VOV4.M’nông: Năm aơ rlau 80 năm ma bu ranh Y Yơh Kbuôr tâm nkuăl ƀon têh Buôn Ma Thuột, n’gor Dak Lak hôm gơih ma ăp nau kan bah ƀon lan. Geh bu rnơm ƀư bu ranh ƀon, Kruanh rnâng kan mặt trận, Kruanh rmôt kan bu ranh ƀon tâm âk năm, wa mro nsôih đah nau kan. Ăp nar rlau aơ, wa kŏ lah nŭih gơih ngăn ndrel ăp rmôt êng hăn tât ăp ngih gay ma nkoch trêng, bonh đă ƀon lan ƀư nau njrăng, rdâng srê ndrel kơl ân tơm prăk njrăng srê tâm nkuăl.

Ntơm rnôk geh srê Covid-19 tal 4 tâm Dak Lak, tâm ăp măng, bu ranh Y Yơh Kbuôr, ta ƀon Kmrơng Prong A, xã Ea Tu, nkuăl ƀon têh Buôn Ma Thuột, lŏ ndrel ma kruanh rmôt liên gia tât ăp ngih tâm ƀon gay ma đă ăp nŭih kơt tĭng nau ntrŭnh njrăng rdâng srê, nkah đă ăp rnăk geh nŭih băl mpôl hăn ngai ri sĭt mbơh dak si ndrel nkhah êng tâm ngih. Wa H’Ó Kbuôr, nŭih ƀon Kmrơng Prong A, xã Ea Tu, nkuăl ƀon têh Buôn Ma Thuột mbơh, bah nau mbơh klơ Radio ndrel ăp nar nkoch bri ma bu ranh Y’Yơh, rnăk khân păng geh nau blau ueh lơn tâm nau njrăng rdâng srê Covid-19 bah Chính phủ:

  ‘Gâp kŏ vay geh djăt nau nkoch trêng mpeh ăp nkô̆ nau mpeh nau kan geh tât srê ji ndrel ăp nau njrăng rdâng srê tâm rnăk vâl nơm jêh ri kŏ kơt tĭng ân rjăp. Jêh ri ăp nau bonh đă kuăl jă nau rgop kơl an ri nơm kŏ kơl an, geh đê̆ rgop đê̆t, geh âk rgop âk, nsing tâm nau geh bah nơm dơm”.

Ƀon Kmrơng Prong A rnôk aơ geh bơi tât 550 rnăk đah 2.200 nŭih, âk ngăn lah rnoi rđe gŭ rêh. Bu ranh leo trong, rnâng kan mât njrăng ân rjrăp nau kan, ri ma ăp nau kan ndâk njêng văng sa, mât rnă njrăng văn hoá geh âk mpưm kônh wa kơt tĭng. Ndri ma, tât nrôk aơ hôm geh mât âk blah chĭng khlay, yănh khlay, nah ao tanh, ndoh ndơ ơm, ndrâk dak, ngih jong. Ăp rnôk ƀon lan geh nau tâm jin tâm lah, ăp nŭih ndrel gŭ nchră tih, di, bol ma geh âk nau têh mhe, yơn Ƀon Kmrong Prong A hôm lah ƀon Rđe ueh nau ơm ngăn:

  ‘Ăp nŭih ƀon lan, druh ndăm tâm ƀon lan hŏ geh nau tâm ban nuih n’hâm ndrel kơt ƀư tĭng ueh ri ma phung hên rhơn ngăn. Tal bar lah mpeh n’hâm soan mât nau vay ơm, nau vay ueh, ôp brah mô lah lih n’hâm soan, ôp brah ndrâm dak ri phung hên, kruanh ƀon, ăp rmôt kan, ăp rmôt bu ranh ƀon kŏ ndrel tâm rgop nsum, nkah đă ăp nŭih ƀon lan ndrel mât ân nâp ueh”.

