VOV4.M'nông: Nar 10/8, ta thủ đô Canberra bah Australia, Đại sứ Việt Nam Nguyễn Tất Thành, Kruanh Ủy ban ASEAN ta Canberra hŏ ƀư tơm rơh hop đah Nhih pah kan ntơh măt ăp dak ASEAN ta Canberra n'hanh ăp dak Thái Bình Dương gay tâm ôp mpeh nkô̆ nău nuĭh kan. Aơ lah rơh hop bôk năp đah rmôt ăp dak dơi ƀư ta Canberra, ntŭk lơn âk ăp dak gŭ ta gôl dak lêng Thái Bình Dương geh nhih pah kan ntơh măt. Ta rơh hop, bar ding hŏ tâm nkoch nô nău tâm boh nuĭh kan đah Australia, lĕ ma bôk nău kan nuĭh kan khay rlu an nuĭh ƀon lan ăp dak ASEAN n'hanh ăp bôk nău kan nuĭh kan Thái Bình Dương, bôk nău kan nuĭh kan tĭng khay kan ma chính phủ Australia dôl dŏng an du đêt dak gôl dak lêng Thái Bình Dương. Bar ding hŏ tâm ôp nău lư mpeh bôk nău kan "si ƀŭt an lăp nău kan tuch tăm” tă bah Bộ Nông nghiệp Australia dăn đă tâm n'gul khay 6/2021. Bar ding mpơl nău ŭch rŏng ăp bôk nău kan tâm boh nuĭh kan đah Australia aƀaơ n'hanh tâm let năp tay mbra dơi kan nsum lhăt n'hanh geh ăp nău ring tâm tâm kơi ntop nsum, rgop rdâk tay tâm boh đah ASEAN n'hanh ăp dak gôl dak lêng Thái Bình Dương./.

Nuĭh rblang: Điểu Thân