoh điểm dŭt âk ta ăp môn bah 9,25 let lơ. Tâm nê, geh 57 bài thi geh tât điểm 10 lah: Giáo dục công dân 50 bài, tiếng Anh 4 bài n'hanh Sinh học 3 bài.

Hôm ta Dak Lak, rnoh âk nuĭh dơi tốt nghiệp rơh 1 bah n'gor Dak Lak geh tât 97,01%, hao 0,6% rđĭl đah năm 2020. Geh 10 nhih nti THPT n'hanh 3 trung tâm (tâm rnoh lĕ rngôch 58 nhih nti THPT n'hanh 15 ntŭk rgum ntĭm nti nău kan- giáo dục thường xuyên) geh rnoh dơi tốt nghiệp tât 100%. Tĭng nchih rgum bah Sở Giáo dục – Đào tạo n'gor Dak Lak, lam n'gor geh 292 kon se nti geh điểm bah 9,5 let lơ đah môn thi êng du hê./.

        Nuĭh rblang: Điểu Thân