VOV4.M’nông: Bôk nău kan “sóng n’hanh máy tính an oh” yor Chính phủ rgŏ jă lĕ n’hanh dôl nsrôih ƀư ta Dak Lak đah tât râng, rƀŏng tĭng bah âk gưl, nău kan n’hanh doanh nghiệp, nuĭh lŏng bôk tôr. Rlău du khay n’gul mbơh ƀư, bôk nău kan lĕ rgop geh rlău rnoh prăk n’hanh ndơ khlay rlău 5 rmen prăk. Tă bah nĕ rgop kơl an âk rnăk geh nău rêh jêr jŏt ta nkual jru ngai dơi mkra nău rvê đah ndoh ndơ, trong ƀoh an kon hŏk nti trực tuyến tâm rnôk chôt srê Covid-19 ta lam n’gor dŭt jêr jŏt.

Dâk kâp ƀư sam ƀŭt sam tra sŏk sim data an dơm bah tơm mạng Vinaphone yor VNPT nkuăl Cư M’gar ntop kơl ta ngih sam ƀŭt bah kon bu ur, nô Y Rít Kbuôr, du rnăk geh nău rêh jêr jŏt ta ƀon Sŭt Mđưng, xă Cư Suê an gĭt, nău ntop kơl aơ dŭt khlay. Rnăk wâl nô geh 2 nuĭh kon dôl nti tiểu học n’hanh trung học, nti trực tuyến da dê yor nu nău chôt srê Covid-19 geh jêr jŏt. Rnăk wâl nô mô geh prăk gay nthoi mạng internet, lah nglăp prăk điện thoại gay pơk 3G, 4G an ăp kon nti trực tuyến ri dŭt hoach, dŭt jêr đah rnăk wâl ach o kơt nô. Đah sim an dơm dăng ngăch dơi ntop kơl, nău rvê đah trong lăp an kon nti trực tuyến bah rnăk wâl nô lĕ dơi mkra:

          “Kon têh nti jrô 7, kon jêt nti jrô 1. Geh kon nti ôi, geh kon nti kêng măng. Nti tă bah điện thoại dơm, he an nsrôih dơm. Dŭt lah uĕh VNPT lĕ kơl, nta an kônh wa ta nkual jru ngai, gay kon sau dơi nti online”.

Nuĭh tơm mang tât tĭng ngih sam ƀŭt ntop kơl sim data an dơm

          Wa Nguyễn Thị Bích Ngọc, Hiệu trưởng ngih sam ƀŭt Tiểu học Lê Thị Hồng Gấm, xă Cư Suê, nkuăl Cư M’gar an gĭt, đah nău geh êng ta nkual jru ngai, nkual rnoi mpôl đêt, dŭt âk rnăk jêr jŏt n’hanh trong lăp an kon nti trực tuyến. Tâm rnôk nĕ, nu nău chôt srê ta ntŭk jêr jŏt, nău nti trực tuyến mbra hôm jŏ jong. Bôk nău kơl sim data an dơm bah ăp tơm mạng kơt VNPT, Viettel an me bơ̆ n’hanh nai lĕ kơl dŭt âk an nău ntĭm n’hanh nti bah ngih sam ƀŭt:

          “Aơ lah nău ntop kơl dŭt khlay, yor lĕ rngôch ăp oh jêr jŏt, mạng internet gay nti mô đăp mpăn. Jêng nău ntop kơl aơ dŭt uĕh an ăp oh tâm nău nti trực tuyến, ma nta an me bơ̆, yor me bơ̆ ta aơ jêr jŏt”.