Ntơm rnôk geh nau ntrŭnh bah UBND nkuăl ƀon têh Buôn Ma Thuột ndrel Xxa Ea Tu mpeh nau kơl prăk nkra trong, ƀon Kmrơng Prông A hŏ ƀư rƀŭn ƀon lan ndrel ăp mrôt ƀư nau kan nchră ân tâm ban rnon rgop kơl an, nau kơl an, nau mêt uănh. Đah ăp rnăk ê geh tâm rnơm, bu ranh Y Yơh hŏ ndrel ma n’gâng kan, rmôt mât njrăng tât ăp ntŭk gay ma nkoch, bonh đă, mbơh nkoch nau geh jêng bah nau nkra trong, nkra ndăn rnôk râng ăp nar rgum rƀŭn, ngêt sa, khĭt ôm tâm ƀon gay ma nkoch tay ân ƀon lan gĭt. Đah nau mbơh nkoch ueh, nơih, bu ranh Y Yơh hŏ dơi bonh đă, njêng nau tâm ban nuih n’hâm bah ƀon lan. Êng nau rgop nsum lah 200 rbăn/rnăk, ăp rnăk hôm rgop geh tay 40 rbăn du mét neh tĭng trong jong. Rlau ma nê  kônh wa ntrơn êng n’gâng n’gar, koh lơi tơm si gay ma pơk hvi trong hăn 6m jêng 8m tĭng ƀon lan mhe. Ndri ma, knŭng geh khay, ăp trong hăn tâm ƀon kŏ geh tŏ chai da dê.

Wa Bùi Văn Hượng, cán bộ văn hoá xã Ea Tu, nkuăl ƀon têh Buôn Ma Thuột mbơh: Đah nau kan nâp, nau gĭt kloh mpeh nau vay rnoi nơm, bu ranh Y Yơh hŏ jêng ntŭk nsing mpeh nuih n’hâm ân ƀon Kmrơng Prông A. Nau gơih kan bah bu rsanh hŏ kơl an ân ƀon lan mât nau ueh ơm văn hoá tâm âk năm ndrel ƀư jêh ăp nau kơp dơn ƀon lan ,he. Đah rlau 30 năm ƀư nau kan mặt trận, ƀư kruanh rmôt bu ranh ƀon bah xã tâm âk năm, bol ma moh nau kan, wa Y Yơh kŏ nsôih ƀue ueh ăp nau kan bah cán bộ tâm dâng, tâm ƀon gay ƀư jêh nau kan geh jao, ƀư ueh nau kan bah nơm gay ma tâm rnglăp rgum ƀon lan, ƀư leo lor tâm ăp nau kan. Wa Y Yơh nơm kŏ lah nŭih leo lor tâm nau mât nau vay oưm, răk rong oh kon ân ueh. Wa lah nŭih ƀư nkre ma nau ngơi, ri ma ƀon lan ryơk, rnơm. Ngăn lah, rnôk ƀư kruanh rmôt bu ranh ƀon,  păng hŏ kơl ƀpn lan ƀư ueh nau kan bah ăp nŭih đah ăp nŭih ƀon lan ăp ƀon:

  ‘Hội đồng bu ranh ƀon kŏ geh nau nkah đă ân ăp bu ranh ƀon, nkoch trêng, bonh đă ăp bu ranh ƀon êng ƀư ân ueh nau kan mât ân oh kon nơm mô dơi geh lăp dŏng ăp nau tih ndrel kơt tĭng ăp nau njrăng rdâng srê Covid-19. Rmôt bu ranh ƀon kŏ rânh ăp nau kan ƀư mât ndray nau vay ơm bah rnoi nơm, ntĭm nti oh kon ƀư ueh nau kan hăn tahen, mô geh tih pháp luật”.

Tâm dăch đah ƀon lan ndrel gĭt  nau mĭn bah ƀon lan, rlau 30 năm ma aơ, bu ranh Y Yơh Kbuôr hŏ jêng nŭih tơm tâm nau tâm rnglăp bah ƀon Kmrơng Prong A nkoch êng ndrel bah ăp ƀon lan rnoi mpôl đê̆ tâm xã Ea Tu lah nsum. Đah nau kan “hăn tât ăp trong, goh mpông ăp rnăk”, bonh đă ân ƀon lan, geh nau blau ngơi, bu ranh Y Yơh lơn ma geh ƀon lan ŭch rŏng, rnê kơt. Rnơm nê hŏ rgop nau ƀư ueh lơn nau kan binh đă ndâk njêng nau rêh mhe tâm ƀon lan, ƀư rjăp nau tâm rnglăp đah ƀon lan ăp rnoi tâm ƀon lan./.

Nŭih rblang: H’Thi