VOV4.M’nông – Chính phủ Afghanistan n’hanh rmôt Taliban lĕ tâm ban ŭch ntrŭt ngăch ăp nău rdâk nkra đăp mpăn ta dak aơ, nkre ăp rơh tâm nchră gưl prêh. Yơn lah, 2 ding mô hŏ dơi geh tâm ban ŭch mpeh ăp nău rlu pănh n’hanh n’hŭch n’hao tâm lơh. Aơ lah săk rnglăy jêh rơh tâm nchră tâm dak Afghanistan jŏ 2 nar dŭt pơh bah năp ta Doha, Qatar. Jêh rơh rƀŭn, Kruanh Hội đồng gưl prêh rsaih nkra nău ngih dak Afghanistan Abdullah Abdullah, kruanh mpôl tâm nchră bah chính phủ Afghanistan đah Taliban mĭn lah rơh mâp lah di uĕh an 2 ding tâm nkoch na nê̆ mpeh nău mĭn êng nơm bah ăp ding. Tĭng nău mbơh nsum jêh rơh rƀŭn, 2 ding lĕ tâm ban ŭch ndrel joi nău nsum gay ndơ̆ neh dak rklaih nu nău aƀaơ.

Nŭih rblang: Y Sưng Phê Ja