VOV4.M’nông - Tĭng ƀư Nghị định 55 năm 2015 bah Chính phủ mpeh trong kơl manh tơm prăk gay ntuh kơl tuch tăm, mât rong, ƀon lan, ntơm bah năm 2015 tât aƀaơ, ăp nhih pah kan an manh prăk ta nkuâl ach o 30a Dak Glong, Dak Nông hŏ n’gluh an ăp rnoh prăk manh dơh an nuĭh ƀon lan ntuh kơl tuch tăm, mât rong, hun hao wăng sa. Lôch 6 năm an tĭng ƀư, nơm geh dŏng saơ ntil tơm prăk manh tâm nău kan tuch tăm, mât rong, tăch rgâl, âk trong ntĭt leo wăng sa nsĭt geh hang rhiăng rkeh prăk ăp năm, lôch nê kơl an nuĭh ƀon lan klaih rlău ach o.

         Rnăk wa K’Soạn (rnoi Mạ) ta thôn 9, xă Quảng Khê, nkuăl Dak Glong, n’gor Dak Nông geh 5 ha mir cà phê tăm srah sầu riêng n’hanh bơ. Wa K’Soạn an gĭt: năm e mir an geh rlău 9 tấn cà phê rlăi, 8 tấn bơ n’hanh nklăp 20 tấn sầu riêng. Nkŭp ăp prăk dŏng ntuh kơl rnăk wâl geh bơi 200 rkeh prăk. Dơi geh kơt aƀaơ lah knơm dŏng săk rnglăy tơm prăk manh ntuh kơl nkra njêng bah Chi nhánh ngân hàng Nông nghiệp n’hanh Phát triển Nông thôn nkuăl Dak Glong.

Cán bộ ngân hàng groi nđôi, ntĭm nuĭh ƀon lan dŏng prăk manh di nău ŭch

         “Bah năp đaơ rnăk wâl gâp lah rnăk ach o bah thôn. Năm 2016, Ngân hàng Agribank ta nkuăl Dak Glong an rnăk manh 70 rkeh prăk, sĭt ntuh kơl rwăt phân, dak si tơm tăm gay mât chăm hun hao mir cà phê. Jêh rnôk tăch cà phê, prăk nsĭt geh ntop ntêm nkrem rnăk wâl ntuh kơl tay rwăt 300 tơm bơ, 300 tơm sâu riêng sĭt tăm. Tât aƀaơ sŏk geh bah cà phê, sầu riêng n’hanh bơ nklăp 350 rkeh prăk/năm, jêh nkŭp ăp prăk dŏng ntuh kơl ri hôm e nsĭt geh 180 rkeh prăk”.

         Hôm wa K’Lem ta thôn 9, xă Quảng Khê nkoch: bôk năm 2016, wa dơi Ngân hàng Nông nghiệp n’hanh Phát triển Nông thôn nkuăl Dak Glong an manh 120 rkeh prăk. Lĕ rngôch prăk dơi ntuh kơl phân poh, dak si tu ndrŭng mât chăm 4 ha cà phê n’hanh rwăt tay 2 mlâm ndrôk me. Ndơ sŏk bah cà phê n’hanh tăch kon ndrôk, ntop đah prăk manh tay rnăk wâl ntuh kơl rwăt kuih rli neh. Tât aƀaơ, nsĭt geh bah mât rong, tuch tăm n’hanh dŏng măy kuih du năm geh rlău n’gul rmen prăk. Wa K’Lem lah: knơm ngân hàng ma rnăk wâl lĕ rklaih ach o.

         “Tâm rnôk manh prăk bah ngân hàng nta an manh dŭt ngăch, dơh. Rnôk manh geh prăk rnăk wâl ntuh kơl phân poh mât chăm mir cà phê, rwăt 2 mlâm ndrôk me. Jêh nĕ geh bah cà phê, ndrôk deh, rnăk wâl rwăt tay du bôk ndeh kuih sĭt kuih rli an kônh wa. Aƀaơ du năm prăk nsĭt geh rlău 400 rkeh prăk. Prăk ntêm nkrem geh âk năm bah năp rnăk wâl dŏng gay ƀư du mlâm jay khlay nklăp 450 rkeh prăk, du gâl ntêm gay mât an oh kon hăn nti n’hanh ntuh kơl nkra njêng tay”.

