VOV4.M’nông: Mhe geh tâm rơh rƀŭn trực tuyến bah Rnâng kan Chính phủ đah 27 n’gor, nkuăl ƀon têh tâm nkuăl mpeh ba dâng tă bah Phú Yên tât Cà Mau mpeh nau kan njrăng, rdâng srê Covid-19. Ntoh nau ta nar rƀŭn, Thủ tướng Phạm Minh Chính đă ân geh ƀư tĭng ueh nuih n’hâm tâm rnglăp rnoi mpôl, lam ntrong kan chính trị, nsum mpôl, ƀon lan, ntŭk kan tăch rgâl, nsum nau kan, pă mbơh ăp nau njrăng srê.

Ta rơh rƀŭn, ăp ntoh măt rgum nchră nau kan dôl geh bah srê Covid-19 rnôk aơ ndrel nau nchrăp mbơh nau kan tâm rơh tât, nau tă geh, nau ê hŏ dơi tâm nau ƀư nau kan, ngăn lah nau rđau, ƀư nau kan, nau tâm rgop nsum đah ăp n’gâng kan, ntŭk kan gay ma njrăng rdâng srê ân nâp lơn, tâm nuih n’hâm mât n’hâm soan ƀon lan lah nau tơm, ê lor, kơl an bôk năp tâm du đê̆ nkuăl rnôk aơ lah njrăng, rdâng srê Covid-19, ăp ntŭk đăp mpăn, ri hôm geh mât nau kan ê nkra, hun hao văng sa. Mbơh nau ta nar rƀŭn, Kruanh n’gâng kan dak si Nguyễn Thanh Long mbơh, nau geh srê tâm dak hôm ơm geh nau jêr:

‘Ngăn lah rnôk aơ lah nau tât bah srê delta tâm lam dak, ntil kman aơ lơi ăp nau khuch tât lam ntur neh. Ndri mhâm nơm saơ lah rơh aơ păng tĭng geh ntưp jêng rkŭm, tĭng ntrong, geh âk nŭih ji tâm du rơh kơt nê. Yor lah ntil srê nê bah ăp nŭih geh ntưp ri păng leo nau ji ngăch lơn ndrel rơh geh ân lah rnôk ndum nau ji păng ngăch lơn bah năp. Phung hên kŏ mbơh đah ăp nkuăl đah ăp ntil srê mô geh kơt ntơm, ân geh rdâng ma nau ngăch lơn, dăng lơn, ân geh mât ân nâp ndrel nsôih ân rjăp lơn”.

Bah năp nau tât bah srê geh tât jêr, nkuăl ƀon têh Hồ Chí Minh hŏ nchrăp rdâng, tĭng Kruanh nkuăl ƀon têh Nguyễn Thành Phong, nkuăl ƀon têh mra nchrăp ma nau rdâng rnôk geh 20 nŭih ntưp srê:

‘Nau nchâp bah nau hao âk mpeh rnoh nŭih ntưp bah năp nau ƀư nau rđau nau ntrŭnh mrô 16, nkuăl ƀon têh rgum nkra ndrle leo dŏng 5 ngih chung cư dôl gŭ lơi dơm bah ntŭk ndâk ntŭk gŭ mhe ta Phường An Khánh, nkuăl ƀon têh Thủ Đức đah nau dăng geh 24 rbăn nsưng bĭch ndrel ntŭk kơl ndâk n’hâm soan đah ngih ueh mhe ndrel geh nau dơi kơl an ntŭk sŏ n’hâm ndrel du tŏ tât 1000 nŭih ji, tât rnôk aơ nkuăl ƀon têh mra dơi geh lah rjăp lah hŏ mra dơi ân nau rdâng rnôk geh 20 rbăn nŭih ntưp srê”.

Jêh rnôk djăt ăp nau tâm nchră bah ăp nkuăl ndrel n’gâng kan, lôch rơh rƀŭn, Thủ tướng Chính phủ ndrel ăp n’gor n’gor hŏ geh dơi tâm rơh rlau aơ, hŏ nsôih lôch n’hâm, yor n’hâm soan, nau rêh bah ƀon lan. Thủ tướng đă ân geh nau kan ân dăng, rjăp, tâm di, mât ân dăch nau kan, ngăch, săk tam lơn gay tŏng nau nkân njrăng, njrăng rdâng srê, uănh mât săk jăn, n’hâm soan bah ƀon lan lah nau klơ lor, mô ân nŭih mô tŏng sa, mô tŏng nsoh, ndoh ndơ sa tâm rnôk aơ, rgum nau kơl săm nŭih geh srê, n’huch dêh ngăn rnoh nŭih khĭt, mât rnă njrăng đăp mpăn chính trị, đăp mpăn nau rêh jêng ân ƀon lan tâm moh nau tât, mât ân rjăp nkaưl n’har bri mô ân nŭih luh dak toh dôih, mât ân rjăp ăp ntŭk, tăch, dŏng ndơ. Mpeh nau mĭn rđau kan, Thủ tướng lah rjăp ân geh ƀư ueh n’hâm dăng tâm rnglăp rnoi mpôl tâm nau njrăng rdâng srê:

