VOV4.M'nông:  Đại sứ ăp dak lăp kan nsum gưl têh Đông Á (EAS) mhe geh rơh hop pơk sŏng dăng gay tâm nchră âk nkô̆ nău khlay. Rơh hop hŏ tâm ôp nău n'hanh uănh năl mpeh nô nău dak bah dih n'hanh nkual kơt nô nău Myanmar, nkô̆ nău ƀư bah hạt nhân ta gôl dak Triều Tiên n'hanh dak lêng. Ta năp nău tât krit nji bah nuh srê Covid-19, ăp dak tâm ôp nău tă ơm gĭt kan n'hanh ăp nău nsrôih tâm trong njrăng n'gang nuh srê, nkre lah rjăp nău tâm ton tâm boh, ntop kơl n'hanh ntrŭt ntrôl an chuh n'gang vaccine lam ntŭr neh. Ăp dak băl tâm boh lah rjăp nău ŭch tĭng kơl ASEAN n'hanh nău khlay rgum tơm bah ASEAN tâm trong nkra ăp nkô̆ nău tâm nkual, rgop mât đăp mpăn n'hanh rnă njrăng tâm nkual. Tâm ôp mpeh rêng tâm nchră Nkôp nău way mât uănh ta dak lêng, ăp dak ŭch rŏng ASEAN n'hanh Trung Quốc rdâk njêng nkôp nău way mât uănh geh nău tam, ngăn ngăn n'hanh tâm di đah luật pháp dak bah dih./.

Nuĭh rblang: Điểu Thân