         Quảng Khê lah xă nkual jru ngai bah nkuăl Dak Glong, n’gor Dak Nông. Lam xă geh 3.000 rnăk, rlău 13.000 nuĭh, đah 27 rnoi mpôl gŭ rêh. Rnoh rnăk ach o ta aơ ăp năm bah năp âk mro. Wa Trần Ngọc Thuận-Groi kruanh UBND xă Quảng Khê an gĭt, ƀư tĭng Nghị định 55/2015 bah Chính phủ, ăp rmôt an manh tâm nĕ geh Chi nhánh Ngân hàng Nông nghiệp n’hanh Phát triển Nông thôn nkuăl Dak Glong tâm rgop đah UBND xă mbơh ƀư ăp nău manh kơl an đah prăk kon đêt ntop kơl nuĭh ƀon lan hun hao wăng sa jŭt jăng ach o. Tă bah nĕ, kơl rnoh rnăk ach o hŭch tĭng ăp năm, rnoh an ƀư nău geh tâm ndâk njêng thôn ƀon mhe bah nkuăl dơi jêh, xă lĕ tât lor ƀon lan mhe ta dŭt năm 2020.

Dŏng prăk manh di nău ŭch, rnăk wa K’Lem mô knŭng n’hŭch ach o ma hôm ndâk ƀư du mlâm jay bơi 500 rkeh prăk

         “Rnoh rnăch ach o bah xă Quảng Khê năm 2011 rnôk mô hŏ ndâk njêng ƀon lan mhe hao tât 50%, tât năm 2019 hôm e rlău 27%, yơn lah tât năm 2020 ri rnoh aơ hŭch jŭr hôm 5,7% (jêng lah bah dâng 7% tâm di ƀon lan mhe). Bah nĕ kơl xă Quảng Khê jêh rnoh ndơ ƀư nău geh ƀư sa n’hanh tât lor ƀon lan mhe. Nĕ lah săk rnglăy bah nău gĭt tơm prăk kơl an dơh ntop kơl hun hao lŏ mir, ƀon lan bah ăp rmôt an manh tĭng nău ntrŭnh bah Nghị định 55 bah Chính phủ”.

         Tĭng wa Nguyễn Xuân Hưng-Groi Kruanh Chi nhánh Ngân hàng Nông nghiệp n’hanh Phát triển Nông thôn nkuăl Dak Glong, bah năm 2015 tât aƀaơ, ƀư tĭng nău ntrŭnh bah Chính phủ n’hanh Ngân hàng bah lơ, ntŭk kan lĕ ƀư ăp rmôt manh prăk ta ăp xă ta nkuăl Dak Glong an manh ăp prăk kơl an đah prăk kon đêt tĭnh nghị định 55 bah Chính phủ an nuĭh ƀon lan hun hao jŭt n’huch ach o. Ndrel đah ƀư tĭng ngăch dơh n’hanh săk rnglăy ăp sam ƀŭt manh prăk, tŏng ăp rah wah; ri ntŭk kan đă cán bộ mât uănh ta ntŭk ntĭm, groi nđôi nuĭh dŏng prăk manh di nău ŭch, săk rnglăy. Yor nê, uĕh tam manh prăk dơi ƀư uĕh, di đah nău ntrŭnh bah Chính phủ an. Bah nĕ ăp rnăk ƀon lan dơh lơn tâm nău gĭt prăk manh hun hao nkra njêng, tăch rgâl.

         “Rnôk bah năp, chi nhánh ndâk njêng rlău 100 rmôt manh prăk ta lam nkuăl Dak glong, nkah rnon rlău 900 rmen prăk an bơi 3.000 nuĭh ta ăp xă ta lam nkuăl. Nău an manh mpôl hên mkra ngăch, săk rnglăy an nuĭh ƀon lan; ăp ndơ manh dơi tŏng ăp prăk kon đêt tĭng di nău ntrŭnh 55/2015/NĐ-CP. Rnôk geh prăk nuĭh ƀon lan sĭt ntuh kơl hun hao ăp ntrong kan mât rong, tuch tăm n’hanh tăch rgâl an nău geh uĕh, bah nĕ jŭt jăng ach o, kơl ăp xă lôch jêh rnoh ndơ ƀư nău geh wăng sa gay rgop an ndâk njêng ƀon lan mhe an ăp ntŭk”.

         Knơm mbơh ƀư tâm ban tơm prăk an manh bah Chi nhánh Ngân hàng Nông nghiệp n’hanh Phát triển Nông thôn nkuăl DaK Glong tâm ăp năm bah năp lĕ nta kơl nuĭh ƀon lan ăp xă ta lam nkuăl dơi ntuh kơl hun hao nkra njêng. Ndrel đah ăp tơm prăk êng, tơm prăk an manh bah ngân hàng lĕ rgop khlay ƀư tĭng trong kan n’hŭch ach o nâp nâl ta ƀon lan, ntop kơl ăp xă tât lor ƀon lan mhe.

Nuĭh răk rblang: Y Sưng Phê Ja