‘Tâm ban du nuih n’hâm “rdâng srê kơt rdâng phung rlăng”, nsôih ƀư ân săk tam lơn ăp nau tât tă bah nau njrăng rdâng jêng nau lơh. Sŏk nau njrăng rdâng srê lah nau tơm, nau kan ƀư, jŏ jong, ntrŭnh leo. Rgum n’hâm dăng nau tâm rnglăp lam rnoi mpôl, lam ntrong kan chính trị, nsum mpôl ƀon lan, ntŭk kan tăch rgâl, nau ƀư kan, ndrel nsum ƀư nau kan njrăng rdâng srê, ƀư ăp nau kan, nau ntrŭnh hŏ geh ăp gưl n’gâng kan ntrŭnh, têm. Kơt tĭng ƀư ân ueh ngăn nuih n’hâm njrăng êng, blau nayu kan mhe, nchrăp ƀư tâm nau kan bah ăp gưl, n’gâng kan, nkuăl, Nau kan mhe ân geh nau ndơn lăp mhe, ân geh mât dăch nau kan, nsing tâm nau kan ngăn gay leo nau tâm ân di, ƀư ueh nuih n’hâm blau mhe, nchrăp lor. Ăp xã, phường, ngih máy, ntŭjk kan, rmôt kan ân geh lah ntŭk ƀư nâp gay ma njrăng rdâng srê, ăp nŭih ƀon lan lah du nŭih leo lor tâm nau kan njrăng rdâng srê”.

Êp nê, ân geh ryơk nau geh jêng tâm di pháp luật bah ƀon lan, n’hao nau săk tam nau kan kơl an ƀon lan. Râng nau njrăng rdâng srê lah nau kan, nau dơi ndrel nau ueh jêng bah ƀon lan. Gưl uỷ, n’gâng kan, ntrong kan chính trị ăp gưl ân geh ntoh kloh ngăn lah ntŭk rnơm ngăn bah ƀon lan, njêng nau jêr, nau ntul rlong lah nau kan têh jêng, ƀư kơl an ƀon lan ueh lơn. Kuăl jă ƀon lan râng nau kơl an, nkoch mbơh nau ân ƀon lan ƀư ân rjăp ăp nau ntrŭnh bah Ngih dak mpeh nau njrăng, rdâng srê ndrel nau ê nkra, tăch rgâl. Ndơn kơt ăp nau kan, nau tă dơi geh, nau ntĭm nti ueh, ntoh lư tâm nau njrăng rdâng srê.

Ăp nkuăl geh âk ntŭk ntưp rgum geh nchueng rdâng, ơm đăp mpăn nau kan. Nsing ngăn ăp rnôk gay ma ntrŭt dăng nau kan tăch rgâl, ndâk ăp ntŭk kơl an, ntrong mbơh kuăl, nau kan tâm di, rjăp tâm nau ndâk trong mạng dŏng nau kan nkoch mbơh nau gay ƀon lan nkoch mbơh ăp nau jêr, nau kol tâm ăp rnôk, gay ƀon lan rgop, mbơh tâm nau kan njrăng, rdâng srê. Tâm ăp rnôk dŏng nau rđau rmô 15, 16 ri ân geh ƀư ueh nau mĭn ân ƀon lan, mât chăm nau rêh nuih n’hâm ân ƀon lan, n’huch nau ji nuih bah ƀon lan. Âp ntŭk nkoch mbơh nau ân năn, ngăch leo nau mbơh gay ƀon lan nsôih râng nau kan njrăng, rdâng srê.

Thủ tướng đă, ăp gưl kan, ntŭk kan, nkuăl ân nsôih âk lơn, nsôih prêh lơn, moh nau kan ân ƀư kloh nau nê ơm ngăch nsrŭng bah srê ji, leo nsĭt nau rêh đăp mpăn ân ƀon lan, ƀư ân dơi nkô̆ nau bar ntil kan./.

Nŭih rblang: H’Thi