          Lah ngoăy tâm âk doanh nghiệp hăn bôk năp tâm nău ƀư “sóng n’hanh máy tính an oh” ta ntŭk, wa Trịnh Văn Dũng, Groi kruanh tăch rgâl VNPT Dak Lak an gĭt, tă bah N’gâng kan ntĭm nti, ntŭk kan lĕ ntop kơl n’hanh ndơ rlău 1 rmen prăk. Ndrel đah nĕ, ntŭk kan lĕ ntop tay ăp trạm phát sóng gay đăp mpăn sóng an kon se nkual jru ngai nti trực tuyến. Nkre, ta ăp ntŭk gưl nkuăl ntơm ntop kơl sim data, ntop kơl prăk an dơm tĭng nu nău ngăn:

          “Chôt srê Covid-19 dôl geh jêr jŏt kơt aƀaơ lĕ rngôch ăp ngih sam ƀŭt ta nkual mô hŏ nti rgum. Ăp oh an nti tă bah online n’hanh tâm rnoh nĕ dŭt âk rnăk ăp oh jêr jŏt, mô geh ndơ, mô geh trong lăp gay gĭt nău nti. Ntoh bah nĕ, tă bah n’gâng kan nĭm nti, VNPT lĕ ƀư ndơ ntop kơl geh máy tính bảng n’hanh sim data, ndơ ntop kơl aơ khlay 1 rmen prăk”.

Rlău 400.000 kon hŏk ta Dak Lak hôm e dôl nti trực tuyến.

          Tĭng rnoh kơp uănh bah N’gâng kan ntĭm nti n’gor Dak Lak, jêh du khay n’gul ƀư bôk nău kan “sóng n’hanh máy tính an oh”, tât aƀaơ lam n’gor lĕ dơn geh prăk ntop kơl n’hanh ndơ khlay rlău 5 rmen prăk. Tâm nĕ, êng cán bộ, nuĭh kan, nuĭh pah kan tâm công đoàn lĕ rgop geh nklăp 4 rmen prăk an tơm prăk nkrem “máy tính an oh”. Hôm ƀa ƀă yor ăp doanh nghiệp, nuĭh lŏng bôk tôr ntop kơl. Wa Đỗ Tường Hiệp, Groi kruanh N’gâng kan ntĭm nti n’gor Dak Lak an gĭt, prăk n’hanh ndơ lĕ rgop mbra dơi njuăl năp an ăp n’gâng kan ntĭm nti. Tĭng tâm nău ngăn, ăp jrô kan mbra năp rwăt ndơ an ăp kon hŏk geh nău rêh jêr jŏt geh tâm rnăk ach o, rnăk êp ach o, kon hŏk jêr jŏt tă bah khuch bah srê Covid-19. Aƀaơ bôk nău kan hôm e dôl rgŏ jă tay tâm rgop gay rgŏ jă lĕ kon nuĭh tât râng:

          “UBND n’gor lĕ ntĭm rđău N’gâng kan ntĭm nti tâm ôp tâm nchră trong nchrăp gay rgŏ jă lam kon nuĭh, ăp ngih pah kan, nău kan tâm trong chính trị kơt nuĭh ƀon lan ta n’gor Dak Lak râng kơl, rgop kơl an nău kan ntĭm nti, an ăp kon hŏk jêr jŏt, lah ăp oh ach o, kon hŏk geh khuch tă bah srê Covid-19 dơi geh máy tính, ndơ nti trực tuyến uĕh ngăn, đăp mpăn nău rlu tât ngih sam ƀŭt yơn mô geh rlu nău nti”.

          Lam n’gor Dak Lak aƀaơ geh rlău 400.000 kon hŏk ăp gưl, yor nu nău srê Covid-19 geh jêr jŏt, kon hŏk lam n’gor dôl an nti trực tuyến. Yơn lah, tĭng kơp uănh bah nău kan ntĭm nti, geh tât rlău 76.000 kon hŏk mô geh ndơ dŏng, trong lăp gay nti trực tuyến, ăp ngih sam ƀŭt aơ lĕ rngôch geh tâm ăp rnăk ach o, êp ach o ta nkual jru, ngai. Nău ntop kơl bah ăp gưl, ăp nău kan n’hanh doanh nghiệp, nuĭh lŏng bôk tôr tă bah bôk nău kan “sóng n’hanh máy tính an oh” dôl nsĭt tât nău răm an âk kon hŏk nkual jru ngai, kơl an nău ntĭm n’hanh nti dơi dơh lơn./.

          Nuĭh rblang: Y Sưng Phê Ja