VOV4.M’nông - Ƀư tĭng ntĭm rđău bah Ngân hàng Ngih dak mbơh ƀư tay ăp trong ntop kơl, dôh rklaih jêr jŏt an nuĭh manh prăk geh khuch yor srê Covid-19, bah nar 16/6/2021, Agribank n’hao âk ndơ an manh kơl an đah nuĭh geh khuch yor srê Covid-19 hao 200.000 rmen prăk gay ntop kơl nuĭh mkra jêr jŏt, đăp mpăn nkra njêng, tăch rgâl đăp mpăn nău rêh jêng.      

                   Mir cà phê tăm tay hvi 1ha bah nô Lê Đức Anh (đội 5 Công ty cà phê Đ’rao, nkuăl Cư M’gar, Dak Lak) lĕ ntơm tâm năm tal 8, ntơm tâm hao jêng ngăn. Ăp tơm cà phê lĕ rgum n’ging rsuêl play. Nô Đức Anh an gĭt: bah năp đaơ nô lĕ phah cà phê ranh, an neh rlu 2 năm tĭng di nău ƀư tăm tay cà phê, jêh nĕ mư tăm tay. Knơm săch ntil uĕh, ƀư tĭng di ăp nău kỹ thuật mât chăm mir tơm tăm hun hao uĕh. Mô kơt âk ntŭk, tơm way khĭt yor âk ntil bu tuh jêh rnôk tăm đêt năm.

         “Tăm tay cà phê ri jêh rnôk ih neh, tăm tuh mbô gay ƀư mhe neh n’hanh he tăm tay cà phê ri an săk geh âk lơn. Rnôk mô hŏ tăm, rnôk pơng ranh ri du ha knŭng geh 7-8 tấn. Rnôk tăm tay tâm năm play ri geh bah 15-17 tấn, lah geh săk ri âk lơn. Mir tơm aơ 1ha, geh 17 tấn”.

Ăp cán bộ ngân hàng Agribank ta Dak Lak hăn ntop kơl nuĭh ƀon lan ăp sam ƀŭt n’hŭch prăk kon manh yor khuch bah srê Covid-19

         Wa Nguyễn Hữu Thọ, Kruanh Công ty Cà phê Đ’rao an gĭt: Công ty geh 488 ha cà phê, bah năm 2010 tât aƀaơ lĕ ƀư tăm tay 298 ha, geh rlău 60% rnoh neh. Rnoh prăk an tăm tay rlău 33 rmen prăk. Lĕ rngôch yor ngân hàng Nông nghiệp n’hanh phát triển nông thông ta nkuăl Cư M’gar da dê an manh đa prăk kon kơl an. Bah năm 2020 tât aƀaơ, yor rnoh khlay cà phê âk lơn rnoh tăch jêng Công ty mâp âk jêr jŏt. Nău êng rlău 65% tâm dĭng lĕ 435 phung pah kan bah Công ty lah nuĭh rnoi mpôl đêt, nău rêh wăng sa hôm e jêr jŏt; lĕ rngôch manh prăk ngân hàng da dê gay ntuh kơl mât tăm n’hanh năp nău rêh. Tâm rnoh nkah rnon rlău 41 rmen prăk aƀaơ bah công ty, lĕ rngôch manh ta ngân hàng nông nghiệp phát triển nông thôn nkuăl. Bah rnôk srê covid-19 ntoh, Công ty lĕ dơi ngân hàng njong rnon n’hanh n’hŭch prăk kon. Nău aơ du gâl kơl công ty, nuĭh pah kan n’hŭch oi jêr jŏt.

Ntop kơl ăp ntŭk tăch rgâl ƀư ngih sam ƀŭt mầm non tư thục

         “Ngân hàng nông nghiệp kơl an ntŭk ta nău n’hŭch prăk kon, n’hŭch lĕ rngôch ăp prăk kon bah ăp ndơ manh. Bah 9,5 an tât 9% ri lĕ rngôch dơi nkra jŭr 8,5 jêh nĕ 7,5 n’hanh 6,5 jêng n’hŭch mbak jâk prăk kon an ntŭk kan tâm 6 khay bôk năm 2021. Bah năm 2020 ngân hàng lĕ uănh mĭn tay n’hanh n’hŭch tât lĕ năm 2021. Ri prăk kon nĕ kơl an ntŭk kan dŭt âk gay mkra nău jêr jŏt tâm năm bah năp.

         Wa Lê Hồng Phong lah doanh nghiệp ntuh kơl ndâk ƀư ngih sam ƀŭt Mầm non tư thục Phong Lan, ta nkuăl têh Quảng Phú, nkuăl Cư M’gar lĕ rlău 10 năm aơ. Bah rnôk geh srê Covid-19 ntoh, geh rnôk ngih sam ƀŭt an ntĭl mpông lôch khay. Aƀaơ ta ăp nar knŭng wơt 70 mon, đah 1/4 nkôp đah ƀa ƀă. 13 nai an tâm pleh ntĭm. Ngih sam ƀŭt tư thục, jêng  nai rlu ntĭm tâm ban đah nău n’hŭch prăk khay. Wa Phong an gĭt: Doanh nghiệp bah wa dơi ngân hàng n’hŭch prăk kon.

         “Ngân hàng kuăl doanh nghiệp n’hanh ôp nu nău jêr jŏt m’hâm geh ? n’hanh knŭng an doanh nghiệp mpeh ƀư mbơh nu nău. Ngân hang nta an manh prăk kơl an. Nu nău aƀaơ ri gâp ŭch ngân hàng an prăk kon đêt lơn tay tâm rơh srê aơ, n’hanh njong năm trok prăk me. Tal 2 tay lah dơi ri ntop kơl an ngih sam ƀŭt dâk manh prăk gay trok prăk khay, ntop an an nai tâm yan srê”.

  Ƀư tĭng ntĭm rđău bah Chính phủ n’hanh Ngân hàng Ngih dak Việt Nam-Agribank Bah lơ Dak Lak dôl ƀư ntop kơl nuĭh manh n’hŭch prăk kon yor khuch srê Covid-19

         Wa Nguyễn Quang Vinh-Groi kruanh n’gâng hàng Nông nghiệp n’hanh Phát triển nông thôn bah lơ Dak Lak an gĭt.

         “Tâm 2 năm mhe rlău geh srê covid-19 ri Agribank ta bah lơ Dak Lak lĕ ntop kơl an năch mkra jêr jŏt n’hanh rdâk hao nkra njêng tăch rgâl kơt: Dăp rgâl năm trok rnon, n’hŭch prăk kon n’hanh mât nâm ơm rmôt rnon lah 2.277 nuĭh, đah rnoh nkah rnon lah 451 rmen prăk. An manh kơl an 735 rmen prăk, đah rnoh prăk an manh lah 337 rmen prăk, tâm nĕ geh 19 doanh nghiệp đah rnoh prăk an 144 rmen prăk. n’hŭch mô sŏk prăk kon đah nuĭh manh ơm đah rnoh prăk kon n’hŭch an dơm bah 1 tât 3% tĭng nuĭh manh. Bah rnôk geh srê tât aƀaơ ri Agribank bah lơ Dak Lak lĕ jêh sam ƀŭt rhăch nău an 31.500 nuĭh, đah rnoh prăk an manh 16.320 rmen prăk. Ri Agribank bah lơ Dak Lak lĕ rgop tâm pă jêr jŏt kơt kơl nuĭh rlet rlău jêr jŏt gay đăp mpăn nkra njêng n’hanh hun hao wăng sa.

                   Nuĭh rblang: Y Sưng Phê Ja