VOV4.M’nông: Bah năp nau tât jêr bah srê Covid-19, rnôk ma dak băl Campuchia dôl ma kơp dơn ăp nŭih ntưp srê Covid-19 hao âk, n’gor Mundulkiri, n’har tâm dăch đah 2 nkuăl Ea Súp ndrel Buôn Đôn bah Dak Lak kŏ kơp dơn geh nŭih ntưp srê Covid-19. Đah nuih n’hâm mô ân srê ntưp bah trong n’har, ăp Đồn biên phòng tâm n’gor Dak Lak mât 100% ăp rmôt mât njrăng ndrel nŭih ƀư nau kan mêt uănh nkân njrăng tâm nkuăl n’har bri. Nkre lah, n’hao rmôt nŭih ndrel ndơ dŏng tâm nkuăl geh nau khuch, năn saơ, njrăng rdâng nau kan luh lăp tih dôih.

Lah nŭih râng ngăn tâm nau kan hăn joi ndrel rdâng 12 nŭih rlet trong n’har tih dôih tă bah Campuchia tât trong n’har tâm nkuăl Ea Súp măng 25/4 mhe rlau, Trung uý Cao Tiến Dũng, dôl ƀư nau kan tâm ntŭk nkân njrăng srê Covid-19 bah Đồn Biên phòng Ia Rvê, nkoch:

 ‘Bah kâp njrăng ndrel uănh tâm ăp ntŭk ri saơ ăp nŭih tă geh hăn ri nơm hăn joi tĭng trong têl ndrel saơ ăp nŭih lăp jru tâm nkuăl nơm, ri nơm ân geh mbơh ngăch ndrel ma tâm rgop nsum ma rmôt kan bah xã gay ma njrăng rdâng ndrel ƀư nau kan hăn leo nkhah ân năn. Lah rlet n’har bri ma geh tât ngăn ri păng tât geh khuch ngăn ân nơm ri dĭng phung hên ân geh n’hao n’hao nuih n’hâm nkah njrăng, n’hao nau dơi nau kan lơn tay, njrăng srê kơt njrăng phung rlăng’.

Tĭng Đại uý Hoàng Văn Tuân, Groi rđau kan Đồn biên phòng Ia Rvê, ntơm lơ 25/4 tât rnôk aơ, ăp nkuăl n’har bri bah nkuăl Ea Súp, tahen Biên phòng hŏ tâm rgop kan đah ăp rmôt năn saơ ndrel rdâng 3 tŏ đah 17 nŭih rlet nkuăl n’har bri tih dôih. Uănh nâp tâm rơh tât, nau kan aơ mra hôm âk, yor ri ma rmôt kan hŏ bonh đă oh nô rlet nau jêr, nau mô ueh mpeh mih nar, nkuăl n’har gat ma ƀư ueh nau kan bah nơm đah nau nsôih mât đăp mpăn ueh nâp tâm nkuăl n’har bri:

 ‘Rmôt kan bah phung hên ri mô âk, ma nŭih luh lăp tâm nkuăl n’har bri ri knŭng geh tâm mông dôl ma rlu ndrel ma mih, nar tâm aơ kŏ kơt lah trong hăn ri tâm yan vai, nkuăl neh lâng, neh ntu mô jêng, ƀon lan ntơm ndăn tâm nau nê ma lăp gŭ, khân păng joi âk trong gay ma lăp mô di du ntŭk. Bah năp nau nê Rnâng kan rđau kan hŏ pă kan ân rjăp kâp njrăng tâm nkuăl n’har bri ndrel tâm ndơn mât njrăng, pă tĭng rmôt hăn kan gay ma tâm ndơn ƀư nau kan tâm nkuăl n’har bri gay ma njrăng ân ueh nâp ngăn”.

Hôm tâm ntŭk nkân njrăng srê Covid-19 bah đồn biên phòng mpông đah dak ba dih Đắc Ruê, nau kan mât uănh, nkân njrăng kŏ geh rgum âk, Trung tá Phùng Văn Bình, cán bộ nai dak si tâm nkuăl n’har bri Đắc Ruê, mbơh:

 ‘Oh nô ta aơ ri hăn mêt uănh tâm nkuăl n’har bri gay ma njrăng rdâng mpeh nau kan njrăng srê ji. Lah geh nŭih rlet trong n’har bri ri oh nô hăn mêt uănh, kâp njrăng, nhŭp leo tât ăp ntŭk nkhah rgum bah rmôt kan. Oh nô tâm aơ mât njrăng ndrel oh nô tâm rmôt kơl an đah nuih n’hâm njrăng rdâng prêh ngăn, mô ân srê lăp tâm nkuăl n’har bri”.

Thượng tá Nguyễn Minh Tuyên, Groi rđau kan Tahen biên phòng n’gor Dak Lak, mbơh: Tâm lam nkuăl n’har bri jong rlau 73 km tâm dăch ma n’gor Mondulkiri, dak Campuchia, ăp dồn biên phòng hŏ n’hao nau kan mêt uănh, nsôih ngăn njrăng rdâng gay mô ân geh lăp dak tih dôih. Ndrel ma nê, ăp rmôt kan lŏ tâm rgop nsum đah gưl uỷ, n’gâng kan, ngăn lah tâm 4 xã n’har bri tâm ăp nkuăl Ea Súp ndrel Buôn Đôn, ntrŭt dăng nau kan nkoch trêng, n’hao nau blau, nau kan, nau ƀư mbơh ân ƀon lan tâm nau kan njrăng, rdâng srê Covid-19:

 ‘Rmôt kan hŏ mât rjăp 6 ntŭk kan nâp, 18 rmôt hăn kan kơl an njok trong hăn tâm ăp ntŭk, n’hao ntŭk dŏng ndơ, bonh đă cán bộ tahen mêt uănh nkân njrăng tâm măng nar gay ma mât đăp mpăn nkuăl n’har bri, rjăp nâp đah nau nsôih mô ân geh nŭih lăp tât nkuăl n’har bri nơm tă bah Campuchia ma mô geh nkân njrăng”.

Rlet âk nau jêr, nau mô ueh bah mih, nar, bri krŏng, ăp cán bộ, tahen biên phòng Dak Lak kŏ nsôih ngăn nau kan bah nơm gay mô ân geh srê Covid-19 lăp tâm nkuăl neh nơm./.

Nŭih rblang: H’Thi