VOV4.M’nông - Hôm ta Lâm Đồng, mĭn lah n’gâng kan ta ntŭk dôl mô ru đah nău kan njrăng n’gang nuh srê Covid-19 n’hanh nchăp pah kan bầu cử, nău kuĭh joi lŭ choih hŏ ntoh âk ta xã Hiệp An, nkuâl Đức Trọng (Lâm Đồng). Mô kă rnam, mô mpôn mo, kuĭh joi lŭ choih tâm măng n’hanh nar rlu kêng dŭt pơh kơt ntơm nơh đŏng ôh, nău kan kuĭh joi lŭ mô geh nău way an mpơl saơ tâm nar dĭl, geh ntŭk dơn ngai đah nhih pah kan UBND xã bar pe rhiăng mét dơm.

         Ta lôk neh mir 283, n’ha rđaih bản đồ địa chính 6A gŭ êp bri n’ho uĕh nđĭr, âk rbăn mét khối neh, lŭ lĕ geh du hê lăn sŏk, ndơ̆ hăn ntŭk êng tăch. Ta ntŭk, nău sŏk hôm e âk, rgâl lĕ nkual aơ jêng du ntŭk nkra njêng. Rnôk mpôl hên mhe tât, ăp ndeh rdêng têh, măy koar lŭ n’hanh âk phung pah kan lĕ nchoăt du lêng lang. Tâm mnĭt, ntŭk ƀư knŭng hôm du măy kuih jêt mô geh bu nuĭh.

         Ntŭk sŏk lŭ choih mô tâm di aơ lĕ pah kan hô tâm âk khay bah năp, dŭt êp nkual ƀon lan gŭ, tă bah Ngih pah kan UBND xă mô tât 2km, yơn n’gâng kan ƀon lan xă Hiệp An knŭng rmal hành chính du tơ̆ geh nău way dơm tâm nar 27/4. Wa Uông Thanh Hải, Công chức địa chính xă Hiệp An an lah, ơm mô geh saơ ngăch ăp nău tih yor nuĭh ƀư ntŭng, tâm rnôk rmôt cán bộ công chức xă đêt n’hanh geh âk nău kan nsum.

Hang rbăn khối neh lŭ ta aơ lĕ rdêng hăn tăch

         “Mpôl hên kon nuĭh ri đêt jêng mô dơi uănh nđôi lĕ rngôch ăp nău kuih koai neh, jêh nĕ sŏk lŭ mô tâm di nău way. N’hêl na nê̆ lah nău dŭt âk nkôp đah mpôl hên. Bah meng nĕ, ăp tơ̆ mpôl hên hăn, ăp ndeh lĕ rhoăt sĭt, mô dơi ban nhŭp ri mô geh nkô̆ nău gay rmal nău tih sŏk joi lŭ meh mô tâm di nău way”.

         Cán bộ mât uănh ri nduih tih yor bu ƀư, yơn ta du ntŭk êng êp Quốc lộ 20, tă bah UBND xă Hiệp An rhiăng mét geh nu nău tâm ban đŏng. Ăp ndeh kuih têh dah rŏng ŭch kuih koai, sŏk joi mô tâm di ta nŭng nar dâl yơn n’gâng kan ƀon lan uănh kơt mô gĭt. Knŭng tât rnôk mpôl hên sŏk mpơl rup n’hanh ôp, ntŭk sŏk joi lŭ neh aơ dơi an đŏng lah mô ri kruanh UBND xă Hiệp An mư ƀư rmôt hăn uănh nđôi, năl nău tih n’hanh ƀư sam ƀŭt rmal tih hành chính.

Ntŭk sŏk lŭ neh mô tâm di nău way ta xă Hiệp An

         Wa Hồ Hữu Hiếu, Kruanh UBND xă Hiệp An mĭn lah, n’gâng kan xă mô geh thơ tha, mô dơi mkra nău kuih koai neh ntu, sŏk joi lŭ neh mô tâm di nău way. Wa an lah, geh nu nău aơ yor ntŭk ntô hvi, neh ntu jêr jŏt, ăp nuĭh tih way pah kan tâm nar rlu, klong mang jêng jêr saơ. Yơn wa Hồ Hữu Hiếu an lah, xă mbra nsrôih mkra rgâl.

         “Rnôk bah năp, UBND xă rmal dŭt âk nuĭh tih. Yơn lah, yor Hiệp An geh neh ntu têh hvi, jêr jŏt, ăp nuĭh dŏng tâm ăp nar rlu, mông rlu, klong măng gay sŏk joi mô tâm di. Tâm nar tât, xă Hiệp An mbra nsrôih rmal ăp nuĭh tih, ƀư tay đăp mpăn nu nău tih chŭk kuih neh, kơt sŏk joi lŭ neh mô tâm di nău way ta xă”.

Măy mŏk dŏng sŏk joi lŭ neh mô tâm di mô hŏ năn ndơ̆ luh bah dih ntŭk ƀư

                   “Mbra nsrôih” rmal gay ƀư đăp mpăn, nău mĭn lah bah kruanh xă Hiệp An, nkuăl Đức Trọng, n’gor Lâm Đồng an saơ, ta năp đaơ xă mât uănh mô hŏ nsrôih. N’hanh nău nĕ lĕ rblang an nu nău sŏk lŭ choih mô tâm di nău way ta ntŭk aơ, hôm e geh saơ rah wah kơt ntul rlong nău lư n’hanh luật pháp.

Nuĭh rblang: Y Sưng Phê Ja