VOV4.M’nông: Dơi geh nau kan bah Hội đồng săch kan neh dak, lơ 22/5, 7 Đồn Biên phòng ndrel Tiểu đoàn ntĭm nti cơ động, tâm N’gâng kan tahen Biên Phòng Dak Lak mra ntơm săch kan neh dak gưl XV ndrel HĐND ăp gưl năm kan 2021-2026. Tât rnôk aơ, ăp nau nchrăp kan geh tahen Biên phòng Dak Lak tâm rgop nsum ma uỷ ban săch kan n’gor Dak Lak nchrăp ueh, mra ân nau vơt âk rhiăng cử tri “grat ndrih” hăn nklăch phiếu ƀư nau dơi ndrel nau kan bah công dân.

Tât ta Đồn Biên phòng 737, xã Ia Rvê, nkuăl Ea Súp tâm ăp nar aơ, phung hên ndơn saơ nau khuh n’gôr bah nar săch kan. Tâm ntŭk săch mrô 11 (Ngih rƀŭn Đồn Biên phòng 737), kan nkra, nchrăp kan, phun dak si nkhĭt kman, lir moh săk ăp nŭih ân geh săch, rnoh cử tri, thùng phiếu…hŏ geh nchrăp ueh.

Binh nhất Hà Văn Piêng, 21 năm, tâm Đồn Biên phòng 737 nkoch, aơ lah rơh bôk năp păng râng hăn nklăch phiếu. lôch ma khay aơ, ndăn nar rlu ơm jêh ăp nar hăn kan, nô ndrel ăp tahen bah nơm hăn tât ngih rƀŭn ntŭk nchih mọh săk ăp nŭih gay ma răk ăp nau geh mpeh ăp nŭih ân geh săch gay ma nơm săch.

Tât rnôk aơ, ndrel ma nau gĭt kloh nau kan bah ăp nŭih ân geh săch, ri ăp nŭih tâm rmôt tahen hŏ geh ndoen phiếu cử tri, mra hăn nklăch phiếu tâm lơ 22/5:

  ‘Gâp vay mĭn uănh ăp nau geh nchih nkoch bah ăp nŭih ân geh săch lăp kan Quốc hội gưl XV ndrel HĐND ăp gưl năm kan 2021-2026. NƠm ŭch săch ăp nŭih geh tŏng nau mĭn, nau blau nau kan gay ma râng tâm Quốc hội ndrel HĐND ăp gưl gay ma ân khân păng rgop n’hâm, rgop soan tâm nau ndâk njêng ƀon lan, neh dak sâm geh”.

Thượng tá Nguyễn Xuân Sơn, Chính trị viên Đồn Biên phòng 737 mbơh, ƀư nau rđau bah N’gâng kan rđau tahen Biên phòng Dak Lak, kŏ kơt lah n’gâng kan ba lơ mpeh nau ntrŭnh nau săch kan ơm, âk nar ma aơ, Đảng uỷ ndrel Rnâng kan rđau kan đồn ƀư âk nar nkoch trêng mpeh Luật săch kan, nau geh jêng bah ăp ntoh măt, nau dơi ndrel nau kan bah cử tri tât đah ăp cán bộ, tahen tâm đồn.

Đă 9 cán bôk đồn tâm grop nsum đah Uỷ ban săch kan n’gor Dak Lak ndâk rmôt kan, nchih moh săk cử tri, lir mbơh ăp ntoh măt gay cán bộ, tahen nkah, săch. Ndrel ma nau nê, Đảng uỷ đồn kŏ rđai 100% nŭih tâm nê gay ma mât njrăng, n’hao nau kan njrăng nau đăp mpăn rnă njrăng tâm nkuăl n’har bri ndrel ăp ntŭk nklăch phiếu, ngăn lah tâm rnôk geh srê Covid-19 geh tât jêr:

  ‘Tât rnôk aơ, phung hên hŏ nchrăp jêh ăp nau kan kơl an săch pah kan ơm. Ăp băng rôn, nau nkoch mbơh, moh săk cử tri ndrel ntơh măt geh yông ndrel lir jêh hôm, thùng phiếu kŏ jêh, kan pă phiếu cử tri kŏ ƀư nau pă ân ăp cán bộ, tahen tâm đồn. Êng nê, yoor srê Covid-19 geh tât jêr, phung hên ƀư ân rjăp đah ăp nau rgum rmôt tahen nai dak si tât puh dak si nkhĭt kman lam ntŭk nklăch phiếu, lor ma hăn nklăch phiếu mra ƀư veh săk jăn, put bok put mbing, dâh tâm ƀah gay ma nklăch phiếu ân đăp mpăn”.

Tahen Biên phòng n’gor Dak Lak rnôk aơ ƀư mât trong n’har bri jong rlau 74 km, tâm dăch ma n’gor Muldulkiri, dak Campuchia. Tĭng Đại tá Phạm Hữu Chiến-Chính uỷ tahen Biên phòng Dak Lak, nau geh nau kan, dơi geh nau ân bah Hội đồng săch kan neh dak, 7 đồn biên phòng ndrel tiểu đoàn ntĭm nti cơ động tâm N’gâng kan rđau kan tahen n’gor Dak Lak mra ƀư ơm lơn du nar.

  ‘Phung hên tâm rgop đah n’gâng lan tâm nkuăl gay ma ndâk ăp ntŭk nklăch phiếu, ntŭk nklăch tâm ăp đồn biên phìng ndrel tiểu đoàn ntĭm nti cơ động ndrel nau nchrăp kan hŏ jêh. Nau kan bah rmôt tahen biên phòng ân geh mât njrăng ân nâp nkuăl n’har bri, njrăng rdâng phung lăp dak tih dôih tâm rnôk geh srê Covid-19 dôl ma tât jêr, phung hên mra pă nau kan ân tâm pleh tâm ntŭk nklăch phiếu săch, ăp rmôt ƀư nau kan tâm ntŭk ngai ntŭk săch kan ri ntrŭnh nau săch kan ân geh leo thùng phiếu êng gay ân cán bộ, tahen tâm ntŭk nê ƀư nau kan nklăch phiếu tĭng di Luật săch kan”.

Đah nau ƀư nchrăp ân nâp mpeh nuih n’hâm, drăp ndơ rnă njrăng, dak si tâm nrôk geh srê Covid-19 geh khuch bah Tahen Biên phòng Dak Lak ndrel uỷ ban săch kan tâm n’gor, ma rhiăng cử tri “grat ndrih” tâm nkuăl n’har bri Dak Lak hŏ nchrăp ân nar rgum têh, hăn nklăch phiếu gay ma săch luh ăp nŭih geh nau blau gay ma lăp kan tâm Quốc hội gưl XV ndrel HĐND ăp gưl năm kan 2021-2026./.

                                    Nŭih rblang: H’Thi