VOV4.M’nông – Bu ur Thủ tướng bôk năp bah Thụy Điển Magdalena Andersson lĕ ndrăt ndal mbơh dăn rlu kan knŭng đêt mông jêh dơi săch. Ntoh ngơi tâm rơh rƀŭn mbơh nar 24/11, wa Magdalena Andersson an gĭt lĕ njuăl sam ƀŭt dăn mô hôm săch an Quốc hội dak aơ. Nău dăn rlu kan bah bu ur Thủ tướng mhe dơi săch geh jêh rnôk nuĭh kan ndrel tâm liên minh djôt bôk, đảng Xanh mbơh rklaih luh chính phủ yor nău tâm rkeh prăk kaih. Bah năp nĕ, dự thảo tơm prăk yor chính phủ Thụy Điển dăn đă lĕ mô dơi geh rnoh phiếu tâm quốc hội yor lĕ rngôch ăp nghị sỹ lŏ mô kơl dự thảo bah mpôl dun rlơn. Knŭng đêt mông bah năp nĕ, Quốc hội Thụy Điển mhe nklăch phiếu năl wa Magdalena Andersson, kruanh đảng Dân chủ Xã hội nkre lah Kruanh N’gâng kan prăk kaih dak aơ, mât ƀư Thủ tướng n’hanh lah bu ur thủ tướng bôk năp bah dak aơ. Nchrăp, wa Magdalena Andersson dơi geh đah du rơh nklăch phiếu êng bah Quốc hội tâm nar tât.

Nŭih blang: Y Sưng Phê Ja