VOV4.M’nông: Nar aơ lơ 7/7, bơi tât du rkeh kon se tâm lam dak ntơm rơh thi tâm nar bôk năp bah rơh thi tốt nghiệp THPT năm 2021 rơh 1 đah 2 môn thi lah Ngữ văn ndrel Toán. Mông ôi, 7h30 kon se mra ƀư bài thi môn Ngữ văn, tĭng nau ƀư blau mĭn êng, mông ƀư lah 90 mnĭt. Bah năp nê, kêng măng naơ, ăp kon se tât ntŭk thi gay ma ƀư săm ƀŭt râng thi, ƀư nau rgâl nkra lah geh nau tih, djăt mbơh nar thi, nau ntrŭnh rnôk thi. Yor srê Covid-19 tât jêr ri ma ăp ntŭk thi kŏ ƀư nau ntĭm nti lor ăp nau kan njrăng rdâng srê gay ma nchrăp ân tŏng dak si, ndơ dŏng mpuh njrăng srê kơt: Bok put mbung, dak si rao kloh kman, mboi dak ndrel nchih lir nau nkah njrăng srê…Gay rơh thi geh ueh ndrel đăp mpăn, Kruanh n’gâng kan ntĭm nti Nguyễn Hữu Độ-Kruanh rnâng kan rđau kan bah neh dak mpeh nau thi tốt nghiệp THPT năm 2021, nkah: ăp ntŭk thi ân geh ƀư mbơh rjăp tât cán bộ, nŭih uănh thi nau uănh thi, kon se nkah n’hao nau kan tâm ăp nar thi gay đăp mpăn mô geh nau tât mô ueh.

Tâm bar nar 5 n'hanh 6/7, Sở Y tế Dak Lak hŏ uănh năl mham ngăch dăng chŏl SARS-CoV-2 an 150 nuĭh lah nai ntĭm uănh thi, giám thị, nuĭh rhŏ dŏng an nar thi n'hanh uănh năl mham ngăch an rlău 500 nuĭh râng thi tốt nghiệp THPT ta ntŭk thi Nhih nti THPT Lắk, Thị trấn Liên Sơn, nkuâl Lắk. Aơ lah nkuâl geh nuĭh ntưp Covid 19 dơi năl geh tât tơm nuh srê ta nkual ƀon têh Hồ Chí Minh n'hanh dôl an gŭ săm êng. Tât rnôk dja lĕ rngôch ăp ntil mham uănh năl an saơ mô mpơl đah nău ji da dê. Yơn lah gay đăp mpăn an rơh  thi ƀư đăp mpăn njrăng n'gang nuh srê Sở Y tế Đắk Lắk jao an Trung tâm Y tế nkuâl Lăk kan nsum an tĭng ƀư đăp mpăn pah kan njrăng n'gang nuh srê COVID-19 tâm du bông ƀư rơh thi tốt nghiệp THPT ta nkuâl./.  

Nuĭh rblang: Điểu Thân