VOV4.M’nông: Ôi lơ 17/9, ta Thủ đô Phnom pênh, Thủ tướng Campuchia Hun Sen hŏ ntơm rgŏ jă nau kan chuh n’gang vắc xin njrăng Covid-19 ân kon se ntơm 6-12 năm tâm lam dak. Nar rgŏ jă geh tâm Ngih kđăch Hoà Bình đah kon se jê̆ bôk năp geh chuh lah sau bah Thủ tướng Hun Sen ndrel ăp n’gâng kan gưl prêh bah Chính phủ dak Campuchia. Nchrăp tâm lam dak Campuchia geh rlau 1,8 rkeh kon se tâm năm aơ mra geh chuh. Ăp kon se kŏ geh chuh đah vắc xin Si-no-vac, ntil vắc xin geh dŏng ân ƀon lan Campuchia ndrel kon se ntơm 12-18 năm tâm nau chuh bah năp nê. Thủ tướng Hun Sen ân lah, nau chuh njrăng aơ lah nau kan gay ma đăp mpăn nau dơi rêh, nau dơi mât chăm n’hâm soan ndrel nau dơi geh râng tâm nau kan rêh jêng ndrel ntĭm nti bah kon se./.

Nŭih rblang: H’Thi