VOV4.M’nông – Ăp nuĭh kruanh dak si Cuba an gĭt ăp nuĭh gŭ mĭn njêng dak aơ dôl n’hao nkra vaccine dơi hun hao n’hanh nkra njêng tâm dak gay rdâng đah ntil kaman Omicron. Cuba đah jâng wăng sa knơm tâm âk nău pâl nđaih lĕ pơk lhoi ăp nău ntrŭnh luh lăp đah dak bah dih kơp bah n’gul khay 11 jêh rnôk chuh njrăng n’gang an âk nuĭh ƀon lan dak aơ. Knơm rnoh chuh njrăng n’gang âk rnoh nuĭh ntưp n’hanh khĭt yor Covid-19 ta Cuba lĕ hŭch âk. Dơi gĭt vaccine Soberana bah Cuba dơi mât njrăng dun n’gang ntil kaman Omicron, yơn lah aƀaơ mô hŏ gĭt na nê̆ rnoh mât njrăng m’hâm dơi. Yor rĭ, Viện vaccine Phin-lây bah Cuba lĕ ntrŭnh hun hao vaccine Soberana Plus đah Prô-tê-in RBD gay rdâng đah ntil kaman Omicron.